發佈時間：12:00 2026-01-27
去年2月，在鴨脷洲駕駛考試中心，MIRROR成員姜濤學了10多堂車就去應考；而極有駕駛天份的他，僅用了15分鐘便成功一take pass。成為「P牌仔」的姜濤，雖然曾忍不住去了睇法拉利，八卦一下價錢，但最後還是卻步，轉為入手一架價值約60萬元的黑色寶馬IX系電動車 。
據密友爆料，榮升做車主的姜濤，短短3個月就發生交通意外，導致新車撞花損毁，需要送入廠維修，故他近日轉以平價版日本車代步。此外，密友又透露，姜濤與MakerVille只餘下不足3年的合約，巳開始傾續約事宜；而他的首要條件，便是在工作上擁有自主話事權及北上賺人仔。
未甩「P牌仔」發生交通意外
去年榮升車主的姜濤，首部戰車本想入手男人夢寐以求的法拉利，但最後還是選擇「實際型」的、一架價值約60萬元的黑色寶馬IX系電動車，他還一炮過課金，作為獎勵自己努力工作的禮物。而愛以揸車減壓的他，腦閉塞時便會遊車河來清醒頭腦，讓自己遠離繁囂。此外，愛車如命的他，每日一收工便會到停車場望望愛車，更親自落手落腳打理，又不停購買汽車「補品」及添加裝置，當正「老婆仔」咁錫，盡顯男人的浪漫。
不過，據密友爆料，還未甩「P牌仔」的姜濤，去年底駕駛「老婆仔」出街時，竟不小心發生交通意外，導致它擦花之餘，更撞到凹陷。幸好，姜濤並沒有大礙，只是輕微擦傷，當時亦有報警求助，及後他亦如常開工。密友表示：「60萬蚊新車，落地幾個月就整花，姜濤都好心痛，即刻拎入廠嘗試維修。不過，佢自此都有陰影，揸車加倍小心，並且非常專注，而近兩個月亦都冇見佢再揸呢架車出街，而係揸另一架平價版日本車代步。」
揸二手四驅車代步
日前，《東周刊》就發現，姜濤的確以一架藍色Suzuki Jimny四驅車代步，該款車全新約20萬元，而在二手平台購買則只需10萬元，相當抵玩！密友直說：「姜濤因為平時工作忙，有保母車載出載入，佢都甚少揸車，只係平時去做運動、打籃球先會揸車。自從撞車之後，佢覺得自己揸車技術未到位，加上架電動車對於新手嚟講偏大，有啲盲點位；以及佢亦自覺未能夠操控得好好。所以，佢決定用一架平版車代步，即使再有損傷都冇咁肉赤，等待自己技術再好啲嘅時候，先揸番架貴車。」確實揸車最緊要人車都安全。
據悉，MIRROR跟MakerVille還有約三年就滿約，所以「人氣王」姜濤的去向，便成為娛樂圈的焦點，近日更突然傳出他將會轉投Sony Music。事實上，各MIRROR成員現階段正與MakerVille洽談續約的事宜，至於是否「轉會」還是言之過早。密友又透露，向來有主見的姜濤，對於續約一事向公司開出了一些條件，主要是工作上的自主性，另每年出歌的產量、曲風，還有接拍劇集及電影的類型等，並希望大部分工作都擁有話事權，同時亦要求工作安排不要太過密密麻麻，因為他想多一點時間陪伴家人。
「入坑」新興運動 約肥仔切磋球技
除此之外，姜濤於2017年曾參加內地歌唱選秀節目《快樂男聲》，但在30強止步。之前，他曾坦言當時沒有準備好就參賽；而現時作為「人氣頂流」歌手的他，盼續約後可以北上吸人仔。近年，ViuTV經常與內地不同的單位合作，要助姜濤發展內地市場，應該可以一蹴而就。
自去年12月起，姜濤便唱個不停，除了舉行9場演唱會之外，還有《造星》家族澳門跨年騷及今年初的《全民造星VI》表演嘉賓；而辛苦完一輪後，他便在社交平台留言稱：「潛水了，Bye﹗」向來熱愛打籃球的他，最近竟然「入坑」新興運動匹克球（Pickleball) ，並多次被發現相約志同道合的「師父」梁業（肥仔）切磋球技，看來開始沉迷。密友表示，姜濤現時一有空檔，就會book場玩匹克球，而他的熱愛程度並非一般，可謂比打籃球有過之而無不及。原來，他打匹克球不單止新鮮感，更因為可消耗大量卡路里，又可以當跑步練氣，當真一舉數得！
浪漫巴黎跑步 倫敦開騷
休息接近兩星期後，姜濤日前正式復工，並飛到巴黎出席時裝周。這次，他逗留的時間由於不是太長，故未有額外行程，但他就表示特別喜歡在巴黎跑步，因為在街道上看見不時有人跑步，所以每一次去到必定會跑一次步。回港後，姜濤便全力投入籌備將於3月13日於英國倫敦OVO Arena Wembley舉行的首個海外個人演唱會《KEUNG TO “LAVA” LIVE TOUR 2026 - LONDON》，而這次倫敦騷也是巡唱的第一站，更是他音樂生涯的重要里程碑，所以必定使出渾身解數！
延伸內容 : 姜濤重提墮海事件唔尷尬 指最大突破是冇事 難忘笑稱:不要再試第二次
延伸內容：直擊姜濤墮海後閉關生活 靠3招走出陰霾
延伸內容：還原姜濤墮海真相 追訪醫生與目擊者
延伸內容：姜濤墮海後兩度表示「I'm fine~」自拍展示「酷酷的手臂」傷痕累累
