人生路風景處處，途上不一定是明媚風光，有時經歷過滿途荊棘，更能細味層次豐富的甜美。
41歲的梁靖琪（Toby），自小受監製爸爸梁家樹及TVB前高層媽媽蕭笑鳴的耳濡目染，以當演員為夢想，入行20年，一心朝着夢想進發，惟追夢過程，並非一片坦途。
「我想做一個可以令人笑、令人流淚，牽動到人情緒嘅演員，鍾意演戲，但原來自己係做得唔好㗎喎。唔同嘅批評，話我醜樣、演技差、冇爸爸媽媽就冇今日⋯⋯好Hurt！
「但係去到最後，我都唔想放棄呀！我真係鍾意吖嘛！𠵱家有咗小朋友之後，就更加唔應該放棄，我唔想啲仔問我『Mummy, what’s your dream?』嘅時候，我只可以答佢哋『I didn’t follow my dream.』。」
猛烈抨擊，到梁靖琪於上周播畢的劇集《家族榮耀之繼承者》中，有深度地演繹了富三代「Nana」，轉化成擊節讚賞，令她成了兩名分別4歲半及兩歲的兒子的真實教材。
「就算好多批評，但只要唔放棄就好。𠵱家啲仔有時都話做唔到呢個，做唔到嗰個，我話：『If you think you can, you can!』。原來我要經過嗰個階段，先可以教導到佢哋呢樣嘢。」
演員、人妻，加上媽媽的角色，梁靖琪坦言：「隨住年紀增長，我嘅見識、經歷都多咗，對演戲一定有幫助，但係我唔係天生就係識演戲嘅人，所以要更加努力。
「媽媽嘅角色，就係要Keep住做嘅，我想陪多啲佢哋、培育佢哋、教導佢哋，唔係要佢哋讀書好叻，但係我都想佢哋做一個好嘅人。」
夢想可以不止一個，為夢想而戰的堅持，是無負此生不二法門。

從無出路

劇集上周播畢，但梁靖琪早於結局前一周便「領便當」，更有網友表示不捨，惟當事人坦言，原本並無信心演繹角色，若無導演鼓勵，她未必接受「Nana」這個挑戰。
「呢個角色俾我好大發揮，𠵱家網友反應咁好，我真係好感謝佢哋，同我打咗一支好大好大嘅強心針！20年嘞！我終於都有人認同！
「但係套劇初初播嘅時候，都係有好多批評嘅，所以我都唔敢睇啲評論，到有人Send啲新聞俾我，我又唔係好識睇中文，就問我老公，佢講完俾我聽之後，我先敢慢慢睇番啲評論。」
說穿了，是入行以來成長於負評中的梁靖琪，選擇了停止閱讀影響自己情緒的批評。「好灰心！好唔開心！啲批評係影響到我嘅情緒，所以去到某一刻，我就諗，不如試吓第二啲嘢，所以我開咗婚紗公司，又去做飲食，睇吓搵唔搵到一條出路。」
當時受傷的，又豈上被批評的梁靖琪？「到我做咗人媽媽之後先明白，點解以前我爸爸媽媽，會叫我唔好再做戲，原來佢哋係心痛！
「即係點會有父母，想長期聽到人哋批評自己個女呢？佢哋俾我Follow my dream，但背後佢哋都唔易受囉，所以我真係好多謝佢哋！

