發佈時間：15:19 2024-05-24
日前，霍汶希（Mani）及衛詩雅（Michelle）受邀為勵進教育中心舉辦的「青心直說」第二十三講—香港的影藝事業任嘉賓分享。
Mani從教女開始，她坦言現代的年輕都有自己的想法，不能直接幫他選擇，「你其實係引導佢，但我係心目中有我自己個想法，我哋要用自己嘅方法，引導佢揀我想揀嘅嘢。」她又大爆經常受到女兒挑戰，「我有陣時講嘢，佢會：『媽咪呀，你有冇印證過㗎 ？』哈哈，佢不嬲都挑戰我㗎 ！太多挑戰我嘅例子啦！唉！講講吓我啲火又嚟咗！譬如有一個人送一份禮物俾佢，佢真係即刻上網就check到，呢個係咩型號、幾多錢？唉！真係激死。」
從來都在學習，她憶述多年前由經理人部門被調到宣傳部，「嗰陣我唔係啱啱入行，我已經做咗幾年經理人，而且都幾成功，做經理人嘅時候通常係啲人求我，因為嗰陣時我揸住啲紅嘅藝人。有一日，突然間轉咗做宣傳，日日硬着頭皮去電台，冇人識我，面懵懵，自己走埋去派卡片，好唔要面嗰啲呢。由人哋求我變咗我去求人，咁你做唔做吖？我做呀，因為我要留喺呢間公司。」
Michelle表示自己入行的年代跟現在分別很大，以往自媒體未太盛行，當時需要很多身旁的人幫助，要跟記者打好關係，假如被動的話，別就便不是幫你，現在卻是一個全新的生態，最重要是創造機會，「我好想有啲自己嘅嘢俾人知道，我咪自己寫份稿擺上網囉，甚至而家有AI幫你寫。而家係冇一個理由係我唔成功，太方便啦！我入行嗰個年代太靠人，要成功要行好多好多步，而家唔係，只要你自己肯努力。」
問到如何勉勵年輕族群別輕易放棄，Michelle分享自身經歷，身為「娛圈牌王」的她其中一個資格是救生員拯溺章，她自言自己是一個容易放棄的人，考拯溺章時拍了一條短片，「我對自己講，『衛詩雅，我知你兩個月後一定喊晒咁同媽咪講都係唔游啦，唔考呢個牌啦！但你記住，你一定唔可以放棄！你一定得㗎 ！』。兩個月後我真係喊晒同阿媽講我唔游。我班全部都係男仔得我一個女仔，我游最尾！跟住我阿媽話：『你話自己唔放棄㗎，你話拍咗條片你自己睇返啦。』我睇返條片我個眼神係好堅定，我都唔知哪來嘅勇氣覺得自己會考到。就係因為咁，我由全班最尾嘅一個女仔，畢業嘅時候我係游第一。我唔知咁樣係咪一定得，但我覺得呢個係一個幾好嘅方法。」
