發佈時間：22:50 2024-08-16
2004年，藍奕邦憑首張專輯《不要人見人愛》正式入行，說他是香港樂壇的中堅份子，確不為過，一人分飾曲詞編監唱五職。去年底推出歌曲《漂漂亮亮地死去活來》的藍奕邦，現以全新90年代house曲風《男孩子！》為踏入20周年揭開音樂序章！
《男孩子！》是藍奕邦於《晚晚禮拜六》及《青春於舞池流逝》後，相隔12年後再度製作的舞曲，藍奕邦說：「我覺得自己仲未做到首放落舞池嘅快歌，我想做一首Gay Disco Anthem，係時候嚟個update。」藍奕邦指昔日的社會風氣與現時不同，唱片公司對這類歌曲亦有擔憂，所以創作《晚》及《青》的時候的確要「勒住勒住」：「嗰段時間要比較曖昧或者隱晦少少，經過咁多年，從我嘅音樂到我社交媒體，其實已經好清晰。嚟到2024年可以開放啲、去盡啲去做呢類型嘅嘢，做盡佢。所以呢首歌係送畀所有又溫柔又風流嘅男孩子。」
首次在外地製作歌曲
藍奕邦的自在坦然，正如《男孩子！》的歌詞：「親愛的 沒有檢點的需要」、「點解仲偷偷摸摸」，無需標籤或隱藏，大大方方成為最真實又多變的自己：可以沉鬱、浪漫、型格，也可妖冶風流。
《男孩子！》的製作班底，是曾和韓國女團2NE1成員李彩琳CL、美國男歌手John Legend及Neyo等合作的洛杉磯音樂人Jerry Lang II，夥拍謝國維及藍奕邦聯合監製，藍奕邦說：「年頭我返咗溫哥華休息，忽發奇想叫住喺L.A.（洛杉磯）嘅堂妹，介紹啲相熟嘅新晉監製畀我識，佢因工作關係認識好多當地的監製同音樂人，反正廿年來都未過自己出埠造歌，就係咁，我過咗去L.A.同Jerry困獸鬥咗兩日寫同編好《男孩子！》。」
與小鮮肉風流台北
藍奕邦為《男孩子！》，除了解鎖「首次出埠造歌」，更是首次出埠拍攝MV：「我入行20年，原來係冇出埠拍過MV嘅，今次係小弟第一次喺香港以外地方拍MV。導演阿爛覺得我哋要拍嘅嘢，喺香港好難實行到，MV嘅角色亦都想有啲新鮮感，咁啱喺台北有在台港人幫到手，同埋我想講台灣係熱過香港！大家以為香港34度好辛苦，Sorry，台灣係35、6度，拍兩日唔使郁企喺度都標緊汗，我仲有好多江湖味嘅服裝，所以真係寓工作於減肥。」
MV的風格充滿江湖電影的味道，並以黑白調色，身為老大的藍奕邦帶同鍾岳軒、陳威銘、劉大澄及阿元四個「仔仔」到處去闖蕩，於台北街頭夾公仔、食冰、兜風。「好似當年我拍電影《飛砂風中轉》咁，係江湖大佬，做嘢嗰陣好狠又好風流但又可以好溫柔，我覺得呢個感覺好正。」
拒食老本 驚喜預告
出道20周年，藍奕邦笑言為自己設立新的課題：「我的歌單仲有咩歌未有呢？」，以此為創作核心。「呢首歌就係一個kick-off，想話畀大家知藍奕邦唔係食老本嘅，仲有新作品畀大家聽到，去到年底應該會有啲得意嘢發生，跟開藍奕邦嘅Fans應該會好開心嘅，不過就賣個關子先。希望大家聽《男孩子！》會開心啦，希望大家鍾意個MV，亦都會鍾意MV入面嘅四位男孩子。」
