更新時間：15:48 2026-08-12
發佈時間：15:48 2026-08-12
發佈時間：15:48 2026-08-12
冇比較冇傷害。當樓上鄰居兩公婆晚晚打得火熱，「噪音」擾民，住樓下嘅一pair毫無激情，只會事無大小針鋒相對，換轉係你，想唔想八卦一下婚姻美滿嘅心得？
《誘人飯聚》（The Invite）故事背景正正如此。薛夫洛根 （Seth Rogen）同奧莉菲亞懷特 （Olivia Wilde）互相睇唔順眼，喺好奇心之下，佢哋邀請恩愛到暈嘅愛德華諾頓 （Edward Norton）同彭妮露古絲 （Penelope Cruz）食餐飯。傾傾下，有人大膽提出建議。睇嚟，想挑戰道德咁話喎！
婚姻「計時炸彈」
結婚十年八載，老夫老妻，自然就會進入婚姻倦怠期，好多問題日積月累，唔去溝通處理，結果就好似計時炸彈，《誘人飯聚》就係探討呢個問題。此片改編自2020年西班牙電影《The People Upstairs》，《與神同行》型男河正宇去年亦曾自導自演，拍成韓國版《四人行，不行》，仲搵埋孔曉振演出。
全片幾乎只得一個場景，就係一間屋，加上四位主要角色。四位主角隨着兩杯落肚，連環試探，場面逐漸失控，話題扯到去性慾差異、婚姻忠誠等禁忌。
兩女即興吻戲
奧莉菲亞懷特除咗有份演出，仲身兼導演。片中有一幕佢同彭妮露古絲錫錫，原來係彭妮露即興。奧莉菲亞話：「當時我個腦一片空白，成個人呆晒，失去控制，我實在太愛彭妮露喇！佢戴上假髮嘅一刻，徹底變成第二個人。」
提到拍攝前嘅準備工夫，愛德華諾頓透露：「我哋會圍埋一齊坐低傾偈，期間彭妮露提及更年期，然後佢就寫咗段相關對白。另外，如果大家有睇過《洋腸派對》（Sausage Party），就會知道我同薛夫之間好有火花。」
上映日期：8月13日
延伸內容：《誘人飯聚》（The Invite）新片介紹｜薛夫洛根、奧莉菲亞懷特、彭妮露古絲、愛德華諾頓主演，奧莉菲亞懷特執導
最Hit
