發佈時間：17:57 2023-10-19
雖然書中有黃金屋，但未夠錢買樓，還有甚麼可從書中求？
31歲的黃妍，2017年出道以來，走的是文青路線，連其最新專輯《4891》，也是向偶像村上春樹的作品《1Q84》致敬。
「喺疫情最嚴峻嘅時候，呢本書帶俾我好大嘅衝擊，嗰種孤獨感，令我，仲有我身邊嘅人，無論喺心態定生活習慣，都有所改變。我諗呢個專輯，就係記載我哋喺呢幾年嘅成長。」
也許，黃妍從書中覓得滿足心靈的妙法，但是，成長路上還是會有一些事，不能紙上談兵。
「今年初，我差唔多要為演唱會閉關，我媽就Confirm有病，要做唔同嘅Checking，當我老竇同細妹都要返工，我就要做屋企嘅精神支柱。
「我係比較硬淨嘅，所以我媽幾時要做PET Scan（正電子掃描）、幾時去睇邊個醫生、保險要點樣⋯⋯我全部搞掂晒。喺我能力範圍內，做到嘅就係陪伴。」
黃妍是家中長女，責任感也特別重，「我記得演唱會前，有一日夜晚要Rehearsal，朝早我喺診所，一路等我媽，一路聽歌、溫歌詞，真係好攰好⋯⋯
「但我會諗，既然係事實，就唔可以去怨，只能夠見到眼前有咩問題，就逐一去解決。」
實戰勝過道聽塗說，而常識也是不可或缺，如輻射不能用鹽解決，即使書中沒說，你也知道吧。
同步成長期
外表柔弱的黃妍，雖自稱硬淨，但要分身兼顧陪伴母親跟事業，蠟燭兩頭燒之下，她少不免會忽略了自己。
「嗰段時間，我好感受到身邊嘅人俾我嘅力量，佢哋都知我發生咩事，但係第一句唔係問我媽點，係問我點。當時我都冇諗過自己，諗番轉頭，其實係有啲渾沌，心理同生理嘅狀態都係差。
「做個Show嘅時候，有啲幕後嘅朋友，會諗方法令我放鬆心情。」
陪伴母親進行各種檢查的日子，令黃妍看到媽媽另一面。「我媽好驚打針，但佢要抽血、抽針，都唔知要做幾多轉。入到去，我見佢直情成身震晒，我都唔知可以點幫佢，只能夠陪伴。
「嗰一刻，我真係覺得自己成長咗，好多嘢都可以Handle到。後來我表姐話，我媽同佢講：『我真係Feel到黃妍大個咗。』。」
成長的，不只黃妍，還有其胞妹。「因為我3月做完香港嘅演唱會，6月又要去英國做，而我發現喺我唔喺香港嘅日子，我妹就做咗屋企嘅精神支柱，有咩都幫手，唔係得我一個人去撐，我都好老懷安慰！」
拒絕妖魔化
6月的英國行，黃妍帶着複雜的情感，她表示：「情感上嘅牽動，係比平時多些少。一嚟嗰個係一個正統嘅Show，將我喺香港做過嘅，成套搬咗去英國。
「二嚟英國嘅粉絲好熱情，令我特別感動，喺唱〈心的全部〉嘅時候，我喺台上面『吹沙入眼』到唔係好唱到歌，有半首都唱唔到。」
人在異地，黃妍也分外感性，「除咗英國嘅粉絲，仲有啲特別喺希臘同加拿大，遠道而來嘅粉絲。當我見到由希臘嚟嗰個粉絲，真係好感動！佢係去年離開香港嘅，當時我仲叫佢俾心機讀書，同埋照顧好自己。
「到再次喺英國見到佢，我第一句就問：『有冇俾心機讀書？有冇睇好自己身體？』，好似探朋友咁。而見到一個一個熟悉或陌生嘅面孔，都係講廣東話，喺異地Share相同嘅語言，感覺好親密又好奇妙。」
跨地域活動
音樂的奧妙之處，在於沒地域跟語言界限，而一向走文青路線的黃妍，就藉新專輯《4891》，把這奧妙發揮極致。
「最初開始呢個Project嘅時候，大概係兩年之前，本來只係諗住做一Pair Pair嘅歌，帶出非黑即白嘅Message，但同做人一樣，冇嘢係咁死嘅，於是就轉咗做一啲對應、延伸嘅歌。
「一路做，就好似有指引咁，除咗去日本拍MV，Pazu（其大碟創作總監）仲諗到用一本小說，去為呢個Project埋尾。而要出書，就要有一定厚度，所以我就用咗兩個禮拜時間，同拍檔寫咗30版字。」
一張專輯，歷時兩年，即使是廣東歌，也選擇到日本拍攝MV，她解說：「因為《1Q84》入面，好多場景都係喺日本，而《4891》係致敬專輯，所以就忠於原著，去日本拍MV。
「到𠵱家要完結呢個Project，我都會喺日本舉行展覽，算係一個完美嘅句號。」
從音階中找到滿足感，問黃妍可有收益，簡單一點，儲夠首期沒有？「梗係未啦！香港啲樓太貴嘞！我都係做租屋一族，住得悶都可以搬屋。哈哈！」
說2字頭到3字頭，大概閣下會覺得，少年太年輕，但在走過的路上，可有如黃妍的想法？
「一路行嘅時候，唔會覺得辛苦嘅，好似行暗斜咁，行過咗望番轉頭，先知道原來條路都幾難行。不過，我都會笑住行！」
正能量充足的她坦言：「人生已經咁辛苦，我睇每件事，都會向住最差嘅方向，諗咗先。
「呢個諗法只係俾我自己一個好啲嘅準備，點樣處理最差嘅情況。通常呢啲最差嘅情況，都唔會發生，所以做人就會舒服啲㗎嘞！」
不論開首的數字是甚麼字頭，懷着樂觀總有轉機，明嘛？
