發佈時間：10:00 2024-12-24
在無綫節目《呃錢》中，申訴被婚姻介紹所呃錢的苦主黃先生，因自覺有「Baby face」而成坊間熱話，更被網民戲稱他做Baby face。其後，他公開向「東張女神」梁敏巧示愛，但慘食檸檬，於是再向前「亞視一姐」薛影儀埋手，同樣無功而回。
不過，求愛不遂的Baby face搞作多多，將愛火經拳頭化作怒火，準備出戰由「富三代」鍾培生搞的打擂台。至於他的對手，就是曾參演ViuTV《反起跑線聯盟》的薛國斌（斌叔）。日前，兩男首度碰面先是互睥，繼而越行越埋，更玩鐵頭功互相較勁，未上擂台，場面已經㷫烚烚！
延伸內容 : 《呃錢》肥仔自爆對梁敏巧心動原因 開出7大承諾求愛
延伸內容 : 《呃錢》肥仔誓言30日媾掂「東張女神」 獨家直擊梁敏巧被攔途求婚
延伸內容 : 《呃錢》肥仔被指貌似孔慶翔 墮相親騙局 自覺Baby face有市場
「東張女神」梁敏巧 「亞視一姐」薛影儀輪住派檸檬
無綫節目《呃錢》的首集苦主黃先生，自稱墮入婚姻介紹所的騙局，還在節目中，爆出金句「我有baby face，點會無市場？」成為一時佳話，更被網民戲稱他做「Baby face」，並獲「抽水王」林作青睞，決定將他大改造及教追女招。不過，他最終慘遭「東張女神」梁敏巧（Maggie）和前「亞視一姐」薛影儀派檸檬，但就無阻他人氣急升。近來，他還學埋林作打擂台，出戰下月4日舉行的《培生擂台無敵盃2024》，打1局90秒的賽事，體重限85公斤或以下。
火速操練 準備上擂台
事實上，平日最多跑步半小時的Baby face，從未打過拳，更遑論上擂台，故馬上找來今年贏得《I-1亞洲金腰帶》的拳王楊瑋棋擔任教練。日前，Baby face經教練鞭策狂操，先舉啞鈴及做sit-up熱身，然後才訓練出拳和反應。
期間，Baby face練到汗流浹背，於是除下上身衫，也懶理露出腰間的豬腩肉，接着繼續拼勁地操練。對於今次參賽，Baby face坦言︰「啲人覺得我上《呃錢》係造假，所以我想證明我係做得到，係真男子漢，唔係吹水！」對於勝算，他信心十足︰「第一回合就KO佢！」為了實現承諾，他每日收工都會操2至3小時，另又會控制飲食，狂食雞胸及戒糖。他表示期望心目中女神梁敏巧到場打氣，「見到Maggie，信心會提升100%！」
Baby face被斌叔一拳擊落地
Baby face的對手是曾參演ViuTV《反起跑線聯盟》系列的自由身演員薛國斌（斌叔），他雖然較 30歲的Baby face年長8歲，但他的身形高大，足足比Baby face高出24厘米，兼且於去年《培生擂台：無敵盃》的重量級賽事勝出。對於跟初哥 Baby face作賽，在同一間拳館正在練習的斌叔直說︰「都有人留言叫我：『打死佢！』我唔會，但會用『還原靚靚拳』令佢重新做人，『東張Maggie』唔要Baby face，我希望佢成為『Man face』，做番個男人。因為我做創作，唔想有啲人只為搶眼球，但又俾唔到營養大眾，咁係好唔健康。」
當兩雄首度相遇，率先互睥，猶如「眼光」劍影，怒火馬上急升，他們繼而越行越埋，先由頭撞頭、膊貼膊，終忍不住出手切磋。身為搞手的鍾培生一度上前勸止，但不果，斌叔一拳將Baby face擊落地，嬲得Baby face打沙包發洩，未上擂台都火花十足！
網民建議鍾培生同向佐打擂台
之後，斌叔突然補上見面禮「金牌燒鵝」公仔，但又叮囑Baby face︰「男人冇火，猶如燒鵝，打贏我，咪俾番我，be a man！」並指公仔有錄音功能，正好讓Baby face唱洪嘉豪的〈黑玻璃〉時錄音。
第3度在港搞擂台的鍾培生，指因接納民意，而加多一場Baby face對戰斌叔，這次合共有17場賽事。有網民建議鍾培生跟向佐打擂台，他說︰「若啱磅數和價錢，仲有搞手搞，我冇問題。我唔會又搞又打，咁樣就太辛苦！」對於Baby face對戰斌叔，誰人較大機會勝出？他表示︰「邊個勤力，我就撐！今日第一次睇Baby face練拳，都似模似樣，比我想像中好。」希望屆時Baby face和斌叔，為觀眾呈現一埸精彩難忘的比賽。
《東周網》訪談系列節目《星桄伴我心》12月重磅嘉賓：
肥媽攬屍唱情歌 憶亡夫飲泣 搵胡楓哭訴對話大公開
「黑妹」李麗霞2段婚姻3次患癌「我其實係一個軟弱女人！」
敬請期待：《異空感應》阮浩棕演技大爆發 罕談緋聞女友何沛珈 致電某人激動爆喊真情流露
