發佈時間：09:00 2026-08-23
今年40歲的朱智賢（Ashley），自幼便與小動物結下不解之緣。從3歲時家中出現的第一隻黑狗，到相伴17年半的松鼠狗Donut，寵物早已成為她生命中不可缺少的伴侶。
兩年前，Donut的離世曾讓朱智賢痛徹心扉，甚至一度立誓「此生不再養狗」。然而，命運卻給她安排了一場奇妙的邂逅—遇上了精力過剩、性格「瘋狂」的法國鬥牛犬Taco。這隻笑料百出的新成員，不僅用牠那近乎過度活躍的愛，治癒了主人的喪犬之痛，更讓她在傷痕纍纍的「家暴」日常中，重新找回了久違的笑容與人生的意義。
體驗「人母」
朱智賢（Ashley）的養寵物生涯始於童年，3歲那年家裏突然出現了一隻黑色的狗寶寶，她憶說：「我唔記得係唐狗定係洛威拿，只記得佢係黑色嘅。」印象中，那隻狗的身形龐大，比起年紀尚小的她還要高：「其實係驚嘅！我記得佢身形係好龐大，好似仲高過我，所以成日都會好驚佢會進擊我，但𠵱家諗番起覺得好傻囉。」除狗狗外，她的小時候還充斥着兔仔、雞仔、倉鼠、雀仔等各式各樣的小動物。不過，她坦言，自己那些年主要負責同寵物玩耍，而負責照顧牠們的其實是家人。
真正讓Ashley體驗到「為人母」責任的，就是在新西蘭留學期間，開始飼養的松鼠狗Donut。畢業後，她還帶着Donut返港，見證她人生中每一個重要的里程碑：「佢陪住我大學畢業，接住出嚟社會工作，跟住去選港姐，再加入同離開埋TVB，佢都喺我身邊，所以我覺得佢真係陪伴咗我好多人生唔同嘅階段。」同以前依賴家人的情況不同，Donut 讓她真正學會了付出，「佢真係我一手一腳湊大。跟住到佢年老，仲要不斷咁餵佢食藥、帶佢睇醫生，真係好似媽媽照顧小朋友咁。經歷咗一段好艱難嘅日子，所以同佢嘅感情係好深厚。」
隨着歲月流逝，Donut的身體逐漸走下坡；而為了能夠在牠離去時守候在側，Ashley甚至不敢輕易出外旅遊。那一天終究還是來臨了，Donut因腦部問題在最尾一晚抽筋不停，緊急送院後，獸醫也束手無策，Ashley只能強忍悲痛放手。雖然整個過程她都寸步不離地陪伴着，但 Donut的離去依然帶給她毀滅性的打擊，她忍着淚說：「Donut走咗之後，我就一直留喺醫院度唔想走，真係唔想走，我抱住佢，心會諗：『唉，即係從此就⋯⋯就係咁分開咗。』」
那一夜，由於哭得雙眼紅腫，當時正擔任電視節目主持的Ashley，不得不臨急向監製請假，她憶述：「我同監製講話，其實我唔介意出鏡嘅，但我個樣會變咗豬頭咁樣。」之後，她獨自關在留有愛犬餘溫的家中，她眼泛淚光的說：「全日喺屋企，都係崩潰狂喊囉。」過去的習慣瞬間被掏空，她形容那段日子：「好唔習慣返到屋企冇隻狗狗喺度，跟住又唔習慣瞓覺床邊又冇隻狗，即係好似少咗人生意義咁。」她甚至一度立誓：「直情係諗住以後呢生呢世都唔會再養狗，因為嗰段時間實在太辛苦。」
「非虎媽媽」
而命運卻安排了一場奇妙的邂逅，一位朋友因缺乏經驗且生病，故無暇照顧一隻年幼兼腹瀉長達一個月的法國鬥牛犬，暫託給Ashley。後來，朋友便提議將狗狗正式轉讓給她，這隻新成員就是Taco。
如果說Donut是溫柔貼心的紳士，那麼Taco就是一個不知疲倦的「瘋狂惡魔」。對着Taco，Ashley大呼難以招架，更經常開玩笑說自己正在經歷「家暴」：「因為佢試過撞爆咗我個嘴兩次啦、跟住踩瘀我隻腳，細個又咬到我隻腳損晒，跟住早幾日仲咬爆咗我隻指甲囉。」不過，也正正是Taco這種排山倒海般的瘋狂活力，硬生生地將Ashley從喪犬的陰霾中拉了出來，她說：「佢會令我開心番嘅，就連我媽咪都話：『你邊有可能會唔養狗呀？你咁鍾意狗！』可能媽咪見到我對住狗嗰種笑容嘞，因為我一見到佢哋我就好開心。」
談及養狗多年的心得，Ashley大方分享了自己與眾不同的育犬理念。與坊間許多嚴格限制飲食的主人不同，她自封為「非虎媽媽」，並實施「All You Can Eat!」的放養政策：「佢鍾意食咩我就畀咩佢食，當然唔會太鹹同太油啦！我覺得，又唔使太過管束。」Ashley表示，Donut亦品嚐過許多人類食物：「麥當勞薯條、麥樂雞、漢堡包，我都有畀過Donut食㗎。另外，三文魚刺身、牛扒、牛腩、叉燒、蛋撻，仲有蛋糕、雪糕。人哋聽到都覺得好瘋狂、癲嘅，佢真係有食呢啲嘢，而佢都真係個年紀都唔短啦，17歲半。」
Ashley認為，保持愉悅的心情才是狗仔長壽的真正秘訣：「最緊要啲狗狗要保持開心囉。即係佢哋得閒食下呢啲嘢，其實佢哋都好開心。咁我覺得，好似人咁，個人開心自然都會長命啲、健康啲。」
延伸內容：朱智賢甩拖後大解放 峇里真空上陣派福利 自滿表示：「寶刀未老」
延伸內容：愛犬出事愁爆 謝東閔絞腦汁𠱁朱智賢
