年齡，從來只是數字，並非自我安慰，看數字的增長，總有些人會有另一番感想。

40歲的麥浚龍，就是當中的「一枝花」。

「我嚮往𠵱家呢個年紀，我講過，我唔係特別享受青春。10幾歲嘅時候，我好期待有一日自己40歲。我唱〈耿耿於懷〉，20歲把聲同我𠵱家40歲把聲，已經唔同嘞！」

18歲便入行的他，唱而優則導，繼而雙線並駕齊驅，當中也經過不少摸索階段。

「我成日覺得，10幾20歲係喺度摸索，所謂碰釘、交學費，係正在學習嘅階段，每樣嘢都想試，因為有嘅就係青春。

「到20幾30歲，就係搵到方向，但都係喺建立階段，就算搵到方向，都要去鞏固佢。而30尾到40歲，就開始鞏固咗一件事，之後嘅路，其實就係點樣進化。」

除了「一枝花」，40也代表了「不惑」，麥浚龍點頭稱是。

「我覺得到咗呢個歲數，個人定咗好多，可能係成熟咗。我其實都好興奮，進入呢個年紀，一定經歷咗好多唔同嘅事。以前始終係年紀輕，資歷比較短，面對嘅喜怒哀樂，點樣處理呢啲情緒，已經唔同咗。」

人大了，對人生自然有更深體會，麥浚龍坦言，開心始終最重要。

「人生裏面，有好多Project，先唔理係咪工作，定係自己嘅Passion，其實拍一部電影，或者做一件事，都好似人生，每個階段都要相信自己。

「最有趣嘅就係，有高有低。就算唔會每一日、每一分鐘都開心，經歷低潮，先會懂得珍惜開心嘅時候。我𠵱家懂得去接受，亦都知道，幾開心都好，幾唔開心都好，日落月升，都會過去嘅。」

年齡是數字，能坦然走過高低，保持追夢心態，從來不需要跑數。

叛逆命

將於12月開Show的麥浚龍，故事來自其《The Album》的企劃，而這次成事，他以「命」一字來概括。

「今次嘅故事，其實係屬於第一季未完嘅章節。我做最後一個章節嘅時候，正值係COVID，因為當時第一季都有好多角色，唱嘅人有很多，我記得我喺錄製、監製其他人嘅歌嘅時候，反而自己喺嗰一刻未有時間做，然後就COVID⋯⋯但我覺得，每個創作都有佢自己嘅命。」

除了「命」，時機也不可或缺。

「直至今年年頭，我做咗一個Show叫《金榜提名》，呢個Show係一個未出街嘅劇本，我再抽一啲角色出嚟放上舞台。喺創作上，我係好怕重複嘅，所以如果你話《The Album》呢個企劃，正正就係有一個未完嘅章節。而每個創作都有屬於佢嘅命，我覺得可能嗰個機會，就係𠵱家。

「當然，要諗係唔係真係可行，同埋今次我呢個Show係做兩晚，故事嘅視點都會唔同，工作時間亦會大好多，所以體力都係一個新嘅拿捏。」

論體力，身形結實的麥浚龍，因為疫情轉成一個「早上人」，並持之以恆地運動，身體也健康了不少。

「我每個禮拜健身，最少3次，最多5次，每次個零兩個鐘。食嘢我又食好少，主要一日食一餐，想食咩就食咩，但係只係食晚餐，因為我晏晝唔餓；其他時間我都會食吓生果，最緊要嘅，係起身嗰杯咖啡。

「我覺得肚餓嘅時候，食嘢係最開心嘅，所以我主要食晚餐，今日係Special case，因為做訪問，我呢個時間（下午）就肚餓嘞。」

現在的麥浚龍，享受運用不同感觀去連結其作品，日積月累的經驗，令他為自己定下目標。

「所有創作嘅Elements，都係通過文字、影像、音樂、視覺、氣味⋯⋯全部都係通嘅，點樣呈現出嚟，點樣牽動到觀眾最大嘅情緒，就係我想做到嘅。我明白，每個人嗰杯茶都唔同，我做一首歌，固然係我滿意我先會做，但原來呢首歌，唔係你嗰杯茶。我覺得冇咩嘢，或者可能𠵱家未係你嗰杯茶，10年後可能係呢？

「我首歌〈借火〉就係例子，我做嘅時候，好多人都唔明，會覺得當時正正就係『禁煙』（條例），覺得為咩做一首講食煙嘅歌，但係我又覺得，用呢個角度係我唯一想講嘅事。而隔咗好一段時間，可能觀眾都大個嘞，明白我講嘅呢種浪漫，呢種萍水相逢，都幾得意吖。」

往目標進發，由歌手增添導演標籤，他笑言：「好歸功於我40歲前嘅叛逆，如果唔係因為叛逆，我唔會喺入行10周年嘅時候，閂埋房門寫咗《殭屍》嘅劇本，而冇做過其他Public嘅嘢。」
以自我滿足為原點，成就了麥浚龍的進化。

「我唔係18歲就會諗到28歲嘅人，因為好多要天時地利嘅事，唔係Plan咗就會配合到。當時（入行10周年）咁啱有一個，應該可以話係吃力不討好嘅選擇，我可以去做一個演唱會，仲好，大家會順理成章覺得歌手10周年，開演唱會係好Smooth嘅。

「我就喺一個先兆都冇之下，突然間去拍一套戲，啲有色眼鏡就會嚟。而有色眼鏡對我嚟講，係一個推動力，但唔係一個結果。結果最有趣嘅，係啲有色眼鏡跌晒眼鏡嘅時候，先係最⋯⋯最⋯⋯我形容唔到嗰種感受。」

難以形容的感受，還有觀眾引頸以待已久的電影《風林火山》，電影拍罷6年，上映日期仍未聞樓梯響，導演麥浚龍則大賣關子。

「我覺得進度係健康嘅，係，係有2個鐘、3個鐘，甚至多過6個鐘嘅版本，但係幾時上呢？其實都係外間人去講佢哋嘅猜測，我就覺得，都係留番一個驚喜會好啲。」

So鬚

享受充滿未知的人生，麥浚龍同時保持了探索精神，現蓄着少許鬍鬚的他，說話時鬍鬚隨動作擺動，令人禁不住問：要多久修剪鬍鬚一次？

他聞言先大笑，再帶着笑意說：「我好隨意，唔好話𠵱家，應該話，我以前有一段時間，啲鬚咪好長嘅。好多人以為係我Plan出嚟嘅造型，其實唔係。只不過係我有一日，起身冇剃鬚，第二日又冇剃鬚，想試吓到底係咩樣。

「我諗有一年零九個月左右，我都冇剃鬚，最終就去到呢度（手比劃至鎖骨位置）。」

時為2015年，無心插柳的形象，他也有悉心保養，並面對過生活上的不便，「我有用護髮素添！我諗當時啲鬚俾我最大嘅麻煩，有兩樣嘢：一就係飲湯嘅時候，因為啲湯一定滴落嚟。

「二來就係，嗰時我去咗一個好凍嘅地方拍《風林火山》，-30度。我覺得唔剃鬚感覺上暖啲，但係當我由室內出室外，同演員傾嘢，傾完之後，只係幾分鐘嘅時間，我啲鬚就結晒冰，然後我入番室內睇Mon，啲鬚嘅冰就開始溶，人哋會以為我流口水⋯⋯好得意，如果我冇留鬚，我又唔會知道會咁嘅。」

探索過未知，你便明白，其實so-so也可以不錯。