發佈時間：17:02 2024-10-06
快樂，源於生活上各種各樣的滿足感⋯⋯很複雜嗎？
12年前，陳奐仁推出過著作《快樂可以很簡單》，還有由他身兼曲、詞、編、監的同名歌曲，內裏其中一段是：
「有得吃 有得睡
有得大小便 有得為他人代勞
既然可遇不可求
幹嗎執着要強求」
道理顯淺，但要唱到做到，還是有點難度。
12年後，48歲的陳奐仁笑言：「快樂，其實仲簡單過想像。」
是他笑騎騎說白話？他即補充：「只要靜，身邊所有嘢都會加咗%！唔使特登多架車，或者買多隻錶。只要靜，就連瞓緊嗰張床，都會莫名其妙咁好咗5-10%。」
這種體會，陳奐仁稱：「我之前都快樂，但係一做嘢就會好忙、好趕、好急，想啲嘢做到最好。我覺得做到嘅，其他人會覺得：『你都傻嘅！』。
「我又唔係完美主義，但我咁執着，會造成其他人唔開心，呢個係因果嚟嘅，𠵱家我會盡量避免呢個情況。」
托着招牌的雙色粗框眼鏡，陳奐仁笑言：「咁樣我搵到我嘅快樂，又唔會令到人哋唔舒服，大家都Happy！但係咁，我𠵱家係50% Happy啫，因為我貪心，想再要多啲，留
番啲位。哈哈！」
你找到屬於自己的快樂了嗎？
樂派「Jetso」
即將一連兩晚舉行爵士音樂會的陳奐仁，除紀念其出道大碟《Raw Jazz》推出15周年，他還以「着數」來形容這次的開Show心情。
「『Raw Jazz Show』，即係『攞Jetso』啦！哈哈哈哈！其實係因為我同朋友飲酒，佢哋問我係咪15周年，係就搞個演唱會啦！我覺得都好喎，咁飲埋威士忌吖笨，咁就變成今次個Show。
「聽Jazz，聽到口渴可以去飲啲威士忌，睇完Show又可以飲夠先返屋企，係Jetso啦！」
今天可輕鬆派着數，全因15年前的陳奐仁抵得諗。來自新加坡的他，1997年已開始其音樂人之旅，為張學友寫了一曲〈和好不如初〉，之後又為陳奕迅、鄭秀文等寫歌，但他還有走上台前的一個夢。
「我想做Rockstar㗎！但係我唔靚仔，咁點做Rockstar？出碟，都要自己出錢，嗰時我淆底，就揀出一隻Jazz嘅碟，因為Jazz冷門，亦都唔係我擅長嘅嘢，所以如果輸都唔會好覺。點知贏咗，仲俾咁多信心我繼續出唱片，係好開心嘅。」
陳奐仁笑言，來港展開其音樂人之旅，要多謝昔日「寶麗金」的金牌監製歐丁玉。「當時我嚟香港，歐丁玉帶我去沙田，買咗兩支結他，一支係電結他，一支係電Bass（低音結他），呢兩支結他，𠵱家仲陪緊我。
「同時我仲見到學友，同佢打咗網球，係佢打我啦！仲介紹我飲罐綠色包裝、味道好似酸梅湯嘅檸檬茶。」
好奇斜棟
由踏上「樂途」，再從幕後走到台上，近年陳奐仁還涉足虛擬世界，推出NFT，還製作藝術品。進行訪問的藝廊，擺放了一個一個名為《Mui Mui妹妹》的雕塑，也是他的心血結晶。
「一Covid，我見到唔少有實力嘅音樂人，有啲仲係我嘅同輩，為咗搵食、交租，都轉咗行去賣電器、做保險。我就諗起美國有個統計，話99.9%嘅音樂人，都係交唔到租嘅，香港嘅環境就更加差。
「我不嬲都係好奇嘅傻仔，冇人做嘅，我都會想試吓。幾年前開始做NFT，跟1,000隻MV仔，賣到錢㗎喎。咁我就可以同佢哋分享，我都做到，佢哋都可以試吓。」
拆開嚟散
陳奐仁親身示範的，除了其拓闊生財技能的可能，還有把肥肉變成肌肉的決心。2017年，他為了健康而減肥，7年下來，他維持肌男身形，從未反彈。
「嗰時好肥，肥到醫生話我有脂肪肝危機，叫我一係食藥一係做運動，咁我梗係唔食藥啦！」
現場所見，他吃着多加一塊雞扒的雞扒飯，全因：「𠵱家我健康係好好嘅，每日就要食160g肉類，保持肌肉量，但係其他我都冇戒口，好抵㗎！人越老，就要食少啲，唔係戒Carbs（澱粉質），係計住卡路里咁食。」
飲食以外，他亦保持運動量。「冇以前好乾嘅時候咁癲，𠵱家我每日都散步，散8k（公里），大概10,000步。好好㗎！我唔使一次過行晒，可以拆開嚟散，分早午晚散。我睇YouTube，有專家話最理想係每日15,000至17,000步，但我唔得，行到生晒水泡。
「另外，因為我頭大到叮噹咁，就想膊頭闊番少少，所以就開始舉重。每日運動就包括散步、舉重、做引體上升，有時會踩吓單車。我俾兩年時間自己，令每邊膊頭闊多0.5cm。」
BB
愛稱，是專屬於戀人、夫婦、密友⋯⋯間的稱呼。
屬於陳奐仁與太太黃頤雅（Prima）的，是使用率極高的「BB」。
二人結婚16年，陳奐仁笑言，不論是大時大節、生日、結婚或拍拖周年紀念，他跟其BB都不慶祝。
「其實係有一年，BB帶我去東南亞度假，嗰時係我生日前後嘅時間（1月），我以為係佢幫我慶祝，點知佢話：『咦，乜原來係你生日咩？』。
「咁就好嘞，如果我之後唔記得咗佢生日，都唔會怪我啦！久而久之，我哋都唔Care咩儀式感，開心嘅，就日日都係慶祝緊！」
雖然陳奐仁由肥仔搖身變成「健美先生」已有7年，他稱：「我老婆都試過話，我肥嗰時可愛啲，但睇番啲相，佢又會話我當時好似肥咗啲。
「到我操Fit咗，佢就鍾意一隻手攬住我，因為攬得晒吖嘛；最唔鍾意嘅，係我操到成身痛，痛到瞓唔到，戒口又會搞到脾氣臭。𠵱家就梗係冇呢啲問題啦。」
夫妻二人早已決定，不打算生B，「我哋助養咗小朋友，呢個世界，太多小朋友冇屋企嘞。」
二人早有「BB」，並非愛稱那麼表面。
