發佈時間：16:00 2023-08-02
入行十六年的關楚耀，初期一帆風順，作品如〈大喊包〉、〈你當我甚麼〉及〈四面楚歌〉等，也橫掃當時的歌曲排行榜，但人嘛，總有年少輕狂的歲月，〇九年於日本被捕，令他事業與人生也跌至谷底。
「最難過嘅，係影響到屋企人，但有高低起伏，係一個俾自己成長嘅契機，咁先係人生。」
走過低谷，轉眼踏入4字頭，關楚耀笑言：「𠵱家先至係我人生同事業嘅新階段。」
不如他在剛播畢的劇集《一舞傾城》中，「Marco哥」的花心搶Fo，現實中的關楚耀，於今年的「520」當天，就向拍拖六年的女友Joann求婚，揭開人生新的章節，相中他右手握着的心心，是他所選擇的道具，也代表了他的心情。
「佢令我知道，簡單係最快樂嘅，喺佢面前，我可以好似做番小朋友咁開心，我哋互相信任又相愛，點可以唔好好把握？」
自己人生自己主導，有了成家的心，關楚耀的肩膊也壯闊了不少，「𠵱家有咩機會都做，拍劇、電影、生意⋯⋯仲有我嘅初心：唱歌！我仲係以喺紅館開演唱會為目標㗎！人大咗，就會更加專注，無論其他人點講我、點睇我都好，我以行動做啲成績出嚟，先係最實際。」
做主人，也不可以Hea做，才算不枉此行。
Marco哥
雖然已播畢，但《一舞傾城》的確讓關楚耀，再次走進大眾的視線中，劇中的「Marco哥」雖然深情，但財大氣粗，現實中的他，曾不懂珍惜，要闖禍後才成長。
「要多謝公司咁睇重我，將『Marco哥』呢個咁立體嘅角色交俾我發揮。其實我差啲就要放棄呢個機會，因為喺正式開拍前，我同啲朋友去玩越野單車，落山嘅時候撞一撞，成個人飛起仲要打咗筋斗落地，起番身就見膊頭成條骨彈咗出嚟。
「之後即刻去醫院照X光，發現條骨移咗位，仲有骨裂嘅情況，醫生話要即刻全身麻醉做手術，喺我隻腳抽一條靭帶，去綁番住膊頭移咗位嘅位置。手術之後，真係起居飲食都照顧唔到自己。」
當時他尚有不足一個月時間，便要到佛山拍攝劇集，但由於忽然暫時喪失自理能力，令他萌生放棄念頭。
「係我老婆鼓勵我，叫我唔好嘥咗一個咁好嘅機會，我嗰時仲跛跛吓，佢就陪我返內地，真係好彩有佢！喺酒店隔離嘅時候，沖涼、着衫，仲有去廁所，全部都係佢照顧我。
「開工就有楊明、莊思敏幫我拉喼；初期我仲係跛住咁行，左手又唔可以有大動作，隊Crew都幫我就，唔係『Marco哥』都唔可以派錢派得咁瀟灑。」
我老婆
瀟灑的背後，除了同事們的幫忙，準關太Joann自然居功至偉，關楚耀坦言：「雖然我一直都有Plan同我老婆結婚，但係嗰次意外，令我加快行動，既然都認定佢係啱嘅人，咁點解仲要佢等？」
說起未婚妻，關楚耀的笑容特別燦爛，「雖然佢細我十一年，但係可能女仔嘅思想比較成熟，而我又係遲熟啲嘅，所以我哋好夾得嚟。佢係一個好低調嘅女仔，我哋拍拖六年都冇乜放閃⋯⋯而且冇做空姐好耐嘞（不少報道以「空姐女友」標籤Joann），𠵱家佢做緊網店生意。
「我記得第一次約佢，就去廟街大排檔，其實我哋嘅相處好簡單，我好似返番去學生年代咁，拍拖初期，最Enjoy就係同佢煲電話粥，晚晚喎！有時仲會講到瞓着咗都冇收線，哈哈！」
雖然未正式成婚，但關楚耀早已稱Joann為「老婆」，對她更有讚無彈，全部也是由衷之言，並非「生存之道」。
「佢唔係一般港女，從來都冇要求我送名牌俾佢；佢好精打細算，食、買都會用盡Coupon優惠。我哋啲拍拖節目，食吓魚蛋粉、行吓超級市場，都已經好開心。」
【東周刊】更多精彩 敬請瀏覽
《東周網》：https://eastweek.stheadline.com/
《東周刊》FB：https://www.facebook.com/eastweek.com.hk/
《東周刊》IG：https://www.instagram.com/eastweekhk/
《東周刊》微信公眾號：eastweekhk
