無綫台慶劇《新聞女王》近日掀起追劇潮，「Man姐」佘詩曼、「George」馬國明及「飛爺」鄧智堅等角色演技大鬥法，連場勾心鬥角，被指猶如職場版的《金枝慾孽》！雖然《新》劇被讚劇情緊湊、角色立體，但也被狠批內容誇張離地，如新聞部大搞「山頭主義」、臨出街前30秒主播拒報新聞等，認為跟現實中的新聞主播大不同！

究竟真正的新聞從業員面對多少辛酸及挑戰？曾在無綫、有線及亞視新聞部擔大旗的趙麗如（Bonnie），名副其實是為發掘真相而衝鋒陷陣的「新聞女王」，在東周網直播中「Bon姐」上身，接受東周刊副社長黃庭桄（Billy）訪問，論盡昔日當新聞主播的有笑有淚點滴！

做主播要「啪骨」？

黃庭桄笑言自小已看趙麗如報道新聞，指「新聞女王」趙麗如陪伴港人長大，可謂「新聞界譚玉瑛」！趙麗如謙稱自己不算是「新聞女王」，昔日效力無綫、有線及亞視時，都是身兼採訪記者及主播兩職，然而當新聞主播是否如選港姐般需美貎與智慧並重、甚至要整容削骨？趙麗如自爆要「啪骨」！

趙麗如說新聞主播的角色如「final gate keeper」，即是擔任最後把關的角色，絕非照稿讀了事，必定要有豐富的新聞知識：「新聞訓練係要有，就算係編輯，但唔出鏡都要造聲，要有發音訓練。做主播，首先態度上要喜歡新聞，係咪要靚到好似港姐咁？行內唔會用靚呢個字，係用『pleasant』， 即係睇落去係咪舒服？另一條件，係要有公信力。公信力係呃唔到，究竟你係讀緊稿，定係你好認識單新聞？」

她說主播的基本訓練是全方位，包括要採訪、對新聞有認識、發音改善、懂化妝髮型：「喺TVB時，係有形象顧問逐個睇，但對我嘅要求係有啲特別，好多人冇呢個要求，就係因為我係高低膊，公司要我去睇中醫啪骨，出鏡時唔會有高低膊嘅情況出現。」她續說外界以為做主播是等於升職，然而採訪記者和主播是兩個不同崗位，主播只局限在廠內報道新聞，而記者則要擴闊人脈「攞料」，搜刮新聞題材。

「新聞小花」係侮辱？

近年網民愛評頭品足新聞主播的外貎身材，「新聞小花」、「新聞小草」之銜應運而生，但趙麗如說作為專業的新聞從業員來說，是絕不好受。

「喺行內，小花小草呢啲稱號唔係讚美，唔少人甚至認為係一個悔辱，因為新聞從業員唔係想被人集中注意佢嘅外表，新聞從業員係想改變世界、想有公義，為公眾利益，追求真相，去監察政府、幫助弱勢，但做完晒呢啲嘢，只係畀人話：『你個妝幾好！』，真係會唔開心。」

《新》劇內容太戲劇化

在《新》劇中「Man姐」佘詩曼說：「呢行邊個唔搶？搶獨家、搶頭條、搶畫面、搶人！」，甚至為爭上位出盡陰招。

趙麗如說現實中，只有大家去爭取機會去採訪某些新聞，即使在黃金時間做主播，也是上司視乎個人能力去安排：「做prime time係冇得咁爭！其實是非度度都有，但犧牲色相呢啲，我真係冇聽過！係有鬥，大家會鬥搶問問題，搶個咪擺入啲！劇集部份情節係有戲劇效果，唔係完全反映新聞部運作，例如劇情話新聞部有兩大派、各有攝影師，其實係將主播同副總監嘅權力重叠咗！」

「劇集甚至外界，唔係咁了解行內運作，新聞從業員關心嘅，唔係個台大唔大，而係有冇新聞自由，去採訪同公眾利益有關嘅新聞，呢點係新聞從業員最關心。」趙麗如續說新聞從業員同時要面對的，是媒體存亡問題，人手及資源不足，薪金不高，以及青黃不接，以上都是《新》劇未有觸及的實況。

化妝師匿枱底，除鞋報道被cap圖！

《新》劇中佘詩曼有專人埋身化妝及掛咪牌，趙麗如說只屬部份事實，一般主播都會懂得自行搞掂化妝髮型，最難忘的是因採訪新聞後要處理後續工作，直至臨近報新聞前，未有時間化妝：「最誇張嗰次，係個化妝師匿喺主播枱枱底，直播時，先由男主播讀新聞，化妝師同我喺另一邊化妝。」

另一次蝦碌經驗，是趙麗如要進行基本法研討會直播，她習慣除鞋踩字幕機：「工作人員出錯，唔小心將天花板嘅攝影機畫面播咗出街，睇到我除咗一隻鞋。係好尷尬，觀眾唔清楚運作，唔會明白點解會咁做，完咗直播我同老闆都收到好多電話。」

男主播困lift出唔到鏡！

蝦碌人人有，趙麗如說主播出鏡前不能搭電梯！「有位男主播臨出鏡前搭電梯時被困，但返工嘅全部都係女士，個個都未化妝，最後有位女同事好有義氣素顏出鏡。」她續說曾目擊有位主播在化妝間跟人閒談時，傾到忘形過晒鐘，最後9秒9衝入錄影廠，喘晒氣報新聞。

