更新時間：13:14 2026-08-19
發佈時間：13:14 2026-08-19
發佈時間：13:14 2026-08-19
恐龍，唔一定係擘大個口，追住人嚟咬，亦可以走可愛路線，甚至被迫害。唔信？暑假壓軸推出嘅《汪汪隊立大功：恐龍大電影》（Paw Patrol:The Dino Movie）有辦你睇。
電影系列嚟到第3部，今次汪汪隊意外發現一座神秘恐龍島，當佢哋friend到教恐龍BB點樣咆哮時，宿敵韓丁納市長就搞搞震，搞到睡火山爆發，威脅恐龍存亡，汪汪隊要出手相救。係，的確好大劑，不過小朋友記住睇得幾肉緊都好，都唔好踢櫈。
電影改編電視劇
加拿大電腦動畫電視劇《汪汪隊立大功》，自2013年啟播以來大受歡迎，乘勢推出電影版。第1部講城市冒險，第2部玩超級英雄題材，今次就以恐龍為主題。大家熟悉嘅汪汪隊成員，包括阿奇、天天、毛毛等全部歸隊，仲新加入咗一隻被困島上多年、現已成為恐龍專家嘅小狗樂樂。
教小恐龍咆哮
恐龍畀人嘅印象生人勿近，何況狗狗同佢哋體形相差太遠，照計傾唔到偈。呢一方面，導演兼編劇Cal Brunker好有創意。
「我哋想探討一下，如果一隻小狗養了一隻小恐龍會發生咩事呢？今次故事有一隻搶眼嘅恐龍『火龍果』，佢好曳，仲未學識點樣咆哮，於是班狗狗就諗盡方法教佢，佢仲同毛毛建立起一段深厚情誼㖭。」
配音陣容強勁
配音陣容有珍妮花赫遜、Paris Hilton等，當中憑新版《捉鬼敢死隊》走紅嘅麥肯娜姬絲 （Mckenna Grace），就聲演飛行員小狗天天，佢話：「我鍾意套電視劇，可以喺大銀幕上面睇套戲好正，我哋有火山、有恐龍，好多大陣仗嘅動作場面，令我好期待。」
Backstreet Boys就為電影唱新歌〈Bottle Up〉，佢哋話咁樣可以喺子女面前威威，加晒分。
上映日期：8月20日
最Hit
