不論做人、做事，沒可能一步登天，成為聚光燈的目標之前，任誰也當過小角色。
以上映不足兩周的《金手指》為例，梁朝偉與劉德華，點睇也是Major Lead，但兩大影帝以外，還有「做細嘅」一眾新生代演員，也就是圖中所見的白只、楊偲泳及岑珈其。
對於被視為Minor，3位毫不在意，更視與影帝合作為成就解鎖。岑珈其坦言：「好似中咗六合彩咁，呢個夢幻組合，係每個演員夢寐以求嘅組合，有我份實在係意想不到！」
其身旁的楊偲泳也表示：「我覺得似係抽盲盒中咗大獎咁，就算戲份唔多，可以參與其中都學到嘢。」
較二人資深的白只，跟梁朝偉的對手戲份最多，但他也直言：「佢係天花板，我只係影迷嚟，本來演員同演員，係諗點樣交波、點樣有火花，但今次我完全唔係諗呢方面啦！」
在旁的岑珈其即稱：「諗點樣偷到佢嘢！」白只秒回：「係啦！係以一個小偷嘅狀態，去做呢個工作，盡偷！我唔覺得自己成功偷到，但係我觀摩到，近距離見到梁生嗰種神態自若，已經大開眼界，唔知我幾時先去到呢個境界⋯⋯」
經驗值不能課金，要花時間累積，假以時日，3人也可當上今天口中的天花板。

梁生

電影劇情暫且不提，看本文前頁，大概不難發現，白只稱呼梁朝偉為「梁生」，岑珈其亦然，而他們也跟梁朝偉較多對手戲。
後者理所當然的說：「梁生就係最好、最尊敬嘅稱呼，哪怕係銀行職員，都係『梁生，呢邊請。』咁樣，係最安全嘅叫法。唔係點叫佢？偉哥？偉爺？定係Tony？唔好搞咁多嘢嘞！叫梁生啦！」
白只點頭稱是，還說起與梁朝偉拍的第一場戲：「場戲係我同阿Sa、梁生嘅第一場對手戲，其實冇乜台詞，只係我搵藉口叫走梁生，就係『你走啦！』3個字㗎咋，但當時我望住梁生，唔知點解成身都震，仲一開口就走音。可能梁生Feel到我驚，所以好就我。」
鏡頭後的影帝沒有氣場，但身為後輩，一見偶像本尊，岑珈其就：「第一次見梁生真人，我離遠已經『嘩』晒，行近啲，就鞠躬講『梁生早晨！』，因為我由細睇佢嘅作品，對佢充滿仰慕、憧憬，冇諗過真係有機會同佢合作。
「而佢都Sense到我哋呢班新演員好緊張，唔敢同佢講嘢，所以做破冰嗰個，主動同我哋傾偈，問吓我哋演邊個角色、傾下一場戲點拍，令我放鬆咗。」
雖然楊偲泳於戲中飾演劉德華女兒，但她也有珍貴機會，與梁朝偉同場，她笑言：「只係一齊聽嗰場戲嘅Briefing，我企喺梁生隔籬，但對眼已經係離唔開佢。」

進步

《金手指》由莊文強執導，加上朝偉、劉華，是《無間道》後的鐵三角重組，成績如預期中般蜚然，而一眾新生代演員，也共同成就佳績。踏入2024年，白只、岑珈其也有新的目標。
白只表示：「我好簡單嘅，想裝修屋企同執屋，油吓道牆、洗吓冷氣、換吓床單⋯⋯」
旋即引起其他人關心他的換床單頻率，44歲的他就戲稱：「我從來都唔換嘅。」
已為人父的岑珈其，就相對地認真。「我想試吓令自己進步，最近我努力學緊國語，因為細個讀書唔叻，英文、國語都唔叻，所以好想學好佢。」
其兒子岑彥臻將於本月底3歲，33歲的他坦言：「我係同阿仔一齊學，我嘅程度都係同佢差唔多。作為一個人，或者一個演員，我覺得要逼自己學多啲嘢，咁先可以進步。」

30

最年輕的楊偲泳，也於去年11月加入「3字頭」行列，所以她要趁30歲這一年，完成一個「10年項目」。
「我喺20歲嗰年，同兩個朋友Backpack去咗土耳其、希臘，仲試過因為冇多餘錢，由土耳其坐船去希臘嗰8個鐘，我哋3個女仔就咁瞓甲板。我希望30歲呢一年，可以Backpack多一次。
「我一直都想去南非，因為我好鍾意動物，仲有鯊魚，我已經做咗Research，會夾吓時間，可以嘅話就9月起行，去睇動物大遷徙。」
除了陸上活動，楊偲泳還有另一目標，「之前我去考個潛水牌，就係想潛入水底，喺鯊魚同鯨魚嘅側邊，希望都可以實現。」

無極限解鎖

所謂的後浪推前浪，並非要把前浪淹沒，以在座的3位後浪為例，各人仍以湧近前浪為目標。
岑珈其誠懇地說：「我希望喺有生之年，可以同星爺合作到，唔使做對手戲㗎，可以拍到佢導演嘅戲，得到佢嘅指點，即係親身近距離向佢偷師，我都三生有幸。」
他身旁的楊偲泳，也心心眼地大表認同，原因是：「我好鍾意星爺嘅作品，基本上有時Off-cam（停機），我都會講佢啲戲嘅對白，最正係好多人都可以接住講落去。
「我細個嘅時候，就因為成日講星爺啲戲嘅對白，俾人叫做『華安』㗎。到我17歲嘅時候，喺一個紅酒店做暑期工，撞到星爺嚟買酒，我覺得自己用咗人生好大嘅運氣㗎嘞！希望仲可以同佢合作，見多佢一面。」
一直保持沉默的白只，終於吐露出其趨之若鶩的前浪：「Christopher Nolan！（導演基斯杜化路蘭）」現場隨即爆發一輪歡呼聲，他續說：「唔使做咩角色㗎，俾我喺現場Witness都得㗎！可以偷窺大師嘅創作過程就夠。」
每一項成就的解鎖，起點都是Think big。
趁2024之始，諗諗佢。