順其自然，從來不是與生俱來的智慧，要參透箇中道理，一般都要交學費。
這個學費，叫時間。
「去到𠵱家呢個年紀，我係Go with the flow多咗，可能係注重追求心靈嘅滿足多咗，由Law of Attraction（吸引力法則），到New Age（身心靈），到研究佛學，都令我個人開心咗，冇以前咁執着。」
44歲，是周家怡口中的「這個年紀」，她坦言，順其自然，才可活得自在。
「啲人開始話我老㗎！我唔介意，同時都同自己講，雖然我嘅心態仲好年青，但去到呢個年齡層，都要做番啲啱呢個年紀嘅嘢，鏡頭後就另計呀吓，哈哈哈！鏡頭前就滿足吓大家，費事大家齮齮齕齕，哈哈哈！」
事業上，周家怡早已是公認的演技派，代表作10隻手指也數不完；情路上，維持單身狀態超過10年的她，仍然享受單身的爽。於是，追求心靈的滿足，令她更能摸索到人生的藝術。
「喺睇自己個心念嘅同時，亦都開始了解呢副機器（身體）嘅運作，慢慢就會明白，心念係最重要。」
年齡，從來只是數字，要隨年月醞釀智慧，就是要順其自然。

撰文☆吳靜　攝影、錄影☆林建安　髮型☆Vincent Yeung
服裝提供☆i.t.　設計☆黎志堅

一姐

入行接近26年，遠至《火舞黃沙》、《導火新聞線》，近至《瑪嘉烈與大衛》、電影《無雙》、《金手指》，隨口也數到周家怡的代表作品。她於2019年簽約英皇後，更曾被老闆楊受成，認可為「英皇電影一姐」。
訪問這天，以這個銜頭稱呼她，當事人即掩面叫停：「係老闆講笑㗎咋！唔好嚇親人呀！」再說：「我呢啲仲有戲做就已經好開心！」
換回正色，周家怡表示：「我入行嘅時候戇居居咁，頭嗰幾年都當係玩，幾年之後先發現，好似唔係玩㗎喎，先至產生興趣，就把心一橫去研究呢個行業。
「所以我好羨慕𠵱家啲年輕人，10幾歲就已經好有理想，我⋯⋯Google周家怡就乜都出晒嚟，呃唔到人。」
於這個網絡資訊發達的年代，除演員，周家怡還身兼YouTuber，主持節目《恨駕女團》。「咁𠵱家一定要做Social media嘅，同事話我疏於喺IG post嘢，就叫我做吓YouTube Channel。初初我提議做介紹食素，但未必會多人睇，冇理由搵我搞化妝品㗎，真係好冇說服力。
「跟住我提議玩車，適逢我公司有個高層，都好鍾意車，又有好多車Friend，即係有窿路搵到好多車返嚟，咁我就同Gladys（李靖筠）一齊做。」

迷信

恨的，是駕不是嫁，周家怡享受單身的自由，並非是其自我安慰的說話。「我𠵱家係唔夠時間用，除咗去旅行可以話行就行，我仲要學唔同嘅嘢，最近就學陶瓷、唱歌。」
隨即展示歌劇般的唱腔，她笑說：「唱歌老師話我骨骼精奇，明明唱到海豚音，但平時唔識用，𠵱家就學識去用。」
因此，對結束單身生活，周家怡坦言：「隨緣啦！唔隨都唔得㗎，冇特別一個（追求者）好有感覺。我父母都唔催我嘞，都過晒適婚年齡，仲催乜嘢吖？」
於是她繼續其尋找心靈之旅，並從中了解大道理。「我信Law of Attraction、New age同佛教，但唔係迷信。迷信係，有人會向佛求好多嘢，但其實佛陀唔會俾嘢你；如果計Law of Attraction，你係咁求，就更加話俾個宇宙聽你冇嗰樣嘢，所以呢個Concept要改！
「佛學係教緊我一套方法去修行，係修自己，而唔係去求。我師父同我講，供果，係提醒自己『有因必有果』，所以要從因着手，即係唔想心臟病，就唔好食咁多肥膩嘢；供花，係提醒自己『花無百日紅』，所以要好好珍惜每個當下。」
周家怡近年習慣打坐，開始的原因也相當科學：「其實打坐係Train我腦入面嘅Hippocampus（海馬迴），令佢強壯，咁我就可以控制到自己嘅情緒。」

感恩

要從心出發，周家怡的起步點，是兩本由澳洲製作人Rhoda Byrne所寫的書。
「我係睇《The Secret》先嘅，因為當時研究緊Law of Attraction；之後我喺台灣，行書店嘅時候，成本《The Magic》跌咗喺我面前，咁一定要買啦！
「其實兩本書都係要我做練習，《The Magic》有個20幾日嘅練習，我跟住做，就慢慢改變咗諗法。最好嘅係，呢啲練習會令我學識感恩。」
時間回帶至2014年，周家怡開始了「一日一感恩」的習作。「係10幾個感恩！每日都要寫低，所以由2014年到2016年，我寫咗好多感恩書㗎。最初嘅時候好難，因為好多嘢我都太慣，好似每朝一擘大眼就睇到嘢、手腳靈活咁，都係值得感恩嘅事。
「當懂得感恩嘅時候，成個人都充滿愛，呢樣就係愛因斯坦所講嘅『愛係最大能量』（Love is power），一發放到呢樣嘢，個人一定開心。」
說到愛，周家怡不忘補充：「𠵱家我最感恩嘅，係我嘅父母身體健康。」

出事？

正如周家怡所說，現世代，但凡有疑惑，一Google便冇得呃。
在Google上搜尋周家怡，除了令本是女人秘密的數字無所遁形，還有⋯⋯《行運一條龍》。
當事人聞言，即扮面色一沉，附帶一句：「咁遠嘅嘢唔記得Lu！」
FYI，電影是1998年虎年的賀歲片，拍攝時，周家怡還未報讀藝訓班，角色？是「結尾與葉玉芬（鄭秀文飾）一同跳舞的人」。
周家怡笑着「控訴」：「保錡！係佢Google咗之後講番出嚟㗎！嗰時我好似一個面粉糰拮咗兩個窿咁⋯⋯其實唔止我，我Feel到好多我呢個Age嘅人，都有類似嘅黑歷史，但𠵱家嗰啲10幾歲嘅𡃁妹𡃁仔，已經好靚女靚仔，冇晒呢啲出事樣。」
「黑歷史」源於時代跟潮流的轉換，早已坦然面對的周家怡，仍然慶幸：「咩年齡層都會有戲做嘅；仲有廣告，我以為拍牙刷廣告，就唔關年齡事啦，點知一睇稿，第一句已經係『踏入40歲，牙齦就開始萎縮⋯⋯』，哈哈！後生啲都拍唔到啦！」
發自內心的豁達，一樣冇得呃。