發佈時間：17:37 2026-08-17
近半年睇戲，見安妮夏菲維（Anne Hathaway）嘅次數都幾多，一時《穿PRADA的惡魔2》，一時《奧德賽》，嚟緊仲有套《末世橡樹街》（The End of Oak Street），講佢同老公伊雲麥葵格（Ewan McGregor）一覺瞓醒，發現所住嘅社區離奇穿越到恐龍橫行嘅時代。
佢哋成頭黑人問號，同外界又中斷聯絡，可以點？唯有帶住一對仔女絕境求生。安妮笑笑口話：「比起我跟住Miranda（《穿PRADA的惡魔2》嘅時尚女魔頭角色）返工難捱好多倍。」
靈感來自經過車房
《末世橡樹街》由擅長製造緊張氛圍嘅J.J.艾布斯（J.J.Abrams）監製主理，導演係拍過《鬼上你的床》（It Follows）嘅大衛羅拔米切爾（David Robert Mitchell）。大衛透露拍攝靈感來自有日散步時，經過一間車房，周圍有鐵絲網圍欄同垃圾桶，「我當時就諗，如果嗰度有一隻恐龍，你話會幾過癮呢？」
欣賞導演終可合作
今次係安妮夏菲維繼《星際啟示錄》後，再度挑戰穿越時空題材嘅電影，加埋《侏羅紀公園》元素，腦海即刻有恐龍怒吼嘅畫面。安妮話當年睇完《鬼上你的床》，好欣賞導演大衛，即刻相約見面，一傾就3粒鐘。「直到某日，我收到劇本，心諗等咗咁多年，終於有合作機會，點知原來大衛要送我去一個斷水斷電，門外仲有恐龍四圍走嘅世界，哈哈！」
夫妻同心保護子女
雖然好似大整蠱，但安妮其實好buy個故仔，認為描寫一個瀕臨破碎嘅家庭，喺末日危機中重新學會彼此信任、依靠同珍惜，呢份親情好動人。至於喺《星球大戰》系列中飾演絕地武士嘅伊雲麥葵格，喺冇光劍、冇原力嘅加持下，盡力保護妻兒，值得salute。
上映日期：8月13日
延伸內容：《末世橡樹街》（The End of Oak Street）新片介紹｜安妮夏菲維、伊雲麥葵格、Maisy Stella、基斯頓康華利主演，大衛羅拔米切爾執導
