「軒公」張敬軒在澳門倫敦人一連5個周末舉行15場的「Dahlia Blossom The Prime Classics Live 2024 張敬軒澳門演唱會」，昨晚（18日）正式展開。首場演出，軒仔以5套全新歌衫亮相，有2件更是「份量」十足；而歌單亦作大幅度調整，他稱有6成以上作品是去年未唱過的，望給觀眾新鮮感。他還分享很多童年往事，其後因有歌迷期待軒仔鬧人，他以鄉音笑言：「你7街瞓！」即笑爆全場。

5套全新歌衫

        這次演唱會是「THE PRIME CLASSICS」的第三章，軒仔以5套全新歌衫演出。而為演唱會打開序幕的閃石開胸西裝，是以7萬粒水晶釘裝而成、重量超過40磅，是出自服裝設計師Kenneth的手筆。而另外一套全身黑色閃閃連身衫，配頸上的大理花飾物，設計靈感則來自軒仔，「Kenneth問：『你想有套咩衫呀？』我話可唔可以唔好成日都好似盔甲、去當兵嗰啲咁樣，可唔可以好似睡衣咁，我喺屋企真係咁樣着，但唔係咁閃嘅，我係鍾意着啲好貼身或者好似呢個咁樣飄吓飄吓嘅衫。我係嗰啲Quite Elegant，即好低調嘅華麗，點知佢整咗呢件好似有4萬幾粒水晶嘅衫畀我。」引來全場大笑。

歌單大幅調整

       除了新衫，歌單亦作大幅度調整，軒仔稱曾有人問他是否「換湯不換藥」，只是轉幾首歌？但軒仔回應：「我可以話畀大家聽，今晚有6成以上嘅作品都係舊年冇唱過嘅。」包括：陳慧琳《風花雪》、楊千嬅《少女的祈禱》、吳雨霏《我本人》、陳慧嫻《夜機》、彭羚《漩渦》、蔡玲玲《細水長流》和葉德嫻《不捨也為愛》等。

分享童年往事

        另外在演唱會上，軒仔亦分享了不少過童年往事，「細個媽咪開咗一間卡拉OK，我逢星期五晚都會有自己一個嘅表演時間，陳慧嫻小姐89年嘅告別演唱會係我嘅表演節目，我可以成個演唱會由Opening唱到Ending為止，為我奠定咗好多音樂基礎，最神奇就係冇諗過今時今日我哋係屬同一間唱片公司，慧嫻姐姐就嚟開演唱會，希望大家都會多多支持，我而家爭取緊可唔可以去做嘉賓。」隨後便唱出陳慧嫻的《夜機》。之後他續說：「去到2000年我阿媽開咗間麻雀館，我阿媽專做嗰啲嘢㗎，冇賭牌咋，有賭牌佢應該會開賭場，我阿媽好鍾意玩兩手，所以我又喺麻雀館做過。」

自己跟自己玩

        由於成長環境的緣故，加上他是獨生子，他喜歡自己跟自己玩，並坦言Enjoy這種生活：「大家見到今日喺舞台上面嘅張敬軒，其實係一個好複雜嘅人，我都冇辦法去解釋。我覺得自己好似個城堡，有好多間房，每一間房都裝咗唔同嘅嘢，有啲裝開心；有啲有本小氣簿記住邊個對我唔好，我就會寫喺入面，哈哈；有啲永遠向人敞開；有啲房間鎖咗門之後連自己都唔畀入去，我哋每一個人都係一個複雜嘅結構，都係一個有好多間房嘅城堡，所以喺呢個城堡入面，究竟係一個廢墟？定係一個屬於自己先至可以悠然自得嘅遊樂場呢？其實都係我哋自己決定。」

歌迷大讚貼心

       而重現紅館Show《俏朗君》波波裝置一幕，亦是軒仔及演唱會監製莊少榮（細榮）特別為歌迷而設，當時因為疫情，除了外地歌迷未能來港睇Show，亦因為限聚令，令香港部份歌迷都未能入場，「疫情呢幾年，除咗犧牲咗我哋喺生活上嘅好多習慣，亦都令到我哋同好多朋友分隔得好遠好遠，尤其今晚在場嘅一啲朋友，喺疫情當中未能嚟香港睇我兩個非常重要嘅演唱會，就係《盛樂》同我20周年嘅演唱會，所以我諗咗好耐，我好希望藉住呢個場地，可以將一啲好難忘嘅瞬間、好多嘅想法同表演、當中嘅一啲Moment，喺今晚呈現畀大家。」演唱會後，不少歌迷及網民都十分感動，大讚軒仔貼心。

鄉音鬧人笑爆

        至於演唱會前，軒仔特別在社交媒體上溫馨提示大家「睇Show的禮儀」，軒仔表示十分滿意，不過經常喜歡互相傷害的軒仔及他的歌迷又再「互相傷害」，軒仔說：「今晚我覺得好開心，可能佢汲取咗去年嘅教訓，冇人大嗌、冇人亂講嘢……」話音未落，即有觀眾大嗌，軒仔一副生無可戀的表情：「佢係咪嗌除衫？老公？你周街嗌人老公嘅咩？你兩條友如果再係咁嗌，我真係發嬲畀你睇！」歌迷竟即起哄叫好，軒仔說：「嗱！你哋拎起電話，我錄一段畀你哋返屋企留念，你哋想睇張敬軒鬧人吖嘛，呢期好Hit呢句：『你7街瞓！』喺自己演唱會着到咁靚，用鄉音叫人你7街瞓…… 唉！」立即笑爆全場。