發佈時間：12:55 2024-09-04
《法證先鋒VI：倖存者的救贖》由鍾澍佳（佳導）擔任總監製、黃國輝擔任監製，主要演員有黃宗澤、袁偉豪、蔡潔、蔣祖曼、傅嘉莉、戴祖儀、關楚耀、林正峰、王敏奕和吳業坤等。
昨晚(9月4日)一集新單元個案「針筒殺人事件」，講述銷售員文樂德（葉泓聲飾）被發現倒斃於後巷，半裸的上身更甚有儀式感地插了大量針筒，死得矚目。正當Dr. Fan（蔡潔飾）及井Sir等為搜尋真兇苦惱不已之時，冼陽（關楚耀飾）向Dr. Fan投訴其介紹給自己的護士阿瑩（倪嘉雯Carmen飾）行徑古怪，似是涉及「針筒殺人事件」。最終東窗事發的阿瑩逃跑至天台、並危站於高達17層樓的大廈天台邊緣與Dr. Fan對峙，備受嚴重濕疹問題困擾長達二十多年的阿瑩，全程含淚激動申訴多年來被頑疾纏身的痛苦，除了痕癢及疼痛難當，朋友及途人的歧視及疏離亦令阿瑩心痛不已，從而對家人及社會充滿怨恨，更企圖自盡結束痛苦一生…
倪嘉雯Carmen完全代入濕疹病人角色
昨晚阿瑩危站天台場口其實齋看已十分緊張，倪嘉雯Carmen坦言拍攝時雖然做足安全措施，但一眾幕後同事也一再戥她牙煙：「因為我真係企喺天台外面度拍，雖然我有吊威也，但因為嗰度風好大，工作人員都驚我會企唔穩。我好記得拍嗰陣我一路講一路向後褪，突然間我見到有工作人員係咁同我揮手，原來佢哋驚我越行越後會真係跌咗落去，嚇死佢哋。」
本身並沒有畏高的倪嘉雯Carmen，坦言很開心能於實景天台進行拍攝：「咁樣好幫到我投入個角色，我情願真做，好過喺綠幕度做，可能我比較新，我仲係好需要個環境帶到個感覺畀我。」談到有指她天台一幕演得很好，倪嘉雯Carmen除謙稱自己尚有很多改善空間，並感激監製及導演的貼心安排：「嗰場本來係wide shot，但因為我當時一講對白已經開始自憐，導演同監製見到即刻好快再緊接拍tight shot，好多謝佢哋咁貼心。嗰吓我真係完全代入咗個角色，我邊講對白邊覺得好痛心同絕望。」
大讚「濕疹」妝化得好
除了天台這個場景，倪嘉雯Carmen又感激劇組認真的「濕疹」化妝及近乎密不透風的服裝造型，亦讓她更易代入角色的苦況：「呢個濕疹妝其實要化好幾個小時，因為頸、心口、背同手臂全部都化。我好記得自己一化完妝照鏡都覺得好心噏，我幻想到一個廿幾歲嘅女仔、一個仲應該喺貪靚年紀嘅女仔，見到自己咁會有幾咁痛。服裝上，就算我著護士服，入面都會有件樽領打底嚟到遮濕疹，同人約會時又要摟住頸巾遮，呢啲都好幫到我代入角色。」
談到網民大讚其是次演出與過往比較大有突破，Carmen坦言除了是首度演這類型角色，角色也與其自身性格相差很遠：「我本身係一個嘻嘻哈哈嘅人，而之前啲角色都會偏向做開心嘅女仔，今次呢個角色真係完全相反。我好記得我拍呢套劇時，我真係幾乎冇乜笑過，頂籠同心儀男仔食飯嘅戲會笑吓，但都要笑得好內斂。」
倪嘉雯2020年加入TVB
倪嘉雯Carmen於2020年加入TVB，參與過多部劇集演出，包括於《換命真相》、《雙生陌生人》及《十八年後的終極告白2.0》飾演年青版「楊紫山」、「利梓楹」及「沈越」等等，又曾擔任兒童節目《Think Big天地》、《Hands Up》主持，直至《新聞女王》飾演記者Amber一角，有幸與視后佘詩曼（阿佘）同框拍劇。
