發佈時間：11:11 2026-10-26
出道13年的趙璧渝（Osanna），自藝訓班畢業後，由低做起，曾參演不少TVB劇，如《逆天奇案》、《法言人》、《法證先鋒VI:倖存者的救贖》等，當中不少角色都備受外間讚賞。不過，今時今日的藝人，Osanna 坦言要不斷自我增值，因個人喜歡養生與天然療法，繼早前考取瑜伽導師、跟着又「升呢」作頌缽療癒師，日前又出席唱作歌手兼調香及花藝師何展睿（Steve）跟咖啡店聯乘搞的「香藝與咖啡」的工作坊，適逢萬聖節就快到，席間學習用咖啡混合香粉製作萬聖節公仔的印香，提早應節。
自我增值
首度參與香品製作的Osanna，對活動甚感興趣，聽足導師的指示，由磨咖啡粉到混合香粉，都跟足比㤡量度，跟着便慢慢搓成香珠，再製作不同公仔的印香。整個活動約兩小時，她順利完成多個作品。事後，她開心分享感受︰「我平日都身心靈，鍾意天然嘢，都有點聖木、鼠尾草、線香等，啲香粉好清新，好快進入療癒空間。加上今次係萬聖節主題，啲製成品好得意，好好玩。」對於近年來不斷增值，她強調以往太過忙於工作，忽略生活，其實生活品質好重要，直接影響身體健康。她說︰「有次去泰國旅行時，體驗過頌缽，覺得好放鬆，自己後來了解咗背後嘅理論，覺得聽聲好療癒，又可以幫身體療癒痛症，同瑜伽嘅理念好相近。既然有時間，不如學多樣嘢，將兩者融會貫通，既可以幫到自己，又可以幫到有需要嘅人。」而她初嘗製香品後，已萌生念頭想做香藝師，「希望將來有自己嘅小品牌，已經定咗下一個目標做香藝師。」不過，Osanna在成為香藝師前，近來亦忙於拍攝《愛．回家之三代同糖》，稍後亦要為新劇《玫瑰戰爭》宣傳及下月台慶進行綵排，始終演藝工作才是第一位。
首度聯乘
而星級導師 Steve亦大讚Osanna製作香品有天份，建議她多多學習，功多自然藝熟。他透露第一次跟品牌聯乘搞活動，「簡直係興奮加緊張，事前籌備好晒，今次場地好舒服，參與者亦好高質，所以我都準備咗3種不同嘅香粉製作，帶出多啲細節。我稍後12月又再搞活動，已經構思緊，會同聖誕有關。」
