發佈時間：19:19 2025-01-02
女仔儲物，通常離不開Labubu、Molly和Sanrio家族，這類得意可愛的卡通人物。
不過Face Skin Aesthetics醫學美容中心老闆馬慕嫻﹙Natalie﹚，過去二十多年來，卻鍾情人形figure公仔。自中學時代，她便開始珍藏NBA球星的figure。
「自小喜歡打藍球，順理成章經常會睇NBA藍球明星，最喜歡Michael Jordan，他有很多哲理名言，例如『失敗並唔可怕，千萬不要去逃避，因為失敗不是終點，而係衝向成功的起點。』令我無論在讀書時，到出來社會工作或創業，都本着堅毅決心，勇往直前。所以我儲figure，都係由Michael Jordan開始，有時做嘢辛苦，攞出嚟睇吓，成個人都好relax。」
兼職賺錢買心頭好
開設醫學美容中心的Natalie，自小是運動健將，因為愛打藍球，而令她漸漸愛上收藏NBA球星的figure公仔。「小學和中學都加入了學校的藍球隊，擔任主攻手。自小已經常看NBA的藍球比賽，所以一直留意NBA的球星如Michael Jordan﹙米高佐敦﹚、Kobe Bryant﹙高比拜仁﹚，O'Neal﹙奧尼爾﹚和Iverson﹙艾佛遜﹚等。我由中學時期開始收藏他們的figure公仔。」
那年代，售賣NBA球星的figure店舖不多，她多數在拍賣網搜尋，「當時最常在雅虎拍賣尋寶，購入價每隻約$2,000至$4,000左右。對於當時仲係學生嘅我，價值係相當昂貴，本身屋企唔係話富裕，都係靠儲起父母平日俾嘅零用錢、新年利是錢，和我放學後幫小朋友補習，及去肯德基做Partime賺返嚟嘅錢去買，真係儲幾個月錢先買到一隻，隻隻咬開都有血有汗呀！」
她的珍藏當中，部份更是限量版，極具升值潛力，「都有諗過當投資㗎，有段時間見啲figure升值幾倍，一隻賺到幾千蚊，尤其Kobe Bryant意外離世後，他的figure炒到過萬蚊一隻，都有心郁想放晒佢。但諗番當初自己花咗咁多時間四圍去搵，加上又係自己鍾意，就唔捨得賣。」
土地問題原盒收藏
除了NBA球星figure，近年她又沉迷漫威漫畫創作的超級英雄Iron Man﹙鐵甲奇俠﹚，珍藏量超過一百隻，「Iron Man就真係睇咗電影後開始鍾意，尤其係主角Robert Downey，真係好靚仔，加上電影特效好勁，08年睇完第一部電影後就愛上咗，之後開始四圍去搵相關嘅figure公仔儲。」
因土地問題，Natalie笑稱只有少部份放在香港家中，大部份珍藏都放在迷你倉和內地的家，「因為內地屋企地方大，可以折盒展示出來。而放在香港、部分價值較高的figure，部件多又精細，很難清潔，放出來又怕物料氧化，所以通常買回來欣賞完就放回盒內，部份甚至唔開封，原盒收藏。而近年亦因為忙於工作，加上真係冇位擺而減少購買。」
她喜歡Iron Man figure還有一個原因，「因為它還可以換衫，亦有很多配件，唔同系列有唔同顏色和裝備，仲有Robert Downey個樣，拆出嚟擺或者玩都超有趣味。雖然呢啲figure睇落好男仔嘢，但其實就好似其他女仔玩barbie一樣，扭吓隻手，郁吓對腳，轉吓裝，講到底其實都係公仔一個，最緊要玩得開心。」
《東周網》訪談系列節目《星桄伴我心》12月重磅嘉賓：
肥媽攬屍唱情歌 憶亡夫飲泣 搵胡楓哭訴對話大公開
「黑妹」李麗霞2段婚姻3次患癌「我其實係一個軟弱女人！」
《異空感應》阮浩棕演技大爆發 罕談緋聞女友何沛珈 致電某人激動爆喊真情流露
敬請期待：劉江「講呢啲」｜ 結婚51周年，分享獨門退讓心得｜爆周潤發古惑招𠱁跑山
