發佈時間：18:12 2024-01-22
洪永城太太梁諾妍現懷胎7個多月，預產期是今年4月，正期待小女兒「Sir Face2.0」的來臨。一向有跑步習慣的她，在周日（21日）參加渣打馬拉松的10公里賽程，以大約1小時4分鐘完成。本是長跑教練的她，稱是以享受的心態參加，並冇想過要刷新個人紀錄，更鼓勵孕婦們在健康情況許可下，都可以做適量的運動。
然而梁諾妍佗B跑馬拉松引起極大迴響，網民分成兩派有正反兩極聲音，有大批網民表示支持，但也有不少網民直指她不負責任，認為跑馬拉松是冒險之舉，萬一被其他跑手碰撞，後果不堪設想。周一（22日）梁諾妍在ig story發文：「分享跑步的初心一直是想發放正能量。分享跑步帶給我們的好處、樂趣與快樂，希望大家也能感受到那種快樂，以前如是，現在如是。」
家庭醫生關嘉美：要量力而為！
對於孕婦跑馬拉松是否適合，家庭醫生關嘉美接受本刊訪問，她稱每人的體質不同，進行任何運動或活動時，應量力而為。「完全係individual assessment（獨立評估），唔能夠一概而論。每一個人都有自己嘅決定，人人嘅身體狀況都唔同，如果當事人有信心應付到就可以，要尊重對方嘅意願。」
「宏觀性嚟講，醫生都會一般建議孕婦唔好進行劇烈運動，因為會擔心穿羊水、容易早產。其實孕婦喺孕期都可以照返工、散步、緩步跑或做瑜珈，可以做吓伸展運動，又或喺瑜珈老師指導下伸展拉筯。有啲人本身有鍛煉開、做開運動，喺清楚自己體質情況下，都可以繼續。其實以前有好多農村婦女都係佗住耕田，甚至喺田度生啦！一個孕婦嘅情況都唔同，有啲可能本身要瞓床瞓到生為止，總之要視乎體質，諮詢家庭醫生意見。切勿去模仿人哋、人哋做乜你就做乜。最緊要係放鬆心情，保持正面，少睇負面新聞，唔好同人比較！」關嘉美說。
媽媽有話兒
身為媽媽級的名人及YouTuber們：陳君宜、羅霖及林芊妤（Coffee）接受本刊訪問，對於梁諾妍佗B跑馬拉松，表示十分佩服。身為元祖級瑜珈YouTuber、有國際認可瑜珈導師證照的Coffee，曾在懷孕8個月時玩倒立，她接受訪問時稱，認為梁諾妍跑馬拉松是冇問題。
Coffee說在懷孕時照樣做瑜珈、做gym及跑步，只是進行時把強度減半，更說懷孕時未有馬拉松舉行，故未有機會參加。Coffee說：「我有咗BB後都有Keep住做運動，其實嗰時我有問過醫生呢個問題，佢話如果你本身跑開全馬，咁你就可以跑半馬；如果你本身跑開10公里，你就可以跑5公里。即係本身你做開2個鐘運動改做1個鐘，所以我相信減半就ok。」
「其實洪永城太太本身有做開運動，而佢係喺一個好舒服嘅時間完成，因為我見到佢係6分幾鐘完成1公里，佢平時可能係4、5分鐘跑1公里，所以應該係跑得好慢，我覺得絕對可以。其實好多外國孕婦有咗BB都照做運動，所以真係要睇番你本身有冇做開運動，如果你本身係零運動嘅人，你無啦啦有咗BB去跑10公里梗係痴咗線啦！肯定唔建議！但如果你本身有做開運動，只係用一個比較舒服嘅時間、路程比較短去完成係可以嘅。」
育有9歲兒子Ayden的名媛陳君宜，坦言身邊有朋友懷孕時去騎馬，認為做運動是個人選擇。「首先我覺得佢（梁諾妍）好勁，佗住BB可以跑到10公里。講真，我𠵱家唔係佗住BB都跑唔到10公里啦！我有啲朋友佗B佗住5、6個月時都滑雪同騎馬，仲要唔係得一個朋友係咁，鬼妹仔啲嘅性格其實真係唔怕嘅。你問我贊唔贊成？我真係冇乜意見，因為每個人都有自己嘅選擇，係咪？我之前佗BB時我會小心啲，因為當時我係人工受孕，要好穩定，佗到5、6個月時我先做少少瑜伽，游水同行吓都會，跑就冇，冇做劇烈運動，我會小心啲。」
至於身為三子之母的羅霖，同樣認為人人體質不同，不能一概而論。「佗住7個月BB去跑渣馬，佩服！最緊要睇吓佢本身體質同埋佗住BB嘅狀態，亦都經過醫生允許嘅情況下最好，因為有啲女人佗BB係完全要瞓床唔郁得，每個人嘅體質都唔同，我覺得問題唔大，因為喺外國好多人做運動做到個BB出世。我佗BB嗰陣時，都有做吓啲瑜伽、比較一啲柔和嘅動作，但跑步就冇喇。」
