發佈時間：16:54 2023-08-09
六十七歲的陳美齡（Agnes），十四歲便出道，超過半個世紀以來，由樂壇到文壇，由以學生身份，進入美國頂尖學府史丹福大學，到三名兒子也成了其母校的畢業生。事業，家庭也順心，但她仍未停步，除了是「維持現狀」，還有一個原因。
「我成日覺得自己唔夠，仲有好多嘢都唔識，又唔夠努力⋯⋯每個身份總有成長嘅空間，歌手、寫作、教育方面都係，要不斷咁學習，不斷鍛鍊自己，因為時代一路喺度變，我嘅狀態都係一路變，所以要一路學習，盡量去成長。」
從不停步
經常周圍飛的陳美齡，笑言有好好分配時間，在日本跟丈夫相處；在香港則陪伴年邁的陳媽媽及與好友、胞姊們相敍；在美國就看望三名兒子，加上排得滿滿的工作，過得十分充實。
「𠵱家一年之中，我有六個月喺日本、四個月喺香港、兩個月喺美國，𠵱家有個孫女，再開心啲！」
剛回港的她，除了陪伴陳媽媽，還為了新作《50句打動人心的箴言》，現身本周舉行的書展，跟書迷們會面。她笑言，寫作、閱讀沒有年齡限制，兒子們年幼時，她也鼓勵他們多看書。
「有家長話小朋友唔鍾意睇書，其實只係未搵到佢哋鍾意睇嘅書。我大仔細個嘅時候，我俾故事書佢睇，佢唔鍾意，反而鍾意睇《蝴蝶全集》、《地圖全集》；二仔就鍾意睇神話故事書；細仔就乜都鍾意。
「不過，我就唔俾佢哋睇漫畫書，因為漫畫家太犀利嘞，將故事全部影像化，等佢哋發揮想像力，有自己嘅個人世界，自己將文字變成影像。」
三個月減十二磅
幸福美滿的生活，令陳美齡心靈富足，今年初到美國探望兒子們，還有確實數字印證其幸福指數。
「因為美國啲嘢食好大碟，我去探啲仔又好興奮，就愈食愈多，肥咗成十幾磅，所以返到嚟就要減肥。我有四個步驟，第一係散步，每日要行一萬步。
「但步姿係好好笑嘅，（立即示範）手擺向前、手掌向上，咁樣可以拉開個肺，連個身都會直咗；頭重所以要抬起頭。行嘅時候，手向前擺嘅幅度大少少，維持呢個步姿，快步、大步行五分鐘，跟住以正常步速行五分鐘，再快步行五分鐘，咁樣條氣又好、姿勢又好，又可以消耗多啲Energy。」
第二至四的步驟，是她據自己的喜好作調整。「第二係夜晚食少啲，唔使應酬嘅話，我喺屋企飲蔬菜湯，加少少肉落去，因為蛋白質好重要。第三係減零食，因為我係零食王嚟嘅（腼腆一笑），最鍾意食牛肉乾同爆谷，咁大年紀都仲係要食啲卜卜脆嘅，但減肥嘅時候就減晒唔食嘞。
「第四，我係好鍾意食水果，食好多好多，咁份量就減半。我用咗三個月，減咗5.5kg（約十二磅）。」
面對過生死，陳美齡坦言，並不懼怕死亡。「我唔驚死，反而驚我死咗，我啲屋企人會好痛苦，所以我準備緊佢哋唔好痛苦，會唔忌諱去同佢哋傾，我老咗會點？我唔舒服會點？
「我有準備自己死咗之後，俾佢哋一啲開心嘅驚喜，𠵱家唔講得！講咗就唔驚喜嘞！」
