直擊76歲秦煌護老院生活  內地女友已成過去式
直擊76歲秦煌護老院生活 內地女友已成過去式
更新時間:10:53 2024-09-04
發佈時間:10:53 2024-09-04

今年3月76歲的秦煌在青衣酒店房跌倒送院,之後安排入住護老院。秦煌形容在護老院的3個月生活因禍得福,事關獲社福機構每月給予$11,000住院生活津貼,另有$4,000綜援,三餐不愁,唔使急於抱病開工「撲水」,坦言安樂哂。

日前《頭條日報》記者於晚飯時段探望秦煌,就見秦煌雙腳腫晒,但幸好胃口唔錯,掃清時菜肉片飯,心情本來大好的他,被問到內地情人Mary時即一臉無奈:「過去式喇。」

秦煌全天候着尿片 職員隔日幫他沖涼

近300磅的秦煌送院後發現有貧血、營養不良,而且多處機能循環唔好導致雙腳浮腫,目前每周被安排去醫院做物理治療。另外,12年前在劇集《法網狙擊》跟他結緣的陳煒,亦慷慨出錢安排按摩師每周上門。

秦煌要全天候着尿片,隔日會有職員幫他沖涼,由於要方便坐輪椅的院友上落床,所以住在只得布簾分隔的大房,不過每朝起身後,他會被推往所屬的私人空間開飯及睇電視。煌哥稱已習慣老人院生活,對於院舍膳食質素及照顧安排,亦好滿意。

記者探望煌哥當日正值晚飯時間,他掃清時菜肉片飯,食得津津有味並滿足地說:「入院初期戒飯,故落咗60磅,肚腩都細埋,𠵱家唔敢太瘦會食返一碗細飯,有返飯氣面色都好啲。」

不過,他稱就算瘦咗都要着10XL褲頭。講到身體狀況,煌哥形容都ok:「右腳好有力,左腳就差咗少少,可以扶住企起身再扶住行兩步,但我好驚,冇乜信心行得耐。」記者見到着咗鞋的煌哥,雙腳腫到似「裹蒸糭」,右邊小腿又包咗紗布,他解釋是久久未癒的小傷口:「職員好緊張,會幫我包好傷口。」

幫大女還債 賣3層樓耗盡300萬現金

說到經濟狀況,煌哥獲社福機構每月給予$11000住院生活津貼,另有$4000綜援,每月「出糧」日子就最興奮,會叫朋友推他落街撳錢及買零食:「呢度5點晚飯,要買定杯麵做宵夜。」

煌哥坦言得到社會保障,總算唔愁生活:「以前我唔識㗎,係跌倒後社工幫我申請,所以𠵱家唔急於返出嚟做嘢,如果啲老友唔介意我坐住輪椅去開工,只能行得嗰兩步,咁我都唔介意畀人睇下我個樣,唔好唔記得我。」他透露跟《愛回家之開心速遞》劇組好老友,「佢哋曾提出如果我狀態好又行得,叫我去玩下。」

提到幫已失去聯絡的大女還債,搞到要套現3層樓及耗盡300萬現金,煌哥後悔至今,「因為冇問原因,還累到自己簽落60萬咭數做生活費。」周身債無力償還,他亦有破產的心理準備:「銀行有追我數㗎,但追追下都唔追,追到攰冇心機啦!我都還唔起…不過,我都70幾歲唔介意破產,反正有食有住仲有零用錢,如果銀行強制我破產仲可以慳返萬幾蚊律師費。」一無所有的煌哥唔覺得失敗:「唔係失敗,只不過經歷過沙士、疫情等,係環境所造成,再加上被親人拖累。哈!係命運問題。」

同Mary已成過去式

秦煌對於周身債無力償還一事,表現樂觀,坦言已經有了心理準備,但被問到跟了他20幾年,比他年輕30歲的內地情人Mary,就一臉無奈:「叫佢落嚟探我,包佢食住要畀成皮嘢,佢唔捨得畀,我又唔想佢畀…」煌哥有感而發:「已經係過去嘅事,我要照顧自己先,(同Mary已成過去式?)可以咁講,但我冇怪佢,係我冇搵佢。」

他指當年20歲的Mary幫他煮飯做家務,覺得做完就係佢嘅人:「直至佢36歲,話『女人責任一定要生一個』,當時係我話唔可以同佢生,建議佢搵人生,生完由我養,兩母女搬返嚟深圳同我一齊住。」

煌哥直言唔介意Mary跟他之後,還跟其他男人有性關係:「咁佢返嚟後同我一齊住都冇走過,從一而終,如果Mary因為想生仔,我唔肯配合要求分手,我諗做人唔應該咁。」煌哥早年已送咗湖南樓畀Mary兩母女,目前女方有車有樓,煌哥答得黯然,「久不久會諗起,但俱往矣。」