發佈時間：17:01 2026-10-01
今年30歲的陳若思（Amber），因參加熱播中的戀愛真人騷《女神配對計劃2》，而人氣急升！不過，在劇集《正義女神》中，她因用殘酷手段虐貓而入獄，由於演得入木三分，更加令觀眾留下深刻的印象。不過，她在現實生活中卻是一位愛心爆棚的「寵犬狂人」。
8年前，Amber迎接了比熊犬「乖乖」回家，從此每天的生活重心全部圍繞着牠轉，更視牠如親生囝囝般呵護備至。可是，她笑言：「原本打算買隻狗女返屋企，點知乖乖嚟到屋企，先發現竟然係一隻狗仔。」當年買回來時，乖乖只是一個像掌心般大小的雪球，一轉眼，已經成長為一隻重到差點抱不起的龐大毛孩；期間還啟發了她的人生觀及擇偶條件。
搞錯性別
談及當初為何選擇飼養比熊犬，陳若思（Amber）回憶起童年的時光：「我細個成日去表姐屋企玩，佢有隻比熊犬，我睇住佢大，一直覺得呢種狗狗好乖巧、特別惹人喜愛。嗰時，我就下定決心，如果將來要養寵物，一定要揀呢個品種。」經過數年的考慮，直到2018年工作穩定後，她才正式迎接屬於自己的毛孩。
有趣的是，這隻比熊犬由台灣送到香港時，還伴隨着一段烏龍緣分，Amber笑說：「嗰時，我係睇相，特別指定要女仔，因為覺得女仔較溫順，點知狗狗送嚟一個星期之後，朋友嚟到我屋企，跟住好驚訝咁問我：『你唔係話買狗乸咩？呢隻分明係公嚟㗎喎！』」當時店家表示可退換，但彼此早已建立感情，她表示：「我自己覺得呢啲係天意嘅緣分，既然佢嚟到我身邊，咁就係我哋之間嘅定數。」
張口咬人
由於是第一次養狗，Amber在教育上沿用了母親對自己的「放養」模式：「媽咪對我從小就係放任式嘅管教，所以我對乖乖都係咁，幾乎冇咩要求，做錯事都唔捨得鬧。」這種極度的溺愛，讓乖乖逐漸成為家中的「最高權力者」，她笑稱：「佢𠵱家8歲嘞，依然係我哋屋企嘅終極大老闆，我同媽咪平時都係俾佢食住。」
因為缺乏管教，所以帶來嚴重的後果。乖乖習慣睡在床尾，深睡的Amber，翻身時若踢到牠，防衛心極強的乖乖，便會張口咬人，她不諱言：「基本上呢種咬人嘅狀況，每年都會發生一次。」朋友都提醒Amber最嚴重的後果，可以是咬傷面而毀容，她亦意識到事態嚴重：「我發現唔可以再這樣落去，佢咬人嘅習慣一直冇改善，我先驚覺係自己嘅放任出咗問題。」
嚴格管教
為了矯正乖乖的壞習慣，Amber下定決心嚴格管教。首先，她禁止乖乖上床，命令牠睡在地上；跟着，又透過牽繩訓練培養其他習慣。經此一役，乖乖在短短一個月內便學會了遵守規矩，Amber感慨的說：「呢件事令我深刻反省，其實狗狗並唔係教唔會，純粹係我過去唔願意去教。」這段訓練經歷，讓Amber體會到生兒育女確實不易：「養咗乖乖之後，我就覺得好彩自己冇太早結婚生仔。如果我喺心態未成熟嘅時候生咗小朋友，恐怕都無法好好教育佢。經歷過養乖乖之後，我明白到將來如果有細路，一定要從小為佢定立清晰嘅規矩。」
在日常照顧上，Amber對乖乖的飲食十分細心。為了維持毛髮光澤，她每天早上煮水煮蛋時，總會把蛋黃分給乖乖吃，自己則吃蛋白，偶爾也會餵飼清淡少油的魚肉。面對離別的話題，Amber表示，目前健康活潑的乖乖，相信能活到18歲至20歲，她更對乖乖許下深情約定：「如果你走咗，你就轉世嚟做我嘅小朋友啦！」從懵懂主人到懂得立界線，Amber與乖乖的故事展現了人寵之間最真摯的成長與陪伴。
擇偶條件
今年Amber已經30歲，所以都有好多親戚朋友向她催婚，一向將乖乖視為孫仔的陳媽媽，總會幽默地回應親友：「我個『孫』都已經8歲啦！」Amber感恩地表示，有了乖乖陪伴母親，能讓自己更從容地規劃人生。
在談及未來的擇偶條件與感情觀時，Amber坦言，年輕時的自己偏好性格剛烈、能夠一起玩的異性，但經歷了幾段感情的沉澱後，她發現情緒穩定才是最重要：「我係一個情感好豐富而且情緒起伏比較大嘅人，有時好興奮，有時又好憂鬱；所以我需要一個EQ極高、性格完全相反嘅人嚟包容我、安慰我。就算其他人覺得對方生活好悶，我都完全唔介意，因為只有咁樣成熟冷靜嘅人，先可以畀到我足夠嘅安全感。」各位「求愛勇者」收到未？
延伸閱讀：《女神配對計劃2》俞可程被爆「容易受傷」 何沛珈鍾意「熟男」 陳若思海量擇偶要求
延伸閱讀：女神配對計劃2丨《三代同糖》吳兆麟向好友陳若思示愛 「呢個女仔Interesting！」
延伸閱讀：女神配對計劃2丨追求女神陳若思 吳兆麟真身唔惹少 同張凌赫因一件事結緣
