現為開電視主持《健康關注組》的敖嘉年，自言父母管教嚴厲，少時勁百厭，經常被「藤條炆豬肉」，但媽媽卻是手硬心軟，除了生日必送蛋糕為他慶祝，即使家境不好也寧願留錢給他買靚衫和玩具。可惜父母在他11歲時離婚，他跟着爸爸生活，令他缺乏母愛，甚至是家庭溫暖。他由細到大甚麼事都要自己一個人處理，但他不覺苦，更從媽媽身上學習到堅毅。即將到母親節，為了𠱁82歲的媽媽開心，他表示自己就是禮物，會全日陪着媽媽度過。問他最想跟媽媽說的一句話，他突然紅着眼、哽咽地說：「細個時怕醜唔敢講，但其實媽媽我好愛你，如果可以換少少生命畀你更長壽、更健康就好喇！」

有錢留畀個仔

       敖嘉年自言小時候不愛讀書又百厭，最鍾意整蠱小朋友，有次擲水蛋落街整親個小朋友，媽媽返屋企後打到佢飛起，他笑言是最甘的一次。但他深知媽媽是愛錫自己的，因媽媽去到邊都會帶着他，「媽媽要周圍攞貨返屋企車，打風落雨都會帶埋我一齊去。」而且她打工的工廠有旅行，又會帶着他，「都係去郊野公園玩，嗰時屋企窮，但媽媽寧願自己着得寒酸啲，都會留番啲錢買靚衫畀我着，所以出到去佢啲朋友話我肥嘟嘟咁靚仔，第時大個做明星。」

儲到錢買玩具

       那時的敖嘉年會幫媽媽手剪線頭，賺到的錢媽媽會儲起來，表面就話用嚟交租，其實另有用途，「細個冇乜錢買玩具，都係阿爺周街執啲玩具返嚟畀我玩，媽媽見到咁樣，就將我剪線頭賺到嘅錢入落個密封嘅錢罌度，儲滿咗就打爛佢攞啲錢去文具店買玩具畀我。」溫馨的事陸續有嚟，敖嘉年好記得：「小學一年級時我出水痘半夜發高燒，嗰時冇冷氣又冇冰袋只得風扇，阿媽唔瞓係咁同我撥扇降溫，又蓋被幫我焗汗。」回想起，媽媽煮餸都有一手，最好味就是蒸雞，但過時過節先有得食，平時他最愛吃媽媽的煎雞翼。而每年生日，媽媽例必買個蛋糕跟他慶祝，令他非常難忘。

父母鬧交超驚

        好景不常，在敖嘉年11歲時，做酒樓的爸爸因嗜賭，終令媽媽頂唔順要離婚出走，當時他太細個都唔知發生咩事、乜都做唔到，只記得一家三口住在180呎的公屋，父母一鬧交他就好驚，只可以喊。之後跟着爸爸生活的他，為了見媽媽一面，千辛萬苦搭車去搵媽媽，「嗰時住藍田，媽媽就喺尖沙咀海港城做清潔，我去到就坐喺樓梯底同佢傾吓偈。」離開時他搭巴士回家，經過香格里拉酒店時停紅綠燈，他見到有一家人拖住手過馬路的溫馨場面，突然哭起來、淚流滿面，那一刻才驚覺自己沒半點家庭溫暖。

強媽媽好堅毅

       他長大後才明白感情冇得勉強，而媽媽打自己是為教好他，「雖然我唔主張（打），但嗰個年代係咁，而我冇乜所謂，都係一個過程嚟，同埋阿媽唔係虐待我，某程度上呢啲管教係需要嘅。」在他心目中，媽媽更是個很強、很堅毅的女人：「佢喺內地落嚟唔識字，但會車嘢幫補家計，同爸爸分開後做清潔，到𠵱家82歲仍堅持自己做嘢、唔靠任何津貼，𠵱家佢喺屯門租個舖仔賣袋仔同日用品，過時過節仲話生意好好，唔得閒應酬我，哈哈！」就是因為媽媽的性格，亦感染到敖嘉年要做一個勤勤力力兼有承擔的人，甚麼事都盡量靠自己一雙手去做，有困難亦是自己想辦法去解決。

不覺童年很苦

       問敖嘉年童年是否過得很苦？反而他輕描淡寫說：「我望返轉頭，唔覺得自己苦，因為父母同居住環境係咁，父母我冇得揀，但佢哋好錫我，只係我百厭，唔鍾意讀書，我讀書又蠢，成日被罰留堂，老豆就最忟憎，（爸爸會打？）嘩！打得好勁，但我知佢哋係錫我，只係環境係咁冇得選擇，都係咁樣生活、咁長大，父母盡量可以給予到嘅已經畀晒我。你問番我，都算感恩，都算係幸福，冇乜大事發生，父母又健在，家庭關係幾好，算係咁樣啦！」而且經多年後父母雙方心結已解開，現時還會互相關心對方，做仔的也感滿足。

