更新時間：17:58 2026-08-18
發佈時間：17:58 2026-08-18
發佈時間：17:58 2026-08-18
TVB節目《中年好聲音4》總決賽將於8月23日假啟德體藝館舉行，由車婉婉擔任主持，肥媽（Maria Cordero）、張佳添、周國豐、海兒及谷婭溦擔任評審，李克勤與巫啟賢出任嘉賓評審。有份擔任評審的肥媽（Maria Cordero）連日來就被追問對7強尹景順、吳亦偉、尤淑情、許雲妮、許美琪、蔡宓婕及鄭家聲，哪一個是她的心水選手，睇好邊個同邊個，不過肥媽就守口如瓶，拒絕透露！
自認係烏鴉口 唔敢貼邊個會勝出
上周日(8月16日)肥媽出席好姊妹黑妹姐李麗霞主辦的「星星遊學園」演藝文化學校活動時，東姑就不嫌其煩地問多肥媽一次，佢就話：「我真係烏鴉口嚟，千祈唔好畀我貼，我真係貼邊個衰邊個，我已經試過好多次，當我睇到邊個綵排時狀態好好，咁嗰個人就會發台瘟，所以周國豐都叫我千祈唔好講嘢，所以我呢家都唔敢講嘢，去到呢度，個個都係咁好，個個都唱得同表演得，我哋呢家唔係挑剔佢哋唱唔唱得，而係挑佢嘅小毛病，所以當晚都真係好難揀。」
肥媽孖黑妹姐登台揾真銀
另外，有指《中年好聲音4》後會停辦一年，讓台前幕後工作人員好好休息，提及此事，肥媽就好興奮咁話：「佢一話停一年，我立即周圍打電話去揾人，通知啲人，我可以嚟喇！我可以嚟喇！我周圍去登台揾真銀，不過我都真係好多謝《中年好聲音》停一陣，但唔好停晒。」而好姊妹黑妹姐就笑言，自己好有義氣，將會陪住肥媽一齊去周圍登台，拍住上揾銀。肥媽聽完黑妹姐義氣之談，她就搞笑咁話：「你有咩義氣呀 ? 我喺度做嘢嘅時候，你喺邊呀？你自己去咗登台喎！」肥媽被問到若然《中年好聲音 5》開波，會否推薦好姊妹黑妹姐一齊做評審，肥媽就話：「之前都有叫佢上去做知音人，但揾邊個做評審、邊個做評判，就全部都係公司決定。」
最Hit
