發佈時間：17:26 2024-01-31
常說負能量，會減低人的能量頻率，問題是，如何保持高能量頻率狀態？
看26歲的丁子朗，入行超過7年，當主持、演員也恰如其分，忽然參加選秀節目《亞洲超星團》，轉形象走韓系偶像風，再挑戰唱跳範疇，仍可以保持磨拳擦掌的鬥心。
「儘管我唔叻，但我好專注咁朝住進步嘅方向努力，我相信啲人會從眼神、動態、氣場，感受到我係進步緊，呢個先係最吸引人嘅地方。」
由零開始出發，正常也會有過灰心喪氣之時，丁子朗則看透自己，「我個人好好勝，亦都有野心，一旦有目標，就一定唔會放棄，由細到大都係。
「做演員、主持，係俾人搓圓撳扁，會為角色去塑造性格，而冇咗自己嘅本色，我都入咗行7年幾，做咗咁耐演員、主持，棱角都被打磨到變圓形，參加《超星團》，反而可以將我本身渴望嗰啲棱角，變番出嚟。」
成功與否，很多時候是看本人想不想成功，但丁子朗對成功的渴求，就成了其前進的高頻率，才有對「負」說不的動力。
難能可貴
說起參加《亞洲超星團》，丁子朗笑言，猶如是上天注定一樣。
「我入行前已經好鍾意睇K-Pop，好迷EXO、少女時代，為咗佢哋，我甚至喺YouTube學韓文，大學選修科都揀Korean 101！到知道有呢個比賽嘅時候，咁啱我又拍完兩套劇，於是就舉手參加Interview。
「我26歲，但比賽就25歲已經係Maximum（年齡限制），我喺6月Interview，但我嘅生日係6月30號，所以面試嘅最後一刻，我仲係25歲，到7月一入圍開始拍，我就26歲嘞！仲唔係天注定？」
即使上天似有安排，但丁子朗要面對的，還有需要克服的困難。
「初頭入到去嘅時候，我都係冇乜自信，甚至有少少自卑，因為好多人都好厲害，佢哋由10歲，練到𠵱家18、20歲，已經可以Master（掌握）跳舞同唱歌，我對呢兩方面都零Concept，到26歲先由一個BB開始，所以都唔知自己得唔得。
「但係Rain老師、曾生（曾志偉）、C君、程瀟老師，都不斷咁鼓勵我哋，叫我哋相信自己，係改變咗好多，到𠵱家可以話俾人聽，我進步緊，呢個係我最大嘅得着。而且，就算輸咗，我仲後生，咪再嚟過囉。」
練唱跳練到廢寢忘餐是基本，「每晚都係咁練，因為每3日就有一個檢測，識跳晒之外，仲要跳得好有魅力，試過俾人彈鐘，我同組員就由凌晨1點練到朝早7點，食完早餐唞一唞，10點又要上體能堂。
「但係咁樣去練番自己嘅鬥志同決心，係好難能可貴嘅。」
目標為本
汗水從不辜負人，訪問期間，丁子朗應記者要求，拍照時跳着節目主題曲〈閃耀〉的舞步，也跳得有板有眼。
「我從來都唔會半途而廢，因為我係Goal-oriented（目標為本），我好有表演慾，所以未入行嘅時候，就自己拍YouTube片；入咗行之後，想拍劇、做主持，但中文唔係特別好，我就去學，講多啲嘢、上Acting class；到參加呢個比賽，我唱歌、跳舞都唔叻，就搵老師去學，希望去進步。」
論目標，早於7年前丁子朗入行時，他已為自己定下一個。
「我一直嘅目標，就係希望成為最年輕嘅『視帝』，一入行我就Search過，古天樂以《刑事偵緝檔案IV》攞『視帝』嗰年，佢29歲，𠵱家我26歲。我Search嘅時候18、9歲，仲諗緊有10年時間，一定做得到，但轉眼間已經過咗7年，唔知有冇呢個幸運可以做到。
「另一個目標，就係衝出香港，呢個其實我一路都有做緊，除咗香港嘅劇集，我都有參加荷李活、內地嘅Casting，電影、電視劇都有。我試過Cast《尚氣》，就係Simu Liu（劉思慕）嘅角色，因為我睇過佢訪問，講自己試鏡時嘅對白，同我試到Round 3嘅時候所講嘅一樣。」
當過兒童節目《Think Big天地》主持的丁子朗，本尊同樣Think big，「希望我會成為一個令香港人驕傲嘅國際巨星！暫時未成功，但我相信有一日，我會成功！」
愛住家飯
通往成功的路上，丁子朗從不吝嗇其天賦本錢，連網友也會自然地把他的名字，跟「肌肉」相連作搜尋。他聞言即灑脫地笑說：「作為表演者，我嘅身體都係我嘅工具，我只不過係運用我嘅工具去表演，而且我喺《森美旅行團》嘅時候都除晒啦，都唔係太特別，唔係犧牲色相。」
說到《森美旅行團》，為丁子朗帶來的，不只知名度那麼表面，還有跟森美、麥美恩及吳若希，眾節目拍檔們的深厚友誼，「𠵱家我成日去啲朋友屋企，同埋佢哋嘅屋企人，一家人圍埋一齊食飯，其中一個係Jinny（吳若希）。
「我同Mayanne（麥美恩）兩姊弟咁Close，就係因為我哋兩個都係自己一個喺香港一個人住，自己面對生活上嘅大小事。有Jinny俾我哋一個月上去屋企一兩次，食吓住家飯、飲吓住家湯，真係好窩心。」
於感情還未有着落之際，丁子朗還是對未來的另一半有所憧憬，而且也展露出其巨蟹座愛家的特質。「孝順好重要，同屋企人Close係好加分嘅，因為我都好愛我嘅屋企人，尤其係我自己一個喺香港，爸爸、媽媽、嫲嫲都喺加拿大。如果有另一半嘅屋企人，感覺會好Sweet、好Warm。」
由黑變白
黑與白，未必一定具深層意思，不用想太多，看膚色便可。
以丁子朗為例，2016年入行以來，走陽光風格的他，黝黑的膚色配上可觀的肌肉，早已為眼球帶來氧份，去年尾開始的《亞洲超星團》，膚色轉走白滑的K-Idol路線，又有另一番風味。
「去年嘅改變係大嘅，1月拍《奪命提示》時，我仲係黑黑實實做刑警；到6月就已經係演學生哥，跟住就變咗韓星Look參加比賽。除咗內心有轉變，連外貌都俾人睇到呢個變化。」
自言恐懼安於現狀變成習慣，丁子朗樂見自己「白化」，「人越大，就會越多責任、顧慮，所以我更加要趁後生，試多啲唔同嘅嘢，令自己唔好滑咗牙。」
改變，總需要勇氣去踏出第一步，Are you ready？
