發佈時間：09:00 2026-09-13
有些快樂，看得見。這天訪問2010年港姐冠軍陳庭欣，他們一行四人帶着兩隻寶貝狗狗Winter和一姐，以及兩隻鸚鵡ShabuShabu和GoroGoro到場，比例上，一對一，貼身照顧。
家中有如小型動物園，她笑言起初都擔心同屬獵犬的兩隻狗狗會捉雀仔，「事實上真係會，要教佢哋冷靜，雀雀都係屋企成員。𠵱家有時我鬧狗狗曳曳，Shabu會加把口鬧曳曳，好搞笑。同埋佢哋都為食，變咗訓練佢哋聽話一啲都唔難。」
雀仔聲，狗吠聲，交織在一起，變成熱鬧的交響樂。
看門口嘥氣
論入門輩分，Winter比一姐早，但性格上，一姐是大家姐，喜歡做話事人。
陳庭欣說：「Winter體重最高峰時試過17 kg，所以佢又叫肥Win。佢好友善，搓圓撳扁都得。我懷疑佢個籮柚喺狗仔界入面好性感同吸引，帶親佢去狗公園，無論係狗仔定狗女都會追住佢籮柚，哈哈！」
肥Win是友誼先生，有人入屋都不會理。陳庭欣指有次忘記帶回鄉卡，拜託鄰居代她入屋取，兩隻狗狗竟然一隻擺尾，一隻繼續睡覺，「靠佢哋兩個看門口，嘥氣！」
提起狗狗，陳庭欣的嘴角自然往上揚，更大爆肥Win的如廁習慣，一定要落街，在石屎地解決。「唔知佢係懶定點，佢唔能夠紮起個馬屙完先行開，要一路行一路屙，往往屙咗條poo poo路出嚟。」
肥Win令人哭笑不得，一姐也有百厭的時候。「試過有次睇電視，一姐都冇過嚟整我，我心諗佢一定做緊壞事，點知真係，佢將我個銀包當牛皮咁咬，連信用卡都咬開一半。」
走失嚇餐死
訪問途中，不停飛來飛去，將陳庭欣個頭當作停機坪的，是今年12歲的愛情鳥GoroGoro。雀仔細細，卻身懷絕技，懂得用嘴將錢幣放入膠兜，又會聽從指令自轉。「不過佢𠵱家年紀大，有自己諗法，好少表演喇。」
Shabu同樣聰明，懂得唱走音版〈Happy Birthday〉，又識講「欣欣bye bye」、「點蟲蟲，蟲蟲飛」，笑到陳庭欣肚痛。
不過Shabu也曾經令她流過不少眼淚。話說7年前陳爸爸代她帶Shabu出街，將雀籠放在車頭蓋等Shabu曬太陽，豈料一陣風吹來，雀籠跌落地，嚇到牠飛走。
「我撲去九龍塘一帶搵，搵咗兩、三個鐘，終於喺一棵樹底聽見Shabu把聲，但嗌極佢都唔肯落嚟，點知call消防員，一升起雲梯，佢就嚇到飛走咗。
「第二日天未光，我再去搵，見到Shabu同隻鷹喺天空追逐，幾驚佢受傷呀。之後搵咗幾日都冇蹤影，直至4、5日後收到電話，原來佢飛咗去龍翔道嗰頭嘅屋苑，敲窗入咗人哋個廚房。」
重逢一刻，她慶幸Shabu只是有少少肚屙，腳仔有點污糟。問她下次會否小心睇實雀雀？她笑說：「係我老竇要再培訓囉！」
