發佈時間：16:52 2026-03-28
湯盈盈的媽媽基因超級「霸道」，不單止令母女的樣貌似到十足十，還有大哥湯宇平（Anthony）亦餅印一樣。此外，盈盈擁有演藝細胞，而Anthony則擁有藝術天份，8年前，他因為不想浪費一套繪畫的工具，所以開始嘗試繪畫；而無師自通的他，作品深受歡迎，除了得到不少名人欣賞之外，就連多倫多大學的圖書館都掛有他的畫作。
單身的Anthony，現時與媽媽住在北角的半山，與妹妹盈盈為鄰，方便互相照應。走進他近800呎的寓所，儼如進入了一個畫廊，大幅、小幅各具特色，目不暇給！今年60歲，已經退休的Anthony，只要不用出外應酬，就會待在家裏寫毛筆字或繪畫，享受慢活人生。
頂尖學府畢業
今年「登六」的湯宇平（Anthony），是湯盈盈的親生大哥，他還有一個小兩歲的弟弟住在加拿大。每年的冬天，Anthony就會由加國返港避寒，直至夏天，他又會與媽媽飛回當地，他笑說：「冬天嘅加拿大會落大雪呀，好鬼凍，梗係返嚟香港啦，而且差唔多都係新年時間，啲朋友都好需要我幫手寫揮春，所以每年我都係香港同加拿大兩邊走。」
在加拿大魁北克省頂尖學府McGill大學金融系畢業的Anthony，曾經在香港的銀行任職10年，之後因為覺得工作性質不太適合自己，於是又返回加拿大開餐廳；期間，他在飲食生意上跌跌碰碰，結果損手幾百萬。然而，他沒有氣餒，東山再起又在當地開酒吧；可惜又遇上疫情，被逼結業。2021年，湯爸爸患病離世，剩下湯媽媽一人在港，身為孝順仔的Anthony，便回港陪伴，他憶說：「其實間酒吧執咗之後，我就直接退休，選擇咗返嚟陪媽咪。𠵱家我退休都好忙㗎，幾乎晚晚都要出去同朋友食飯，我阿媽又鍾意玩，我哋兩個經常一齊出去，都幾開心！」
天馬行空創意
8年前，Anthony因為買了一套繪畫工具送給女友，可惜對方一直將它閒置；於是，Anthony便開始了他的繪畫生涯：「當年，我見到我買俾佢嗰啲工具，擺咗喺度，我唔想浪費，於是咪試吓畫畫囉，越畫越有興趣。我冇跟任何老師學畫畫㗎，如果要講我喺邊度學，我可以話俾你聽，我只係間中睇吓YouTube，睇吓人哋嘅畫畫方式，再加入自己嘅元素囉。」
在約800呎的寓所中，Anthony掛滿了自己的畫作，他表示香港加上多倫多的畫作，已經儲了一百多幅，但沒有興趣開畫展；不過，當他儲夠了一定的數量後，會計劃推出畫集。在偏廳中，他掛了一幅糅合了西方油畫和中國山水風景的畫作，極具創意，將香港這個石屎森林變成群山峻嶺，確實令人意想不到，他解說：「我唔想畫出嚟嘅畫千篇一律，加上自己天馬行空嘅創意令到畫作更有生命力。我有啲畫作都喺New Market市嘅Elman W. Campbell博物館展出。另外，我亦捐咗兩幅畫俾多倫多大學嘅利銘澤圖書館，有咁多人欣賞，非常開心！」
兄妹感情要好
Anthony與妹妹湯盈盈的感情要好，他如果沒有和媽媽出外應酬，兩母子就會到妹妹的家一齊食晚飯；還有，大夥兒亦會一起出外遊玩，他坦言：「我哋住得咁近都幾方便照顧，同埋我哋細個都係感情好好，成日整蠱佢。8、9歲時，我就離開香港去讀書，冇一齊相處，唔好睇盈盈𠵱家短頭髮成個男仔頭咁，以前佢係長頭髮，仲要長到落腰，好靚、好女仔，成屋公仔，我好錫佢、買好多玩具俾佢添。」兄妹情深，Anthony講到滔滔不絕。
延伸內容：明星兄弟姊妹 神秘真身曝光│關嘉敏姊係商舖女神│周柏豪弟係爆肌髮型師
延伸內容：錢嘉樂湯盈盈睇《夜王》前秘密進「保」見熱情粉絲「集郵」來者不拒
延伸內容：對錢嘉樂一見鍾情 湯盈盈甘為老公做咕喱
《東周網》訪談系列節目《星桄伴我心》3月重磅嘉賓：
即睇：「葵芳」蔡蕙琪爆拍《夜王》｜要剔「親密程度」點心紙｜與謝安琪秘密淵源｜感動黃子華搭膊頭鼓勵
立即追蹤《東周刊》全新WhatsApp頻道，緊貼全城熱話、突發猛料、獨家消息！
