發佈時間：12:21 2024-11-02
生活，不止淡淡似是湖水，至少對於吳林峰來說，No！
「唔止我，生活係要努力嘅，我都係喺生活入面搵挑戰，撇除我係一個可能叫做係公眾人物嘅身份，我係一個人，同所有人一樣，都有份工，而我份工就係寫歌。」
為了做好這份工，29歲的他，充份運用自己唱作人的身份，定下長達一年的挑戰：每兩星期完成一首歌曲，一年就要創作26首歌。由1月走到今天，他已完成了21首作品，尚餘5首，便成就解鎖。
「我覺得用馬拉松去形容呢件事，係好啱嘅。跑步除咗訓練身體，仲係訓練自己嘅心情，一開始一鼓作氣去跑，頭10分鐘一定係最爽嘅，到開始攰會好想停，但自己又知道，一停咗就跑唔番，於是逼自己慢落嚟。
掙扎完之後，開始跑順咗，就要堅持去到終點；同步又會諗，臨近終點，都要爆發一次。」
走着走着，吳林峰坐下來，又有另一番體會。
「我覺得呢件事，令我學識咗接受自己嘅短處，先可以進步，唔止接受，係要認同自己嘅短處。我都好肯定，我唔係一個會爆紅、大家一聽到一首歌就會好鍾意嘅歌手。
「我更加需要做嘅係，做好我嘅音樂，俾我喺老咗之後，可以同我啲孫講：『你阿爺我有一年做咗26首歌，呢件事冇人做過㗎！』。」
朝着目標進發，是吳林峰的自我滿足過程。
「咁樣先會令自己覺得，人生唔係單單只係一張白紙，得一支黑色筆喺度畫，至少都搵唔同嘅顏色填一填，令人生豐富啲、精采啲。」
令生活泛起生氣，不求人，你也可以。
延伸內容 : 《破·地獄》 | 林家謙唱主題曲 感動到包你聽到眼濕濕
延伸內容 : 晴天林抽水特快 一日時間速成〈記憶棉衲〉
延伸內容 : 竇靖童︱首個巡唱上海上演 3造型5環節 竇靖童勁親民
吳林峰: 不斷刮肉但冇填番啲窿
就如吳林峰所說，他並非令人「一聽傾情」的歌手，但其作品如〈樂壇已死〉、〈捱麵包的人〉及〈未生〉等，也街知巷聞。不過，他也需要一些回氣的時間。
「咁耐以嚟，某程度上寫歌對我嚟講，係要我刮自己啲肉出嚟，咁先夠真實，但同樣地我都需要補番個窿。呢幾年就係，我不斷刮肉但冇填番啲窿，變成我嘅心理，其實有啲唔係好平衡，仲怕咗寫歌。」
在懷疑人生之際，他決定挑自己機，趁年輕試一次。
「我會形容今年呢個project，對我嚟講係一個挑戰，係有啲難度嘅，但唔係遙不可及嘅事。每一個人都可以有呢啲挑戰，我覺得一定有人勤力過我，可能未必係同我做一樣嘅事，可能喺其他地方。」
明白回到初心的矜貴
「我就上網Search『有趣嘅音樂project』，搵到一個係Kolor做過一個叫『The Law of 14』嘅Project，仲出埋碟。嗰一刻我好興奮，但佢哋一個月做一首歌，我就想試一個禮拜做一首。」
「我再Search有冇人做過一個禮拜一首歌，原來大陸歌手叫汪峰都做過。我就覺得冇嘞，一個禮拜有人做過，一個月又有人做過，如果計得盡一年嘅話，兩個禮拜好似啱啱好，我就決定要做。」
從可能中繼續發掘無限可能，吳林峰明白回到初心的矜貴。
「我好鍾意Ed Sheeran，但最鍾意係佢第一隻碟，俾人發掘嘅時候啲歌。我覺得人嘅本質，會隨住成長加咗好多層保護罩，係會令你越來越勁，但本質先係最珍貴。
「作為一個藝人、創作人，本質先係最會發光嘅。於是我就覺得，既然我講到自己咁驚創作呢樣嘢，不如放低晒一切去創作，以毒攻毒。我仲先做咗一首歌，叫〈So Let it Go & Flow〉，做咗出嚟冇派台，但我有咗信心，開始喺一個冇計劃嘅情況下，係咁做係咁做，做到𠵱家。」
