發佈時間：17:55 2026-10-02
TVB戀愛真人騷《女神配對計劃2》，將於本周日（4 日）播出的第五集，製作組率先公布了阮嘉敏（Mandy）「甜品飯腳」爭奪戰，16名求愛勇者將可與心儀女神撐枱腳歎甜品。當Mandy的關鍵詞「暖」一出，與Mandy心意相通的吳旭東（東東）及譚梓樂（Hepta）即一支箭標向前爭櫈坐，二人更咁啱睇中同一張櫈兼飛撲喪爭，場面極度混亂。原本被壓在最低的東東，出動神力，用力彈起身之餘、更索性成張櫈擸走兼直接放在Mandy面前坐下，更伸出拳頭示意Mandy來個「fist bump」，行徑浪漫有型兼霸道！
霸氣示愛
東東的霸總式示愛，令現場所有女神及花生團全線陷入了瘋狂叫囂狀態，郭珮文（Juliana）直頭講出口話「Respect」；至於被東東搞到像是韓劇女主角的Mandy，全程笑到合不攏咀，事後Mandy坦言：「其實都幾有型，好Man咯。」就連出名要求高的阿Bob，亦對東東表示欽佩，當宣布東東有資格成為Mandy「甜品飯腳」的候選人之一時，除了現場所有人「畀啲掌聲」，更忍不住讚嘆東東：「真係有型！」而東東亦搞笑又謙厚地向全場鞠躬致謝，場面十分熱鬧。
目標為本
雖然今季《女神》講明「心意相通」對象隨時洗牌，但東東明顯全心全意衝著Mandy而來，而且爭奪女神芳心絕不手軟，癡情程度令其成為花生團團寵。事緣為了與Mandy同枱，東東出盡全力衝鋒爭取俞可程（Kanis）「主菜飯腳」名額、更一度因用力過猛變滾地葫蘆兼電話都飛埋出嚟，獲花生團大大力欣賞，鄧凱文：「你完全知佢aim for what，完全係Mandy」，Mandy 閨密鄧依婷更一再為東東打氣：「東東加油呀」、「東東好努力！」
「長情女神」
更浪漫的是，Mandy與東東一樣長情，她在玩遊戲期間，透露曾「鍾意咗一個人9年，但我哋冇一齊過」，引發全場震驚，花生團劉倬昕（Sam）都讚Mandy專一。Mandy說：「因為我小學三年級喜歡佢，升中學時再跟他同一個學校，佢不停同好多女仔一齊，但等極都係未到我，我就覺得失望夠」、「望住佢就有一種青春嘅感覺。」咁大方得體及長情，難怪有網民熱捧Mandy為「女神天花板」。
延伸內容︰女神配對計劃2｜38歲西安男千里追女神 浪漫舉動冧爆阮嘉敏 網友：配對已經成功！