視像通話窩心

       媽媽現時雖獨自生活，但敖嘉年已教懂媽媽怎樣視像通話，他笑言：「佢好叻嘅，識用wechat，咁就可以視像，其實父母聽到你把聲、見到你個樣就開心，呢份係最緊要嘅禮物，好過畀錢佢，畀佢都唔要，仲話我有錢吖，唔使啦！所以好多時我係報喜不報憂，因為你講啲唔開心嘅嘢會令佢擔心。如果佢打嚟問食咗飯未？食咗；近排幾好嗎？好好；工作點吖？好順利，我嚟緊去馬拉拍劇，有冇得睇？佢𠵱家晚晚都會睇《健康關注組》，呢啲就係佢平時好開心嘅生活。」

離婚媽媽安慰

       敖嘉年入行30年，無論工作和感情都遇過高低起跌，當他得意時媽媽當然開心，但失意時媽媽也會安慰他，始終敖嘉年在她心目中仍是BB一個。「其實我好少講啲唔開心嘅嘢畀佢知，除非佢哋睇到啲新聞知道，（當佢知道你同另一半分開咗有咩反應？）佢好愕然，之後話分開咗唔緊要喇，其實佢都會唔開心，但佢知道我哋係成年人，你有你哋嘅選擇，有緣第時再嚟過喇，（有冇催你搵番個？）佢冇提，佢明白感情都係隨緣。」

自己就是禮物

       嚟緊星期日是一年一度的母親節，問敖嘉年送咩禮物畀媽媽，他坦言：「每年都冇禮物送畀媽媽，因為我自己就係禮物，都係同佢飲茶，佢鍾意帶我去佢飲開茶嘅地方，同佢啲朋友見面，佢會話我個仔又嚟喇，總之見到面佢就最開心；或者去佢屋企坐，或去佢舖頭突然出現，嚇到佢跳起，通常我會打畀佢問佢今日使唔使開工，佢話要我就去。雖然佢見到我會話仲咩咁鬼遠都入嚟，但你見到佢係由個心入面笑出嚟。」

與媽媽的點滴

1.最開心的事

「好多喎，最開心係幾歲時跟阿媽去嗰啲工廠旅行，都係去郊野公園玩，而阿媽好錫我，所有錢唔用都好，佢會買啲靚衫畀我着，因為佢覺得出到去見人要整齊啲、乾淨啲，唔好好似個乞衣仔咁，因為我睇番啲相，都係有啲名嘅衫褲嚟，所以佢啲朋友見到我都話肥嘟嘟好靚仔，第時大個做明星。另外每次我生日，佢都會買個蛋糕同我慶祝，呢啲係我永遠永遠都會記得。」

2.最不快的事
「因為阿媽好鍾意去拜黃大仙，小學時有次同佢去求籤，個解籤伯伯話我老豆有外遇，我阿媽嬲到返屋企息晒燈等我老豆返嚟。嗰晚我老豆去飲，因為我老豆好少着西裝打呔，飲完返嚟，阿媽攞住把較剪問佢：『你係咪出去滾？』跟住用較剪剪佢條呔，剪到爛晒，嚇到我好驚，因為把較剪好尖，係阿媽用嚟剪布嗰啲好長嘅較剪，發生命案點算？當時我又只可以坐喺度喊。」

3.最後悔的事
「其實又唔會話好大件事覺得後悔，只係細個讀書唔叻，唔鍾意讀書，成日攞零雞蛋，咁點呢？要家長簽名，因為阿媽唔識字，咁我就呃佢，話合格，你簽名喇，因為畀我老豆簽佢實睇到，咁細個驚畀老豆打，所以趁老豆未返嚟，叫阿媽快啲簽，到𠵱家阿媽都唔知㗎！哈哈！我細個除咗百厭，有呢啲古惑嘢，但冇啲好大嘅行差踏錯。

4.對媽媽說一句話
「媽媽，我愛你！我要好好咁孝順你。」

5.為媽媽做一件事
「如果可以換多少少嘅生命畀媽咪，等佢可以長壽啲，將我嘅換畀佢，等佢可以健康啲。」

6.媽媽對他的期望
「佢叫我唔好亂咁使錢，要應使得使，儲番啲錢，唔係有咩事冇錢用吖！到𠵱家佢都係咁講，我話我知道，我明白，而我亦話畀佢知，我唔會亂咁使錢，因為係喺佢身上學到嘅，好似去到超級巿場，我格價格到...搵到個最平先買。」

化妝： 
Rigel Ng@ Rigel's Beauty Arts

髮型：
Philip lee

場地提供：
1111 ONES Restaurant and Lounge