無限與永恆，談何容易？

偏偏於6年前，Dear Jane已以此作專輯名稱，化不可能為可能。

成軍19年，4名成員Howie（翁厚樑）、Jackal（伍漢邦）、Nice（黎俊華）及Tim（黃天翱），也由20出頭的少年，成了3、4字頭的中年。

也許，智慧會跟年齡成正比，而就Dear Jane而言，考量必定多了。

靈魂主音Tim表示：「後生啲嘅時候，嗰種衝勁、嗰種Passion，係可以不理一切，盲舂舂就『衝呀！』咁樣做嘅。

「𠵱家大家一齊成長咗咁多年之後，我覺得大家都好清楚自己嘅位置，而會好有意思咁去做每一件事。我哋每一個Decision、每一首歌、每一場Show，都係咁。」

結他手Howie就稱：「20年前同𠵱家最大嘅分別係，以前多好多時間去無聊，我諗每個人都係咁，𠵱家大個仔，就想做完嘢返屋企，唔通仲攬住幾條佬咩？（一指眾隊友）」

隨即引起哄堂大笑，而笑聲中，隊中最年輕（37歲）的鼓手Nice坦言：「心態上係冇變嘅，我哋都係做自己鍾意嘅嘢，都係玩嘅心態，20年都仲鍾意、仲Enjoy呢樣嘢，所以感覺係一樣嘅。」

低音結他手Jackal大表贊同：「到𠵱家我哋走過咁多日子，都仲喺度一齊玩，仲要覺得係開心㗎喎。我覺得係幾得意嘅，好難Keep一段關係可以維持咁長時間，而我係唔覺（時間流逝）嘅。」

無限好玩，是永恆的基礎。遊戲人生，別太認真。

相關文章 : Dear Jane慶祝成軍20週年開騷 | 鄭秀文特別點唱Dear Jane《到底發生過什麼事》

Ｈ：Howie  Ｊ：Jackal  Ｎ：Nice  Ｔ：Tim

不許你注定一人

論香港主流樂隊，Dear Jane定必屬現世代的代表，時日如飛，明年已是4人成軍的20周年。

猶記得樂隊初出道的主打〈男兒當打交〉，問他們是否現實寫照時，Howie即耍手。「我哋唔係嗰類型嘅樂隊嚟嘅，唔會發洩喺隊友身上！」

經過這些年，Dear Jane仍是現在進行式，4人分享各種珍貴回憶，令團隊更親密。

Ｔ：    好多難忘事㗎！我記得我哋第一場大型啲嘅演唱會，喺Star Hall搞嘅，叫《Dear Jane 不許你註定一人Live》（2015年）。喺宣傳嘅時候，係有少少吃力嘅，賣飛各樣，感覺上有好多難關要衝破。

    但係到做Show嘅時候，又真係坐滿晒，喺我哋唱〈不許你註定一人〉嘅時候，全場都跟住我哋一齊唱晒。第一次有嗰種有一股力量同希望嘅感覺。我好記得我跳咗落台，然後唔識點樣跑番上台，哈哈！

Ｎ：    好多深刻嘅畫面，我𠵱家記得嘅係有場Show，玩幾首歌㗎啫，完Show之後有對情侶行過嚟，個男仔好高大嘅，但喊晒咁同我講：「多謝你哋首歌，記錄咗我同我女朋友關係嘅開始！」

    我冇諗過一個咁大份嘅男仔，會喊晒口咁多謝我哋；同埋Feel到我哋嘅歌，原來真係記錄咗一啲人嘅故事。後尾都有其他歌迷同我哋講，多謝我哋嘅歌陪住佢哋。

經過一些秋與冬

除了陪伴別人成長，Dear Jane於這19個年頭，也見證了隊員們的成長。

Ｈ：    我哋轉唱片公司嘅時候（2010年），冇出歌一年幾，第一場Show出番嚟，喺馬場度唱，好多人去睇馬，但去睇我哋嘅，得番3、4個人。嗰次有一種由頭嚟過嘅感覺，嗰刻係難嘅。

    到𠵱家，每一次出歌，我都覺得要盡我哋嘅能力，𠼮人哋去鍾意我哋，我唔會Assume有Build-in嘅Audience。

Ｊ：    我哋幾個，未讀完書就已經認識，再夾呢隊Band，經歷咗咁多年，到阿Tim結婚（2014年），再到舊年我結婚嗰陣時，佢拖埋個女嚟⋯⋯嘩！原來我哋已經經歷咗咁多時間。

