發佈時間：14:05 2023-11-14
現年39歲的藝人陳蕊蕊，一直把拍拖4年、從事飲食業的男友「E先生」當作「受保護動物」，為怕戀情見光死，堅持低調！
《東周刊》收到獨家消息，「E先生」已求婚成功，並將與蕊蕊在年底前結婚！快將「升呢」為人妻的蕊蕊大方承認婚訊，兼甜蜜分享求婚經過；然而，她卻坦言暫時拒絕「造人」，因為要集中精力擴展生酮食品生意，先建立飲食王國，才再增添家庭小成員。
泰國求婚
雖然是娛樂圈的性感尤物，但陳蕊蕊的感情生活不算多姿多采，令人津津樂道的，莫過於跟金剛的一段情，惟戀情只維持3年，最終在2016年分手。Dry足3年的蕊蕊，至2019年才被爆出，與從事飲食業的「E先生」拍拖，更曾被拍得出入市值千萬元的豪宅及駕駛40萬元的Audi。不過，她坦言為免戀情見光死，故堅持保持低調，把男友當作「受保護動物」，就連男友的名字都不願公開。
今年9月蕊蕊生日時，被問何時結婚？她隱晦地說雙方有共識，更笑指男友雖然是「直男」不懂製造驚喜，但她不會因此而主動求婚：「佢應該未去到咁被動嘅，哈哈！」言猶在耳，據知「E先生」在今年初就籌劃了一場「求婚大作戰」，並一擊即中！早前更孖蕊蕊秘密拍攝婚照，準備年底前結婚。
同「E先生」相戀4年
蕊蕊接受《東周刊》獨家專訪時，甜蜜承認婚訊，她憶述：「今年初，我同『E先生』去泰國旅行，同一班朋友book咗間villa玩。有一晚，佢突然喺成班朋友面前下跪求婚，俾咗一個好大嘅surprise我，令我好感動！因為佢性格戇直，平時唔會有驚喜，拍拖初時，就連情人節都冇準備。」
蕊蕊笑言自己天生是「不懂撒嬌的女人」，也不會把感情放在首位，但每次拍拖都會以天長地久為目標，和「E先生」相戀4年，「安全感」是令她願意長相廝守的關鍵。「無論喺感情上，或者日常生活上，『E先生』都令我好有安全感，我唔會擔心佢唔知去咗邊，又或者識咩人；同埋，佢好有交帶，好照顧我，生活上大大小小嘅事情都係佢打點，永遠都係擺我喺第一位。幾時生BB？暫時唔會咁快住，因為我想俾多啲時間喺生意上。」對於浪漫唯美的婚照中，新郎如「賭神」一樣，只見背部不見樣，蕊蕊笑說：「我男友好低調，佢叫做『E先生』，婚紗照係7月時喺香港影嘅。」
擴展版圖
易求無價寶，難得有情郎。覓得跟自己契合的伴侶，蕊蕊坦言非常珍惜，更感恩近年有機會在演藝界以外，闖出一番事業，除了和朋友合資開設居酒屋，更染指生酮食品生意，入股投資，而她更打算擴展事業版圖，計劃進軍海外市場。蕊蕊透露：「我唔係鍾意坐喺屋企、唔做嘢嘅人，之前都有喺內地工作，因為疫情而停咗，後來有朋友游說我入股做生酮食品生意。最大得着係發現唔止係做生意咁簡單，最開心係幫人改善健康，尤其係老人家。之前中秋，我派咗200盒生酮月餅俾老人家，宣揚無糖低碳飲食，就係想老友記食得健康。」蕊蕊決心先建立自己的飲食王國，至於製造「E」BB，相信「E先生」耐心地等一等吧。
