鍾嘉欣（Linda）一連3場「Remember記得・鍾嘉欣演唱會」佛山站，昨晚於嶺南明珠體育館圓滿落幕。鍾嘉欣繼3個月前在廣州開完騷，今次反應依然熱烈，3場均座無虛席；她更罕有獲父母及細女Anika由溫哥華到佛山捧場，並坦言3名子女中，她覺得Anika最有機會繼承其表演的「衣砵」，皆因只有2歲的她，性格外向又大聲，聲音清脆唱歌應幾好聽，還節拍感十足，鍾嘉欣笑言後繼有人。

延伸內容：:鍾嘉欣於溫哥華冒雨湊女 網民大讚她是賢妻

延伸內容：鍾嘉欣重演婚禮扔花球 好姊妹驚喜拉隊撐

延伸內容：鍾嘉欣撇甩三仔女同老公再度蜜月

增演唱會新鮮感

今次佛山站演唱會，其實跟之前廣州站一樣，鍾嘉欣以經典金曲《一顆不變的心》為個唱揭開序幕，不過個唱流程、舞台設計、服裝及燈光效果卻截然不同，她說：「有咗上次經驗，今次心態變得輕鬆咗，重點反而係點樣令個演唱會進步，睇番之前嘅片段、觀眾嘅反應，從而去調節，希望畀到觀眾新鮮感，等觀眾覺得值得嚟睇，亦因為每場嘅變化，令自己有一份刺激感！」

民選點歌最難忘

鍾嘉欣指佛山站除了保留「扔花球」環節外，還加插「民選點歌」部分，她表示：「扔花球環節，我同樣會親手寫上一個特別Message放喺花球，但民選歌曲部分真係好難忘，因為事先要畀網民揀選喜歡嘅歌曲，然後我再去唱。仲有一個環節係同觀眾一齊唱《月亮代表我的心》，令我好感動，因為我𠵱家住得比較遠，但仍然可以心連心，保持着呢種關係真係好難得；當望見月亮時，不論身在何地，仍然好似連繫住咁。由於呢首歌亦係劇集《護花危情》一首好重要嘅歌，真係好代表到我嘅愛！」

「重量級」粉絲撐場

猶記得廣州站個唱，一班好姊妹及好友到場支持，令鍾嘉欣大感驚喜；而今次佛山站亦有「重量級」粉絲撐場，她續說：「係我好重要嘅人嚟睇我演唱會，佢哋係我阿爸阿媽同埋細女，其實我入行咁耐，阿爸阿媽好少機會睇我演出，阿爸直頭未睇過，好開心佢哋終於可以睇到，親身見證佢哋個女嘅努力。因為我大女同個仔都要返學，所以淨係細女嚟到，佢都係第一次睇我演出，佢嘅反應好興奮，雖然佢戴住耳塞，但都睇到又跳又唱。」

獻唱時感動到喊

她在獻唱《做你的晨曦》時，更被觀眾席上的媽媽感動到喊，她表示：「呢首歌係講我對女兒嘅愛，因為今次媽媽在場，唱呢首歌時會憶起好多媽媽湊我嘅回憶，令我忍唔住喊，冇諗過自己會喊，好感動，所以每次望到觀眾席上嘅爸爸媽媽同個女，我都要避開視線。」

望細女繼承衣砵

提到細女Anika，鍾嘉欣坦言3名子女中，她覺得Anika最有機會繼承其表演的「衣砵」，她解釋：「佢雖然最細個只有兩歲，但性格比較外向，把聲好大又清脆，唱歌應該會幾好聽，而且佢一聽到音樂同拍子聲就會跳舞，好有節拍感。」鍾嘉欣還感謝監製梅小青和劉家豪到場支持她。

返香港過聖誕節

個唱後，鍾嘉欣透露一家5口將來港過聖誕，對此一家人心情都十分興奮，她說：「老公疫情後都返過香港，佢好期待，因為佢都有好多親戚喺香港，其實3個小朋友都嚟過香港，佢哋好鍾意呢個地方，覺得香港好方便、好多姿多彩，就算行街買衫嘅款式都畀加拿大多，每次返嚟香港，佢哋都會學到好多廣東話，我都想帶佢哋返嚟多啲。」

《東周網》訪談系列節目《星桄伴我心》11月重磅嘉賓：
即睇：黎諾懿夫婦互爆閨房樂事 慶結婚10周年 | 星桄伴我心
即睇：林保怡失落《金雞獎》影帝 送花冧李珊珊 激罕親揭秘密關係 | 星桄伴我心
即睇：星桄伴我心 | 周吉佩牀前唱歌送別：「爸爸聽到眼角滴淚，先至斷氣！」
即睇：星桄伴我心 | 梁敏巧哭訴阿媽爛賭輸層樓 悲慘身世揭秘