    睇番轉頭先發現，我哋做過有咁多咁多（數手指）嘅嘢，所以我覺得呢隊Band都見證咗我哋各自嘅一啲里程碑。

Ｔ：    相比以前嘅盲舂舂，𠵱家我哋都仲有嗰種衝嘅Energy，但係就好清晰咁睇住衝緊去邊條路。

到底發生過甚麼事

各自成了人夫、人父，即使未成家也已有另一半，惟Dear Jane的活躍度未減，只是換了模式。

Ｊ：    首先老婆唔會吟，我老婆好好嘅！（豎起拇指）

Ｈ：    但係以前又真係會喺Band房度⋯⋯

Ｔ：    坐天光囉。

Ｊ：    試過要完成隻唱片，阿Tim同Howie成個禮拜⋯⋯

Ｈ：    唔係呀！兩個禮拜！

Ｔ：    係咩？哈哈！

Ｊ：    我返到Band房，有個鬍鬚佬喺度，原來係阿Tim。

東：    冇沖涼？

Ｔ：    兩、三次咋！

Ｈ：    係呀！每3、4日返屋企沖一次涼。

Ｔ：    即係沖完涼，我返到Band房就聞到嗰陣味，有陣⋯⋯吖！哈哈！

Ｊ：    因為我哋搵外國人幫我哋做Mixing，唔可以遲。

Ｈ：    嗰時係要燒落碟，再速遞俾佢，冇碟就做唔到。𠵱家就就咁Send file得啦！

Ｔ：    𠵱家有時我第二朝要車小朋友返學，已經唔夜得，亦唔會唔返屋企，多咗好多責任承擔，但at the same time，我覺得幾好玩嘅。例如一日我知道自己只係得5個鐘頭做自己嘢，嗰5個鐘頭係可以好Efficient㗎喎。

    好似7月嘅時候，我老婆帶咗兩個小朋友過加拿大，我自己一個人，原來我想做嘅嘢，係做唔到，因為冇咗規律。

Ｈ：    你慣咗。

Ｔ：    慣咗有Deadline、每樣嘢都有Timeframe（限時），但係嗰個個冇吖嘛！年輕嘅時候，可以Keep住Hea，但年輕嘅Hea，其實都做緊一啲嘢，但係大個咗之後，仲打機咩？

Ｈ：    雖然好想，買咗好多Game，但係連個包裝都冇搣過。

Ｔ：    我覺得大個咗，就要有番少少Order囉。

20-1年後的真心話

4個麻甩，相對20-1年，吹水容易，但要互訴心聲，大概少之又少。

機會嚟嘞！着Dear Jane跟身邊隊友訴心聲，坐最右的Howie看着Tim⋯⋯

Ｈ：    我隨心呀吓，個腦諗到乜就乜！你唔好食咁多咖喱！

Ｔ：    點解呀？

Ｈ：    好似好熱氣囉。

Ｊ：    我仲以為你話佢有口氣⋯⋯（全場大笑）

Ｈ：    我哋4個都鍾意食唔同嘅嘢，好難搵到一間餐廳係大家都Agree嘅，但無論邊間，佢都係嗌咖喱嘅。

Ｔ：    一個禮拜一兩餐，我好鍾意！印度咖喱正！Howie都鍾意。

到Tim向Nice「傾訴」，前者思考之際⋯⋯

Ｎ：    唔好打邊爐？

Ｔ：    唔好蒲咁夜！（Howie與Jackal大笑）同埋我希望你可以抽多啲時間，同我飲酒、傾偈。𠵱家飲嘢嘅時間，永遠都係10點打後，其實即係冇。

Ｎ：    喺Band房夾嘢都有飲。

Ｔ：    我又唔飲得喎，飲咗又唱唔到！睇住你哋飲⋯⋯
Nice報以同情的眼光後，轉向Jackal。

Ｎ：    要健康！你成日都話腰痠骨痛吖嘛；做吓運動，增強背部肌肉，孭Bass都唔覺痛！

Ｊ：    跟你去做Gym囉，你咁大隻。

Ｈ：    主要係Pat Pat呀！（全場大笑）上台通常係鼓手行先，佢個Pat Pat真係好圓好挺！

Ｎ：    多謝大家！夾咗20年Band，原來大家係咁欣賞我嘅臀部⋯⋯

Ｔ：    你睇我哋幾了解自己嘅隊員吖！

Ｊ：    好有愛呀！（看着Howie）你放多啲假啦！通常你放完假就諗到啲新嘢，等我哋再玩多啲！同埋你放假，我哋都可以放假！

「大會」以掌聲作結，這樣度過20-1年，不盡完美，但So far so good。