常說人生是一趟旅程，當中充滿起伏與變化。旅途上經歷成長、挑戰和探索，收穫無數珍貴的回憶與經驗，面對獨特的風景，人人體驗各異。

縱然人稱「子華神」，但黃子華的旅程體驗，其實跟常人你我他無異。被「神化」前的路，甚至更為漫長：為當演員，由茄喱啡做起，既當過資料搜集、編劇，至30歲前為了於演藝圈留名，放手一搏自資演出棟篤笑，才踏上「封神之路」。

從無到有，黃子華在這30多年來，未曾停步，由舞台到大銀幕，同時增開公仔箱戰線；從茄喱啡到男一⋯⋯近10年有黃子華擔綱的，必屬神作，包括近日他傾力宣傳的電影《破．地獄》。

延伸內容 : 黃子華許冠文兩大巨星合體 破天荒世紀對談《破．地獄》

延伸內容 : 《破·地獄》 許冠文、黃子華戲中合唱 子華投入角色激動拭淚

延伸內容 :  《破·地獄》 | 林家謙唱主題曲  感動到包你聽到眼濕濕

「登六」子華怕死嗎？

64歲的子華神，完全未見老態，訪問這天，輕鬆地手持咖啡進場，坐在梳化上，從容自若。修讀哲學的他，演出涉及生死這人生一大課題的新作，自然更有感受。

「我昨日先諗到一件事，你估食煲仔飯嘅人多，定係賭馬嘅人多，還是係死嘅人多？冇人係比死嘅人多，無論你進行咩嘅活動，最多嘅一個活動就係死，另一個就係生，呢個係最日常嘅嘢嚟。」

「所以，拍呢套戲，喺拍戲嘅過程入面，我覺得其實呢個（死亡）係好日常嘅生活，對我哋大部分人嚟講，只不過係我哋接觸唔到，但其實係好多嘅。如果唔係呀，香港嘅樓價就只係升唔會跌啦！」

論日常生活，問已可手持樂悠咭的黃子華怕死嗎？他坦然表示：「我覺得呢啲說話言之太早，一日未去到嗰一剎那，我覺得都係講之嘛。我覺得人生本身係一個靈異嘅過程，係最靈異嘅。」

「你諗吓你嘅出生係點嚟？生命係點嚟？如果你鍾意物理，好似我咁，就會考慮到物質，咩叫物質？咩叫粒子？億億萬萬嘅粒子，形成咗你今日，然後到一日又會消散，咁就係一個極其靈異嘅過程。」

靈異的旅程，若可如子華神般，踏着盛惠3,000元的潮牌運動鞋遊歷，未知可會於消散前Hip一點？

子華神下凡 全因題材夠冷

近年一年才演出一部電影，《破．地獄》能吸引子華神下凡，全因夠冷。

「呢部戲係好冷門，又冇人敢掂嘅題材，某程度上可以直接話係趕客，講死、講破地獄，我覺得好有型！冇人敢掂，唔單止係香港冇人敢掂，其實全世界都唔係好多人敢掂，竟然有人敢掂。」

「我睇個劇本，係一個好好嘅劇本，我係覺得我好幸運先真，我能夠有機會拍係一個好大嘅運氣、榮幸。」

黃子華坦言「幸運是我」，也有為作品做足功課。

「我一接到呢個《破．地獄》，我就即刻諗起日本有一部《禮儀師》，而我哋呢部係好唔同。《破．地獄》一定要拍，因為呢個儀式係香港一個很大嘅文化特徵，印度有燒屍落去恆河、西藏有天葬，香港嘅文化其中一個好特別嘅地方，就係我哋有破地獄。」

「透過睇呢啲葬禮儀式，其實唔單單只睇儀式本身有幾特別，其實透過佢嚟睇整個地區嘅文化。我睇過印度嘅燒屍，天葬我都睇過，喺香港竟然有一部電影，可以代表我哋，話俾全世界嘅人知，除咗印度、天葬，香港仲有破地獄。係反映咗一個世界，對生死有啲咩嘅睇法。」

電影於不少常人眼中的禁忌之地：殯儀館、墳場、義莊拍攝，每天拍畢，黃子華也有跟從習俗「淨化」，但只是「入鄉隨俗」。

「我哋啲工作人員都安排好嘞，事實上我屋企人都有啲，整一堆咩碌柚葉，但這個真的要講，我做呢啲事係令大家安心啫，我自己就冇咩所謂嘅。」

「我係好尊重其他人嘅感受，我做呢啲嘢，人哋會覺得安心啲嘅話，咁我就做。等於每次入片場，大家都俾支香我，我都拜吓，四面都拜勻。」

許冠文是一個特別的存在

生死一線間，並非驚險場面，在黃子華眼中，死亡與他只有毫釐之遙。

「我覺得最深感受嘅，係我喺殯儀館好八卦，見到一啲先人真係喺度等。你諗吓殯儀館嘅先人係喺邊度嚟？入面係有啲地方，運送上去嘅，我去過嗰啲地方，所以我睇到。咁你就會明，其實呢件事（死亡），離我哋身邊好近。」