忍唔到笑要執生！

「我有個拍檔將『新年快樂』講成『聖誕快樂』，佢知講錯咗，停唔到咁笑，有個EP sound interrupted feedback（ifb），好似耳塞咁，導演同總編叫我：『你讀晒啲新聞啦，佢忍唔住笑！』主播枱下面有個咪cut，凡係笑或咳，都可以令啲聲出唔到街，最後啲稿畀晒我讀。」趙麗如說。

報道新聞時，難免觸及令人傷感的新聞，新聞主播應以怎樣的情緒去報道也是學問，過往曾有主播忍不住含淚報道，趙麗如說：「我覺得新聞先至係主角，無論報導或採訪，不應投放個人感情，如報道嚴肅新聞，唔應該去喊，應該專業、準確去講就ok。所以我哋成日提醒自己，返緊工時，主角唔係自己，只係配角。」

去採訪變被採訪！成A1頭條人物

2001年6月10日，是趙麗如採訪生涯中最難忘的一天，去採訪變被採訪，成為大字標題「無線女記趙麗如困洪流    消防員救人險遭沖走！」的A1頭條人物！事源她要到九龍坑村採訪水浸情況，本來上司叫她去某處採訪，但她當時見有6架消防車往另一方向援救，她即自行帶攝影師跟隨。「當時我唔聽話，見有6架消防車去另一個方向，我就跟住去。去做時都有路，但出返村時，已經成為澤國，啲車反晒，要消防員救我。最好笑係好多人事後問我用邊隻粉底，見我濕晒個妝都冇甩！」

公幹失行李　獲贈喱士內褲

雖則同行如敵國，為了搶先發問問題等，和其他行家當然常處於緊張的敵對狀態，但也有同舟共濟時。昔日專責採訪政治及外交新聞的趙麗如，要常到外地採訪，有次去俄羅斯時行李遺失，跟身的只有攝影機及錄影帶，個人物品全無，為了採訪也不理一切。當筋疲力盡至深宵才返到酒店，苦惱連內褲都冇得換時，當時忽然有人敲門，原來是有一名行家深知她的苦況，親自登門送上全新喱士內褲一條，以一緩趙麗如「冇底褲着」之急，乍聽香艷，實則感動萬分。

「其實唔係好似外界所講要鬥要上位，其實係冇得鬥，係老闆認為你得唔得。」趙麗如說。

跟行家吵大鑊現「狠辣樣」嚇親男友！

愛上女主播！美麗女主播採訪時邂逅富豪結良緣，全部都是劇集的完美情節，現實中女性新聞從業員每天為採訪衝鋒陷陣，食無定時，輪班加班冇假放，要擠時間拍拖浪漫，更是奢侈之事。趙麗如笑說當年結婚時，很多同事由衷的連聲恭喜，一副「你終於嫁得出」的模樣，就是深知女性新聞從業員根本冇時間拍拖，亦很難遇到能包容自己工作模式的另一半，而她當年也因爆seed，爭點摧毀一段良緣！

想當年和法律界男友初相識，正值熱戀時，趙麗如要到泰國採訪亞太經濟合作會議，男友刻意飛來解相思。怎料在酒店大堂，撞正趙麗如和另一行家吵大鑊，眼前本來溫柔婉約的趙麗如，在唇槍舌劍時盡顯強悍霸氣，巴辣盡出，即嚇窒男友！

「佢見到我變成另一個人咁，真係嚇親！我同行家鬧交後，嬲得滯，自己走咗去某餐廳食嘢，完全冇通知男友，最後佢逐間餐廳搵我。」雖見女友「真身」，但這位男友反而未有被嚇走，最後更成為趙麗如的老公，並組織五人家庭，育有三名子女，樂也融融。

貧賤夫妻贈雞蛋

採訪生涯多年，遇到的人和事數之不盡，即使要以最持平、最正面的情緒去處理新聞，但也有洋蔥時，感動感慨，一言難盡。

「有次喺施政報告發表前，去深水埗採訪一對夫妻，佢哋都病咗，但堅持唔攞綜援。最感動，係佢哋開飯時，好熱情咁招呼我坐低食，成張枱只有白飯同2隻雞蛋，都為咗我加多雙筷子，當時我感受到一股溫暖，同埋見到佢哋嘅唔容易。去廚房拍攝，見到通地都係玻璃樽，原來全部都係豉油樽，為咗用盡最後一滴，所有樽都係倒轉。我仲見到有一叠押店嘅當票，原來女主人將結婚戒指當咗好多次，但一有錢就會贖返。」

趙麗如報道出街後反應熱烈，很多熱心人士捐款援助：「捐款多到呢對夫婦先還錢畀所有債主，之後再擺幾圍請債主食飯。呢件事可以睇到，只要呢個社會仲有弱勢，新聞工作者係應該幫手發聲。採訪係不分大小，我哋唔會咁幼稚去覺得採訪國家領導人就係好威，只要涉及公眾利益，就要去報道。」

【趙麗如昔日採訪照逐格睇！】