屬INFJ（內向）型人格
入行5年，吳林峰除了自寫自唱，還為其他歌手創作歌曲，你以為他交遊廣闊？他坦言，自己也是社恐分子。
「我係人多啲就搞唔掂，𠵱家咪好興咩16型人格嘅，其實我感覺好E（外向）嘅，但我好認真做嗰個測試，發現我係INFJ（內向）嘅。只要去多人嘅場合，我會匿喺一個角落，只會搵我熟嘅人傾偈，唔熟嘅同我Say Hi，我都唔會直視對方，因為我唔敢。
「除非我覺得好似傾得到，我就會好𠵱家咁，始終我都入行前做過社工，都知道點樣溝通係令人舒服嘅。我係I人嚟㗎！我可能對住熟人，先會突然轉咗E囉。」
需要壓力先可以生存的人
社恐以外，吳林峰還會焦慮至失眠。
「咩我都焦慮！原因是⋯⋯我我好想改變一下自己嘅性格，唔知係咪因為我係獅子座，我會設定係自己對自己嘅標準太高？同埋我自細個到𠵱家，都鍾意每日都諗自己有咩做得唔好，我諗今日做完呢個訪問，今晚我就會諗，我講漏啲咩呢？
「仲有人大咗，可能因為男仔，我嘅責任感係大咗嘅，會諗父母年紀大咗、女朋友⋯⋯好多嘢都要諗；又會諗自己係咪嘥緊時間，係咪應該做啲嘢，搵吓錢。」
說人是犯賤可會太偏激？吳林峰就如此自我分析。
「我係一個變態到需要壓力先可以生存嘅人，就算你俾一年時間我，我真係會『Pea』到臨交之前先做。但係一喺壓力底下，我就會有超凡表現！我考試好高分嗰啲，都係臨考前一個禮拜先溫書嘅，我係唔可以長時間努力嘅人。」
有生之年 想挑戰爬一次喜馬拉雅山
明年便30而立，香港地最庸俗的獨立指標，大概是買樓，吳林峰又諗太多。
「唉！香港地買樓，我覺得呢個唔係一個好嘅決定。跌，我買完再跌，咁咪蝕咗？可能我嘅退休生活，係賺到好多錢，可以周圍飛呢？但暫時呢個Moment，我都係租住先，租樓好似好啲，冇咁大壓力。買咗樓要供，我唔想成世人俾層樓困住。」
自由的靈魂，同時也雙腳着地。
「我會Keep住俾家用，因為我喺版權嗰邊有收入，我今年咩都唔接，但其實都好多Show都有錢。
「可能我阿媽唔Care我俾幾多，但我都堅持俾。阿媽係啱嘅！阿媽我愛你！Thank you！」
忽然向吳媽媽示愛後，吳林峰對自己的人生目標，也甚有規劃。
「第一件事，我要保持健康，呢個係必要嘅！我下年第一個目標，係減肥！第二件事，我希望自己可以將今年寫嘅歌，做一隻碟，再做多啲作品，令我喺創作上，搵到一個方法令自己成長。
「今年我仲有個諗法，我好想喺自己有生之年，挑戰爬一次喜馬拉雅山，我下年30歲，目標係我喺40歲前爬一次。我想出一隻碟，放喺喜馬拉雅山上面，好似插枝旗喺嗰度咁，好有型！」
儀式感
二人同行，除了要步伐一致，那種有了你開心啲的感覺，不能或缺。吳林峰跟女友拍拖6年，
仍會「想用多啲時間，同佢行多啲路先。」。
「我哋唔使送好多禮物，只係經常諗呢啲白痴嘢，
今年就畫畫。個個都說佢畫得好，但我覺得我都畫得好好，
哈哈哈哈！我盡咗力㗎！因為我哋每一次
拍拖紀念日，都會輪流諗啲節目俾大家做。」
即使鹹魚白菜也好好味，該有的
儀式感，吳林峰也不會怠慢。
「上年就係我諗，因為我哋Anniversary係5月，好熱㗎嘛，我上年嘅Task就係，大家一定要着長袖衫同長褲出街。
「今年到嗰一日，佢話佢唔想出街，我哋畫畫
好唔好。因為大家都唔知道送咩給大家好，我哋
又唔係嗰啲需要咩名貴禮物嘅人。我人生只有一個對於佢嘅
願望，就係佢肯同我打機，但佢唔肯，咁冇計啦！」
即使未盡完美，但此刻的吳林峰，笑得很冧。