都說人生如戲，戲中與許冠文Jam南音，還勾起黃子華的音樂回憶。

「我都好鍾意嗰一場戲，好多感情喺入面，好多男人一生嘅感情，其實很複雜。我覺得南音係一啲要保育嘅文化遺產，我呢啲鬼佬讀番書，通常更加愛好中國文化。」

「我喺外國返嚟嘅時候，成日聽白駒榮嘅帶，聽到爛為止，文千歲、馬師曾、新馬師曾，我都鍾意聽。我自己都識彈結他唱，有3個Chord，第4個就唔識㗎嘞。」

對於黃子華，許冠文是一個特別的存在。

「佢真係好厲害，無論身體同個腦都冇退化，仲係咁Sharp！因為Michael喺呢30幾年嚟，都是不停喺度諗最偉大嘅劇本，佢要再拍一套喜劇，所以其實佢係冇停過。我都同導演講，Michael係一位導演，佢落場嘅時候，係用導演嘅眼光睇一切，好全面！」

「我跟Michael嘅關係，既係我偶像，又係我嘅老闆、老師、老友，所以我同佢演戲，係有好多感情喺裏面，戲內戲外。」

「正如拍南音嗰一場，如果大家入場睇，係牽涉到一個『難』字，嗰個『難』字就係Michael自己研究出嚟，對南音呢件事，佢有一個很獨特嘅睇法。我哋喺現場，就係咁配合佢，係一個好好玩嘅創作過程。」

「票房毒藥」到「票房保證」

由《一蚊雞保鑣》的「票房毒藥」，到身兼編導演的《乜代宗師》要賣樓籌旗開戲，再到近年的「票房保證」，黃子華對演戲的丹心，從未變樣。

「我好幸運，其實呢幾次，《飯戲攻心》、《毒舌大狀》同《破地獄》，幾位導演都係編劇，佢哋對自己要嘅嘢都好清晰，成件事變得好統一，話一就一。」

「坦白講，我哋做演員，可能我又唔係太好，又做過編劇，有時會覺得，導演係咪應該搵編劇傾吓？如果導演集所有嘢於一身，就好統一。所以我個人認為所有最好嘅導演，到最後都一定係編劇！」

對人生的感悟，哪怕只是一瞬間，也能解開纏繞心頭的結，而黃子華的心結，就在拍攝新戲時解開了。

「拍呢套戲令我做咗一件事，係我成世人做任何工作都未試過，拍完之後，我同咗一個我打算唔會再見嘅人，食咗一餐飯，我覺得好厲害，我唔係為咗做訪問食嗰餐飯，唔係為咗宣傳或者為咗啲乜。而是做完呢套戲，我覺得不如同佢食餐飯，係令我有咁嘅力量。」

他坦言，那是其64年人生中的最大秘密，但秘中之秘，他選擇留給自己。」

「我當然唔會同你說點解啦！呢啲係人生最大嘅秘密！因為呢個人本身都唔知道我有呢個打算，所以我更加唔會講係邊個。但係已經發生咗（吃飯），可能我𠵱家做完呢個訪問，我每個朋友都會諗：『唔通我有咩得罪佢？係唔係我呢？』，總之呢套戲對我來講，係有好正面嘅力量。」

生人都要破地獄 生人都好多地獄㗎

未知生，焉知死？

狀似拋書包，但據《破．地獄》導演陳茂賢稱，多得子華神，令電影更加圓滿。

「我本身已經有『超渡先人，超渡生人』呢一句，係子華同我講，生人都要破地獄，生人都好多地獄㗎，呢個係佢俾我嘅。係好厲害！嗰個感覺好似係，我寫咗一個上聯，佢填埋個下聯咁，嗰個感覺係好興奮嘅！」

以光影為生人破地獄、解心結，戲未上，於上文你大概已看到子華神率先受惠；導演坦言，親眼目擊傳奇較技，已是無憾。

「佢同文哥（許冠文）一齊嘅時候，我就喺旁邊睇戲。我記得第一日，Michael一嚟到現場嘅時候，佢先係導演，係好夢幻嘅。因為佢同子華對於我哋編劇出身嘅嚟講，係Legend。」

「佢（一指子華）係一個子華神，本來都感覺好遠，但𠵱家佢坐喺我旁邊。可以集齊佢哋演戲，仲唔使喺戲院買飛睇，又係演我寫嘅嘢，我覺得夠嘞，可以退休嘞！」

一直被談及的神，則坐在一旁，但笑不語。