「魔女」條件

入行20年，梁靖琪於事業上獲得遲來的認同，但她於圈中獲得的珍貴友誼，則從來沒有缺席。
「當初同佘詩曼、文頌嫻、周家蔚、湯盈盈、鍾麗淇、姚樂怡，因為飲嘢變熟，仲做埋好朋友。曾志偉叫我哋『七魔女』，我哋話咁核突嘅，就話係七姊妹囉。」
7人性格各異，但多年來相處融洽，猶如老夫老妻般，會各自補位，「我同家蔚係行動派，佢哋要乜嘢，我哋會幫你做，只要有邊個有需要，我一定會喺度！鍾麗淇就係『Doctor Margaret』，有咩頭暈身㷫，搵佢就一定解決到。
「湯盈盈係開心派；文頌嫻就好多道理講嘅；姚樂怡好多時都慢幾拍，傾偈會跟唔到㗎。」
至於佘詩曼，梁靖琪笑言，有任何難開口的事，她也成為了「代言人」，「總之啲小事搵佢出動就啱㗎嘞，有時有人嬲咗，我哋都會搵阿佘，可能PM佢問佢：『喂，有冇睇？有事！快啲聽番個chat先！』咁佢就會做嘢。
「不過，我哋有一個Mommy’s group，係冇加阿佘嘅，因為我哋驚煩到佢，小朋友讀咩、着咩，感冒去邊度睇醫生，嗰啲無聊嘢，係咁叮佢都唔好啦！」

保持新鮮 

最近梁靖琪與好姊妹們出遊泰國，湊仔的任務，周末就由老公施雋賢（Jonathan）頂上，「我先生好好㗎，盡量禮拜六、日都唔會俾自己個Schedule排滿，一定係陪小朋友。禮拜六要踢波、玩、我哋嘅Family time；禮拜日就去教會、同我老爺奶奶飲茶，飲完茶返屋企，Get ready就去我媽咪或者我家姐度食飯。
「呢個就係我哋嘅必定節目，好攰㗎，但係it’s worth it！令佢哋明白屋企嘅重要性。」
今天這個4口之家的起點，是梁靖琪與老公於5年前成婚，即將慶祝結婚5周年的二人，仍然有專屬對方的時間。
「Date night一定要有嘅，通常係返屋企陪啲仔之前，我哋去睇場戲，再飲杯嘢傾吓偈。我老公好簡單㗎，有時啱啱起身，佢一句：『You are so beautiful！』連我自己都忍唔住笑話佢咁都講得出，哈哈！
「我哋好小嘅嘢都會讚對方，所以好小嘅嘢都可以令對方好開心。佢好識𠱁我，會時不時寫啲咭送俾我，我冇佢送得咁密，佢就會提我好耐冇寫咭俾佢。」
同一屋簷下，難免會有拗撬，但她笑言：「我唔識嬲得佢耐㗎！佢會有辦法令我喺瞓覺之前就唔嬲㗎嘞，而且我哋都唔記仇，所以Keep到一個好好嘅節奏。」

投資涉及風險

投資涉及風險，相信此6個大字，閣下已耳熟能詳。
現時的梁靖琪，對分別4歲半與兩歲的兒子，「投資」的心力，更不可以金錢衡量。「我擺太多時間喺屋企，接送、煮飯、陪瞓都係我，所以我Daily都係唔夠瞓，或者係Broken sleep（斷續睡眠），係好攰㗎，但我又好開心。」
即使家中有兩名姐姐侍候，梁靖琪也只需要她們幫忙執拾。「我老公都話我做乜咁辛苦，but I enjoy！好似演戲咁，我冇得演戲，咪煮飯囉！聽到一句『Umm..mummy, it’s so yummy！』，我就好開心㗎嘞！』
兒子必Buy的粟米肉粒飯，是她不望回報的「投資」項目之一；問她可會博多鋪大細，追一名女兒，她即閉上雙眼，「唔好提呢啲『傷心事』（掩面），我爹哋成日話好嘈。但係真係博唔過！我家姐3個仔，佢就係俾人𠱁咗，話第2個仔好似女，叫佢生第3個，然後都係仔⋯⋯
「個個𠵱家話Rian（兩歲細仔）似女、好靚，阿佘都叫我生，我講笑話，生咗都係仔就俾咗佢！哈哈！我唔想試嘞，雖然我不知幾恨有個女，但我諗我哋係冇福份有個女嘅。」
50/50這東西，有時比證券價格更為波動，梁靖琪選擇以靜制動，隨遇而安，才是高手。