夢想，從來並非不切實際，但要夢想成真，就從來都要披荊斬棘。
別看《中年好聲音》冠軍周吉佩一臉悠然，拿着結他，看似是毫無代價唱最幸福的歌，今天接連推出作品，還身兼綜藝節目主持的風光，是他經過15年的風霜，才能再次嘗到的甘甜。
「08年出道嘅時候，出咗1隻碟就撞正金融風暴；之後夾Band，又散Band收場。為咗搵食，我就轉做記者、主播⋯⋯真係諗過放棄做歌手呢個夢想。」
15年的時光，37歲的周吉佩，由雄心萬丈的少年，進化為有膊頭的中年爸爸，為了養家，不惜一度放下夢想。
「一個男人有咗家庭，要追夢係一件好奢侈嘅事，因為除咗要對自己交代，仲要對太太、仔女有交代。
「喺參加《中年好聲音》之前，因為疫情，我連出去同人唱網上Live都唔敢，驚自己中咗會惹到啲小朋友；喺屋企彈結他，又怕嘈住佢哋溫書同瞓覺。我個結他盒，有成兩年半冇打開過。嗰段時間係我最難捱嘅階段，覺得人生冇咗意義⋯⋯」
在情緒的臨界點，他發現到問題根源：「就係冇得唱歌，我真係太鍾意唱歌嘞。」
走過低谷，憑藉《中年好聲音》，周吉佩終可再站在台上，奪冠後的他，更可享受了久違的歌唱之樂。
「𠵱家我都應承太太，以解決屋企嘅開支為前提，喺追夢嘅同時，都要實際啲。」
唱最幸福的歌，最基本，還是要腳踏實地。

珍惜機會

自今年4月贏得《中年好聲音》冠軍後，重燃了周吉佩的歌手夢，機會接踵而至：踏入10月，他還推出了「再入行」的單曲〈你是我唯一的〉；到今個月，又推出另一首單曲〈梁山伯的華爾茲〉。
「第1首單曲其實喺6月已經錄好，但係一直都等緊MV同籌備，可能係天註定，喺我嘅生日前，俾份生日禮物我，仲有我太太，因為我哋嘅生日，都係10月8號。」
歌曲以外，周吉佩坦言不會想得太遠，「我諗如果係15年前，我嘅目標可能係去紅館開演唱會，諗番轉頭，都覺得自己當時諗得好天真。
「𠵱家要先做好手頭上嘅工作，每一次上台都做足100%，獎項我都唔會考慮咁多。老實講，喺呢個年紀，有第2次機會上舞台，又出到自己嘅歌，已經好唔簡單，仲有咁多人支持，已經夠嘞！」

從不離地

現在不愁沒演出、演唱機會，周吉佩也如他所說，分外珍惜，因他是一路撐至今天。
「2008年同以前嘅唱片公司結束合作嘅時候，我真係好迷惘，但係都要搵食㗎，於是就去咗做Web J，入職星島之前，又去過另外一啲報館做主持、主播，最緊要係保持穩定嘅收入。
「有一次訪問容祖兒，佢認得我，仲問番我嘅近況，我答佢我去咗做主持，佢鼓勵我：『幾好吖！呢行就係咁㗎嘞，有工開就繼續做，做得開心就OK！』。」
他笑言：「喺我仲掙扎緊嘅時候，一啲前輩對我講嘅說話，就算係隨口講嘅，對我嚟講都係最好嘅支持，如果冇呢啲鼓勵性嘅說話，我可能堅持唔到咁耐。」
堅持到終見曙光，周吉佩還擴展他的歌唱教育業務，是他跟太太商量後的決定。
「以前我教唱歌，係單對單嘅課程，但係最近我多咗工作，我就想搵個大啲嘅地方，可以容納到多啲人，轉為小組教學，一次過教多啲學生。」
校舍大了，校名更由「吉吉好聲音教室」，暫定改為「好聲音學院」。

按部就班

事業總算重回正軌，對周吉佩而言，不盡是苦盡甘來，但家人給他的原動力，令他更有力前行。
「以前係我嘅內心唔夠強大，睇到一個負評就會灰晒，𠵱家就無論係正評定負評，我都可以接受。我太太話，與其理一啲無謂嘅批評，不如專注啲，珍惜真係支持自己嘅fans。
「其實，外界點批評我唱歌，我都冇問題，但如果過咗我嘅底線，批評我嘅家人，我作為老公同爸爸，就一定會捍衛！」
老公力跟父愛滿瀉，全因他早早就失去父愛，「雖然爸爸喺我18歲嘅時候就走咗（病逝），但佢對我嘅影響仍然係最大。我好記得，佢走之前仲成日笑住話，人食幾多着幾多，係整定嘅。連死亡佢都唔驚，咁人生仲有咩事更困難？
「佢亦都教識我，做人唔好太執着，要識得Let go，但當搵到自己鍾意嘅事，就算花一生去追求，都係值得嘅。因為佢冇呢個時間，所以就更加希望我可以追夢。」
亡父早逝，令周吉佩早有成家立室的念頭，「我想早啲建立自己嘅家庭，所以識咗我太太之後，覺得係時候就結婚。」
現在二人的一對子女，大女Imogen已9歲，兒子Jasper則6歲，他笑言：「我有個朋友同我講，教小朋友要『眼望星星，腳踏草地』，即係目標可以大到天上嘅星星，但係要識得逐步逐步行，按部就班，總會有成功嘅一日。」

Special Thanks to...

雖然要與時並進，但有些看似老掉大牙的用語，如「成功男人的背後，總有位默默付出的女人。」，從來不老。
周吉佩的背後，就是跟他結婚近14年的太太黃彥欣。
說起太太，他即一臉幸福，「由我做歌手嘅時候，我太太就冇嫌棄我又窮又冇出息，連拍拖都冇錢，仲諗過同佢分手⋯⋯但佢由始至終都咁支持我，呢10幾年對我都不離不棄。
「以佢嘅條件，其實可以搵一個條件比我好好多嘅男朋友，但係佢都揀咗我；結咗婚，我哋公一份婆一份，佢都毫無怨言，係到我𠵱家事業叫做好番啲，先至叫佢辭咗之前份工。」
周吉佩笑言，現在的新增夢想，是讓太太可安心當全職家庭主婦。「不過仲未實現到，𠵱家佢要做我嘅全方位助手，演藝事業、音樂學校、歌迷會，仲有屋企啲瑣碎嘢，都係要靠佢幫我。哈哈！」
跟周吉佩說，他身上那件藍綠色短袖針織外套，出鏡率甚高，他聞言即道：「係咩？係我老婆揀㗎，我全部出鏡嘅衫，都係佢一手包辦，我完全唔識呢啲。」
牙掉了，不是因為老土，而是太甜膩。