發佈時間：13:05 2024-07-04
47歲「行姐」陳彥行多年來自稱單身，日前突然被爆秘密生女，囡囡3歲大就讀名牌幼稚園，但生父成謎。
昨午行姐終於「上水」，在社交網出po承認產女，強調「3年前就應該公佈這個喜訊。」並交代另一半係「沒特別，簡單低調嘅圈外人」。今日據《頭條日報》獨家報導指從行姐圈中閨密中收到絕密獨家消息，得知行姐女兒爸爸的真正身份，原來是黃子華的司機。
陳彥行積極參與親子活動
最近陳彥行現身幼稚園接3歲女兒放學，並跟家長們打成一片，才被踼爆早已秘密生女，囡囡啱啱從小組班畢業。原來近年行姐淡出幕前，全因要親力親為照顧獨生女，亦唔怕生女消息外傳不時現身親子活動，在校內非常高調。
閨密爆料陳媽媽「助養」不愁生活
「潛水」多時的行姐只跟少數圈中閨密保持聯絡，聚會時難免會洩密，開心分享近況，據知情者說：「行姐得一粒女係怪獸家長，反正有陳媽媽『助養』唔愁生活，4年前索性唔撈，仲安排個女入讀每年學費近11萬港幣嘅名牌幼稚園，將最好資源畀晒寶貝女。」
老公係黃子華司機
閨密更大讚行姐在圈中浸淫多年但唔貪慕虛榮，亦唔介意另一半冇錢冇地位，愛情至上，最緊要自己鍾意：「佢除咗緊張個女，更加保護另一半，平時喺朋友面前畀足面，唔多提男方係職業司機，唔想影響到老公自尊心，尤其唔想俾人知道佢係黃子華司機，費事麻煩。」閨密亦對行姐「老公」讚不絕口，「佢好錫行姐㗎，有時一齊出嚟飯局，『背後男人』唔多出聲，係咁斟茶遞水，早晚管接管送做到足，『兩公婆』幾SWEET呀，睇住佢哋一齊都咁多年啦，根本就冇分開過，只係壓力太大轉做地下情啫。」
陳彥行系出名門
行姐系出名門，係民國初年的雲南革命黨軍官黃毓英嘅曾外孫女，陳媽媽退休前經營飲食生意多年，賺到多桶金。行姐亦曾入讀加拿大著名的加利福尼亞大學，學成後才加入TVB第7期藝員訓練班。
閨密又指：「陳媽媽本身有錢有面只得兩粒女(行姐係孻女)，而且行姐有學歷又唔係冇條件，梗係想個女嫁得好啦，故陳媽媽多年來多次反對行姐跟司機男友交往，無數咁多次好言相勸叫行姐諗清楚。」據知行姐終極戀愛腦，被男方嘅愛打動而逆母意，仲做高齡產婦，停經前趕住『生米煮成熟飯』，「老人家見到孫女同行姐如影印一樣咁得意，『女婿』又算勤勤力力，好錫家人，唔會『沙沙滾』，唯有被迫接受。」據可靠消息，前年行姐挺身幫媽媽追返銀行保險巨款，陳媽媽去年就送上逾千萬千呎北角豪宅單位畀個女一家安居樂業，行姐更搵埋風水師睇風水，務求家宅平安，阿女健康成長。
