發佈時間：14:19 2024-01-05
電影《不是你不愛你》戲中情迷男主角陳昊森的可愛少女Hazel林熙彤，演出被受讚賞，亦跟導演葉念琛及其他演員四出謝票，親身感受觀眾反應，開心又興奮。
首次進軍大銀幕、剛踏入20歲的Hazel林熙彤，由Model界別踩入影圈，坦言埋位前有做足功課，她說：「戲裡面我飾演子欣，一個好鍾意唱歌嘅女仔，只有十七歲，同我年紀好相近，埋位前我睇咗好多戲去參考，諗咗好耐點樣去呈現十七歲嘅子欣俾觀眾睇，佢嘅性格應該會係點。」
第一次拍戲好緊張
第一次拍戲，Hazel林熙彤表示自己做足功課，但正式埋位，難免會緊張起來。「拍《不是你不愛你》奉獻咗我好多第一次，除咗第一次拍戲、仲有第一次唱歌、第一次打人、第一次螢幕初吻，獻咗俾昊森，當日我哋係第二次見面，但我就係第一日埋位第一場戲，所以好緊張，我仲要係主動向佢表白、再錫佢塊面。其實現實中嘅我算係有啲膽嘅女仔，無論係感情事，抑或其他嘢，我認為機會係要自己爭取。」
掌摑對手感內疚
除了螢幕初吻令Hazel林熙彤手足無措，掌摑戲中情敵Helen譚凱倫，也令她相當內疚。「拍之前有不斷問人要點樣掌摑人，Anjaylia（陳嘉寶）教我要剪指甲，去到現場就有武指指導我點摑，原來唔容易，同埋我摑咗好多次，有啲大力，雖然Helen冇受傷，但每次打完我都要攬番住佢，好內疚。同埋當日仲有啲拉扯嘅場面，為咗令自己更入戲，我叫咗佢哋大力啲捉實我，出來效果會真實啲，但隻手就瘀咗少少。」
在戲中初次啼聲
除此之外，Hazel林熙彤更在戲中初次啼聲，劇情指一直夢想成為歌手的她，獲男主角陳昊森幫忙穿針引線安排試音，好友Mandy與阿丙梁仲恆為她在錄音室打氣。回想當日走到錄音室錄歌，Hazel難掩興奮，她說：「入錄音室覺得好得意，戴住耳機會聽到自己把聲聽得好清楚，平日自己喺洗手間唱歌，以為好好聽，但當聽到咁清楚嘅時候，就會發現有啲高低音要處理，其實唱歌都好好玩，日後會努力去學吓。」
同阿丙有「兄妹相」
至於在戲中跟Hazel飾演兩兄妹的阿丙，雖然身高懸殊，但劇組上下都覺得他們好有「兄妹相」。「阿丙戲裡面嘅打扮好得意，短褲爛衫人字拖，而我就著到色彩繽紛，我哋一見面冇嗰種尷尬，節奏上夾得好好，真係好似阿哥同阿妹咁。」Hazel說。
