發佈時間：20:01 2026-03-29
MC，不是張天賦。他，是偽娘MCYip。有「香港偽娘」之稱的MCYip，18歲已坦然面對喜歡男生的同性戀性取向，雖然勇敢面對自己，亦「出櫃」向家人坦白，但一路走來，始終未獲家人全力認同支持，同時更因外表似女生，常被搞亂性別，因而決定當偽娘，但始終如一，從來冇想過要當女人。著名網絡電台主持人Stephanie Tang（巴喇莎）在東周網全新節目《巴姐有Say》中，MCYip娓娓道來當偽娘以來不為人知的故事。
用「他」或「她」來形容MCYip？相信用「他」是百份百沒有錯。MCYip在訪問中，直言偽娘這身份是「迫出來」的。「偽娘呢個身份都係被人迫出嚟！因為我個樣似女仔，但人哋一見我就叫我『小姐』，我會同佢哋講我其實係男人時，佢哋會覺得好奇怪，我又要解釋一堆嘢， 我就索性不如做『偽娘』。」
MCYip一直很清楚自己是怎樣，他的想法是：不會變性做女人！「其實我只係因為我生得似女仔，而我要扮女仔，係喺香港易啲生存，或者冇咁多誤會或解釋，所以我好強調同人哋講我係男仔！甚至我係幫自己鋪個後路：男裝或女裝都可以。甚至我覺得將來如果男性特徵再出返嚟，咁我到時就做返男仔。真係冇得呃，始終我係男仔。偽娘，我認為係變性前嘅入門，先要學女性裝扮儀態，之後再考量係咪做女人。咩嘢LGQT+，我咩都唔係！好多香港人唔會覺得偽娘係跨性別，外界只會覺得我純粹化咗個靚妝，似一個女人咁解，覺得我哋冇資格話自己係女人，亦都冇資格叫人哋稱呼我哋做『小姐』。」
」
MCYip說以前不喜歡穿胸圍，但近年「為勢所迫」下，也要穿上，為的是不想引起麻煩。「以前去EX（前度）屋企，費事被對方嘅家人知道，一定唔會講我係偽娘，所以沖涼後一定戴，着有袖嘅連身裙，嚟遮腳、盤骨及鎖骨等。以前唔戴BRA，但始終係要有一個女性形象出嚟，真係要有胸，胸係好重要，尤其對香港人嚟講，真係好奇怪，啲人嘅重點一定擺喺個胸到。」
在香港偽娘界，MCYip一定是最多人認識，討論度最高，同時也硬食不少負評，MCYip說：「好似之前見其他KOL生日，會擺code（電子收款）出嚟，但我擺，就會被人鬧係扮女人攞着數、話我係『電子雞』。我冇鬧返佢哋，只係覺得呢啲玩笑唔可以隨便開，未去到被人j嘅級數，點解要畀錢你先？」MCYip比其他KOL不同的，是太有自知之明，所以情願什麼也是自己扛，不回罵不反擊，更是常常自嘲。像他說平時是當烘焙導師及賣相為收入來源時，直言不會露點是有「自知之明」：「只係影吓內衣或黑絲等等，一定唔會三點全露，因為我粒點太細冇人睇！」就算見有人為當更完美的女生而竭力想方法隱藏性徵，MCYip說不會仿效：「始終男人着褲會『現形』，有啲人係會好極端，將下體攝喺pat pat，用膠紙、用幾層絲袜壓住，我更聽過會着女性內褲同用衞生巾去包到實，但我唔會做，可能本身size唔大。」
偽娘怎看MCYip這個偽娘？他說：「佢哋只會覺得我博出位，認為我唔係想做女人，又唔係為佢哋發聲，見我本身又有副『偈』，只係覺得我不停強調我係男人，擺明係『倒米』，認為我係有曬命或攞着數心態。」網民攻擊負評，其他偽娘指指點點，MCYip一直都是保持「硬食」心態，不抗辯不反擊，心理質素超高：「情緒唔好，多數係自己面對，或間搵吓朋友。17、18歲時第一次拍拖，當時我嘅身份係GAY，失戀後都會擔心自己會唔會冇人要，加上『出櫃』後屋企人唔係咁接納我，身邊冇朋友係GAY，所以當時搞到自己幾有情緒病，覺得好似全世界乜都冇晒，唔知點面對，最後要睇醫生食藥。」
「但到呢刻我會諗，今時今日我係硬食，有啲咩嘢衝過嚟我就硬食啦！好彩我係獅子座。就算覺得自己好慘都冇問題。點解唔可以畀自己慘？點解覺得慘係好冇用、係放負？如果你唔識享受或去明白慘嘅痛苦，你唔會明白快樂係幾重要同埋要珍惜。點解唔可以同人講你有幾慘？其實願意同人求救，係需要好大勇氣。陳蕾有一首歌《求救勇氣》，令我覺得喊就喊，痛就痛，可能會有人明白去關心，點解要害怕人哋睇唔起自己？我而家算識得同悲傷共存，亦都唔覺得抑鬱、悲傷等等係一件咁差嘅事，係唔需要逃避。」
30歲的MCYip，人生目標是自在。「我想自在做自己，想冇人認識我。有時如果全日都冇人認得我，我會好開心自在。唔需要顧及係咪被人認得、會唔會咁啱當時講錯嘢、又或被人認到時自己個樣係點。如果唔使顧咁多嘢，我會好快樂。過往最開心，係大家一齊冇化妝，一齊飲醉，喺到喊喺到發癲，分享內心嘅嘢。」
