發佈時間：09:00 2026-08-18
本月2日，楊明與莊思明結束10年愛情長跑，於吉隆坡舉行盛大婚禮，近百名藝人好友到場祝賀。大婚之喜舉行完未夠一星期，兩夫妻便馬不停蹄返港，出席《愛•回家之開心速遞》的大結局派對。
留港3日後，楊明又火速飛回吉隆坡，並現身自己有份投資、剛開張的「豐六道 」港式燒味店助陣。當目睹食店門口排了一條長人龍，他即時喜上眉梢，兼馬上化身吉祥物，與現場的一眾食客拍攝合照，非常親民！喜事一單接一單，不知道楊明何時再報「造人」成功之喜呢？
籌備半年
現年45歲的楊明表示，吉隆坡的食店「豐六道 」，於上周五（14日）正式開張，之前是試業階段，因為自己由細到大都喜歡食燒味，再加上與莊思明結了婚的關係，就等於有半個家在大馬，所以也嘗試在當地搞小生意。適逢，當地的朋友也有興趣，所以一拍即合。他再透露，跟合夥人用了半年時間去籌備：「因為我有帶香港嘅師傅過去嗰邊，然後又帶咗協助大廚嘅員工，飛來香港，試咗好多香港出名嘅叉燒、燒鴨，起碼要畀佢哋知道個味道係點，跟住就開始搵舖。」
食店已開始試業
楊明又表示，店舖由朋友負責尋找，最後選址在吉隆坡比較多美食的地區。上月17日，食店已開始試業，但每日只營業3至4小時，以及製作多少就賣多少，他娓娓道出因由：「我最主要嘅目的係想了解多啲，因為馬來西亞嘅口味同香港有啲唔同，我想睇吓佢哋食落有啲咩意見，跟住可以調校。其實，喺結婚前，我已經成日都落舖頭，一路都有問啲食客，睇吓有啲咩要改善，真係攞咗好多寶貴嘅意見，例如：出餐嘅流程令到啲飯凍咗，我就即刻入去廚房傾吓點執，呢啲意見好大幫助。」並非第一做生意的他，當真經驗老到！
談到身為藝人在當地開店的好處與壞處？楊明分享說，藝人身份的優勝之處，就是很快讓當地人都知道自己開舖，但弊處也是相對，因為若然品質不好的話，很快便會眾所周知，所以最重要是處理好食物的品質和店員的待客之道。
楊明曾在香港開燉湯店，問到下一步是否也會將燉湯帶去吉隆坡？他不諱言，這早已在計劃之內，其實燒味店的餐單中也有燉湯，但現時最重要的是先經營好這間店：「因為啲人慕名而嚟，排咗好多個鐘頭隊，我唔想我啲出品唔得，令到佢哋失望。」滿腹大計的他，期望日後能在大馬不同的地方，開設更多分店。
吸收功力
對於《愛•回家之開心速遞》的大結局，楊明坦言也有不習慣，因以前隔日就要返工；不過，他透露稍後將會去中山出席活動，另9月中便會開拍新劇。
工作那麼忙碌，何時才可與老婆思明去度蜜月？楊明直說，老婆現時也在拍新劇，之後輪到自己開劇，所以最快可能要等到年尾或下年的年頭：「我哋都有個共識，就係做完手頭上嘅嘢，有時間就可以即刻去，地點我哋都商討過，大家都鍾意去好凍嘅地方，咁時間上應該會係冬天。」
爭取演出
此外，提到他出席周星馳（星爺）的新片《功夫女足》，在大馬舉行的首映禮，並高調向星爺爭取演出機會。楊明解釋說，這是當地傳媒叫他sell自己；其實，身為星爺粉絲的他，也非常希望能夠與對方合作，更表示就算不做幕前，在幕後幫他執頭執尾也願意：「大家都知道佢係好畀心機去拍電影，無論佢之前做幕前或者𠵱家做監製，佢都係好有自己嘅諗法，同埋令電影有好大嘅進步，所以跟到佢唔單止係做幕前，就算做幕後喺佢旁邊聽吓，佢點樣理解劇本同對白，其實都可以吸到功力。」楊明的心聲，相信星爺會聽到的！
