發佈時間：18:10 2024-02-22
名模姚書軼（Mikki）早前偕好友江美儀到北海道二世古滑雪8天，因二人2018年開始一齊學滑雪至現在，不過礙於疫情停了3年幾，今次再學番好回味。無奈技術生疏，每日都跌好多次，但因她太熱愛滑雪，所以跌完再起身、不㫁練習，一日仲練足10個鐘，她坦言好辛苦、好攰，但又好開心，並大讚二世古真是初學滑雪的好地方，皆因出名雪夠粉，跌極都唔會覺得太痛非常好！
Mikki今次與4位朋友一齊去滑雪，當中包括江美儀，她笑言：「我哋係滑雪嘅鐵腳，因為由Beginner開始，連Boot都唔識着一齊學Ski。」前後學滑了4次，每次都是去北海道的二世古，皆因Mikki覺得當地雪場選擇多，今次主要去Hanazono和Annupuri，因雪道夠闊又較平坦，對初學者真係好好，加上北海道出咗名係粉雪，就算跌親都唔會好痛。
技術有待改善
其實她們半年前成功聘請滑雪教練後，便由江美儀着手計劃行程。她稱去了8日，每天都是由朝早8時半開始上堂，一路學到下午4時，跟着再滑到晚上7時半，直至雪場關門為止，滑足10個鐘。雖然好辛苦、好攰，但因她太熱愛這項運動，所以覺得好開心、好enjoy，她還買了些私人裝備如頭盔、鞋和鏡等，合共約7千港元。至於趣事？她笑言是不停跌親，跌咗好多次，「因為停咗3年幾，好多嘢都要慢慢Warm Up番，𠵱家嘅技術太約係Level 3去到Level 4，學識點樣平衡，但點樣令到個姿勢再優雅啲？仲要啲時間去練。」
滑雪必浸溫泉
講到最歎都係滑完雪去浸溫泉，Mikki稱：「日本溫泉好乾淨，有男女混浴，亦有男湯或女湯，我哋咩都試過晒，的而且確係滑完雪必去嘅好地方。」她續稱北海道咩都好，係食嘢最唔好，她解釋：「因為當地食店少、人又多，而每間店又細，最多得20個位，所以真係冇啖好食，通常都係食拉麵同快餐，好彩食到兩餐BBQ，但有時都係喺超巿買啲嘢返酒店食，但都開心嘅。」
性價比高酒店
今次她入住酒店Midtown Niseko，有少少自助形式，「因為今次真係為咗滑雪而去，留喺酒店時間比較少，我哋淨係返去瞓，所以住呢間酒店就Perfect喇，因為乾淨企理，又近雪場，而且一個人都係幾百蚊一晚，真係性價比高！」
網址：
Midtown Niseko （酒店） https://midtownniseko.com/
Niseko Grand Hotel Hokkaido （浸溫泉) https://g.co/kgs/JAUYr9n
