發佈時間：12:27 2023-09-04
現年70歲的TVB總經理曾志偉日前在台灣動刀做動脈瘤微創手術，因需要覆診而在當年逗留兩個星期，不過期間卻傳言四起，先誤傳他即將離開TVB，他雖然剛完成手術亦隔空現身。近日又再瘋傳曾志偉被查出，已入股緬北詐騙集團，執法機關證實消失不實，曾志偉亦急發聲明澄清。昨日（9月3日）曾志偉下午從台灣飛返香港，約在下午4時親自見傳媒回應事件。
肚臍下方主動脈動刀
曾志偉接受訪問時談及其健康情況，他表示：「好多謝大家關心，一路進度良好，手術好成功順利，住了五、六日醫院，然後出院便等覆診，前日再做全身檢查，醫生非常滿意，說情況靚仔、可以返香港。」問是否一早預計會做手術？曾志偉表示：「係，醫生觀察十幾年，條血管漲咗，要睇住，否則會有危險。疫情三年無檢查，發現要做手術，明年再覆診。」
曾志偉指患處是肚臍下方主動脈，支架沒有取出，傷口則在大髀，他又指這個本來是大手術，幸好現在有微創，沒有的話就需要劏肚。問不做手術有危險？他笑說：「唔做就『唔使做』！穿咗會冇得救，冇得避，是必需要做，醫生朋友都建議做。（會再休息？）休息咗。會改日常生活如早啲訓，飲少啲，對人禮貌啲、唔好睇靚女、唔可以勞氣。自己會聽話，打波都可以，同阿倫（譚詠麟）踢波，冇乜腳法就可以，後生就未必得！」
去台灣順道陪家人
曾志偉指手術後身體更健康：「所有指數正常返，靚仔不得了，現在11點上床，去台灣是可以順便陪家人放假。（準備復工？）復住先，有重要事要便準時返工，不重要咪遲半個鐘，雖然話乜都唔理，但其實都要zoom，如果可以zoom解決都可以work form home（在家工作）。」問到全否轉崗位，曾志偉即笑說：「轉道具？轉化妝？（係咪同同事派定心丸話自己有排做？）會叫佢哋孭重些、我輕些。（係咪唔辭職？）交咗幾封信，但彈返轉頭！」他又笑着叫TVB女主播幫他向主席要求減少工時。
曾志偉大鬧假新聞泛濫
對於近日涉詐騙集團的新聞，問曾志偉有否感到煩擾？他說：「做這行我從來唔睇新聞，但實在太多，內地朋友都問候，更傳埋新聞來冇得唔睇。」曾志偉又笑言這是電影《無間道》中的韓琛才會做，之後他認真說：「最憎呃老人家錢，仲話拉咗我？我都仲喺台灣！如果是藝人身份我都不回應，但有職位在身一定要處理，所以出聲明回應。」
曾志偉還大鬧：「講真是要去面對，要同大家分享，現在太多網上假新聞，點解會誤導咁多人，其實對我影響唔太大，對於後生藝人好慘，會因為假新聞冇咗工作、好慘！其實不止這行業，假新聞害到好多人，甚至搞到小朋友自殺，佢哋整幾張相好容易，但就會影響人一生。所以假新聞會害好多人、大家唔好亂信，整假新聞的人都要問良心點解要咁做，三思三思！」曾志偉強調：「既然牽涉到犯罪我便要回應，因為假新聞有流量有人關注，大家見到假新聞唔好轉發。（採取法律行動？）之前發聲明，而家涉及詐騙同犯罪，會搵源頭查根究底，一定會告。」
