發佈時間：11:02 2024-05-31
人生五味雜陳，論最能讓人成長的，非「苦」莫屬。
「只係透過愛情，我就上咗一堂哲學課。」35歲的陳慧敏如是說。
「每一次拍拖，我都係『一秒沉船』，冇思考過就完全投入，到有問題嘅時候，就只係識得逃避。
「我發現呢一個面向嘅自己，全因收到林夕為我嘅歌〈拯救我自己〉嘅歌詞，內容同我10年前嘅歌〈自救〉好相似，都係拯救懸崖邊嘅自己。」
似曾相識，因為人類總會重複犯錯，5年前因獨遊而遇上的土耳其籍男友，「失戀令我思考，自己係咪唔識談戀愛；幸運嘅係，亦令我有所覺醒，而改變係源於覺醒，俾我明白，要做一個唔被自己討厭嘅自己。」
覺今是而昨非，已成一種智慧。「之前我會覺得自己係受害者，後來就發覺，一切可能係出於自願，願意俾對方褒貶、願意為對方改變。以為自己係愛對方，其實係冇咗自己。而認識自己，係一世嘅課題。」
陳慧敏選擇尋回自我，讓人生的苦澀，轉化為成長的養份。
逆向思維
自我探索，是人人必經的階段，陳慧敏早前一連4晚舉行的《「趁我們還有__ 」陳慧敏個人音樂會2024》，就是希望樂迷，跟自己一同透過音樂會，去尋找各人心中的答案。
「我發覺近年大家都唔容易過，疫情、經濟、戰爭⋯⋯大家都會面對各種各樣嘅失去，連想表達一啲嘢，都會懷疑繼而卻步！當好多人談論有乜可以做呢？咁不如反轉去諗仲有啲乜嘢啦！於是我就諗，音樂會嘅主題係一條填充題，同所有人一齊去探索。」
相隔7年再上舞台開音樂會，陳慧敏以歌聲療癒樂迷心靈，同時療癒自己，也因而真情流露喊過不停。「今次我由一個人喺台上面，到邀請好朋友樂隊The Hertz做音樂總監，佢哋好有想法，就好似我想以一個團體嘅方式，去成就一件事咁。」
由於音樂會是其個人工作室成立後首次搞騷，陳慧敏覺得吃力的同時，她亦視為學習機會，「大小事都經我，連贊助都係自己傾，我都有少少意外會咁吃力，有啲嘢真係做唔嚟，我都要交俾人。呢個係最大嘅挑戰！以往我好鍾意自己解決問題，點樣令到大家互相配合，係好值得學習！」
不安全感
要從根本改變自己，談何容易？陳慧敏就精挑適合自己的方法，從心出發。
「有一段時間，我好專心咁讀過佛學，了解生命嘅結構、宇宙嘅結構，仲有同呢個世界嘅關係。
「我仲會聽住《道德經》瞓覺，成本書得500幾個古文字，但係已經包含咗宇宙嘅真理，我好想了解當中嘅奧妙。」
參透大道理需時，陳慧敏自言喜愛思考，除了透過宗教，還會從實踐作自我了解。「有啲人話我，玩social media唔夠叻，又冇拍勁片又唔係勁直播。有段時期我會Push自己去做，但每次出post，我都會好不安，因為我唔似啲專業KOL咁識擺pose。
「慢慢我就發現，好多時唔需要Push自己，咁會影響自己嘅心理健康狀態。於是我會去行書店，或者去旅行，搵自在嘅方法去了解自己，而自在，就係安心嘅歸處。」
海中木船
內心安定，但陳慧敏正式出道這11年來，不斷遊走港澳兩地，來自澳門的她，事業基地卻在香港，飄泊的生活，對她而言反而是安全感的所在。
「家對我嚟講，係一份歸屬感，有時咁樣先令我有安全感、歸屬感。咁多年嚟，我搭船往返香港同澳門，所以船對我嚟講，某程度上係有一種深層意義，我成日覺得，自己係喺船上面生活。
「所以3年前我自己開公司，都會改名『木船』；決定對夢想承諾，寫歌俾自己，首歌都叫〈航道〉，代表同船嘅緣份。」
這艘「木船」，目的地仍是未知，但飄揚過海多年，航道也經歷多次改變。「一開頭好容易，我一個素人參加歌唱比賽，好多關於我嘅討論，甚至好多輿論，坦白講，係好容易迷失嘅，因為我係一個好需要聽人哋意見嘅人。有時試太多嘢，好似做主持人、拍旅遊節目，都會分散咗我對創作嘅注意力。
「到中段開始，我會有好多目標，去紅館開演唱會、做世界巡迴⋯⋯都係好空泛嘅。直至近年，我先至返回自己嘅初心，想寫歌、唱歌，變得更加實際。」
