發佈時間：16:25 2024-04-23
MIRROR美加巡唱圓滿結束後，12子日前返港獲大批鏡粉（粉絲暱稱）接機，惟有指當時有姜糖（姜濤粉絲）和神徒（Anson Lo粉絲）一言不合大打出手。姜濤昨日(22日) 在宣傳《12怪盜》謝票後，亦有為此事作出回應：「我淨係希望大家可以安全快樂去支持我哋，我同Anson Lo 都有傾過，我哋都覺得好苦惱……。」其後，姜濤在IG開直播再次回應事件，更一度哽咽向大家道歉。
姜濤在直播中表示嘗試了解事件，但卻出現多個版本：「我包括公司所有人，我哋真係想了解返成件事，發覺100個人入面有100種唔同講法，所以我覺得喺而家呢個階段，我哋冇辦法考證件事係點樣。」他續指藝人最大責任是帶歡樂給支持者，這亦是他在MIRROR成員學習中的事，無奈事與願違，「好心痛大家，無人希望支持自己嘅人受委屈同受傷，相信所有藝人都唔想自己fans受到任何傷害。」
姜濤表示與Anson Lo 臨落機前得知事件，影響了心情：「我同佢都唔知點算，我哋好灰心。本身開開心心從tour返嚟，好掛住屋企人、香港同fans……冇諗度發生呢啲事。」並續指二人曾商量如何處理事件，最終沒有結果，只好繼續呼籲大家；他更一度哽咽作出道歉表示：「我同阿撈諗我哋係咪仲有啲地方做得唔夠好，我哋係咪可以再做多一步，就可以避免呢啲事情發生，我自己一直諗緊呢啲問題，我係咪應該同大家講sorry，係咪因為我自己做得唔夠好，所以先至導致呢個事情發生？我唔知道可以點樣做……所以，我如果有做得唔好嘅地方，我想同大家講聲抱歉，可能有更加好嘅方式去處理，但so far到而家，我未有任何頭緒可以做啲乜嘢。」他亦呼籲粉絲支持他們，同時應該有一個健康的心情。
而為慶祝姜濤25歲生日，今日（23 日）姜濤香港後援會於海洋公園舉行年度生日應援企劃「海洋王國·生日慶典 Keung To Ocean Carnival 2024」。今次生日應援以海洋為主題，現場設立多個小姜姜和小濤濤造型的打卡點、攤位遊戲，一日限定應援Cafe、以及姜濤個唱服飾及相片展等，雖然今日下著大雨，但仍無減姜糖（粉絲暱稱）的熱情，紛紛入場慶祝盛事，而姜濤稍後亦會現身進行切蛋糕儀式。
