富商劉鑾雄今日（10日）突然舉行記者會，就近日內地網上瘋傳的文章作出回應，當中包括指大劉出現「分產風波」，大劉就種種傳聞逐點擊破，包括有傳投資恒大虧損、陳凱韻（甘比）投資失利等。大劉開波，非同小可，爆seed金句，句句都有punch line，精彩度好比棟篤笑，長達65分鐘的「Big Lau開Talk」內容，一刀不剪，足本放送！

記者會現場，吸引大批記者採訪，現場所有記者需要戴上口罩，大劉澄清太太甘比沒有對公司構成200億元損失：「佢同我賺超過200億藝術品投資就有！如果有損失，都係我自己決定，完全唔關佢事。但啲人點解咁講呢？」

大劉在記者會上狠批某人是「賤人」，記者問是否指呂麗君（現名呂姵霖），他即說：「我冇講邊個，你唔好捉蟲。」後，續說：「有啲人越嚟越離譜。我好後悔幫個賤人，仔女嗰阿媽唔想破產，早知寧願佢破產。駛錢事少，幫佢好閒，但佢就用啲網上打手，搞啲咁嘅嘢，睇返轉頭，幫佢破產好過。」，又指：「佢最叻就係陰陰濕濕做嘢，揾律師開張傳票夜晚11點俾我」、「佢全家係納米型賊仔，你知咩叫做納米型？即係賊仔，全家冇一個好人！」。

大劉更大罵「賤人」投資「無腦」：「佢以為好精，其實蠢過隻豬，豬頭炳嚟，佢最蠢以為做乜嘢人哋都唔知，好似駝鳥政策，將個頭埋喺沙裡面，睇唔到人，人哋又睇唔到。買埋啲Accumulator，I'll kill you later！」

「你阿媽仆街嚟！」

表示後悔幫手的大劉，說目的是不想子女心靈受損，他說曾在子女面前講：「你阿媽仆街嚟！」「唔係救佢1次，連埋呢次，救咗佢3次。佢阿媽（賤人）最叻儍笑講唔記得，扮好X nice，扮無知。我冇呃你㗎！咁X賤咁壞嘅人都真係未見過。」

大劉指早年有工作多年的員工辭職，「賤人」要求大劉給該員工幾百萬，但最終發現該員工冇收過！他說：「1支牙膏、1張單都claim 3次。唔止牙膏claim 3次，喺超級市場地下啲單，佢都執嚟claim，你估我唔知咩？買咗個名牌袋，平價賣返出街，我講大話，就絕子絕孫，幾個仔女養唔大。」

大劉說：「聽聞個賤人最近去新加坡，冇人識佢㗎，自己招搖撞騙，人哋見到佢都驚咗佢。我夠可以喺電視同拜登合照、P圖話佢企喺我隔嚟啦！以前台灣有套電影叫《養鴨人家》，佢唔止係養鴨人家，仲係養鵝人家，你哋知唔知鴨同鵝分別？鴨，只係做女人生意；鵝就男人生意又做、女人生意又做。依家佢做埋養鴨人家，不過佢嘅私生活，就唔關我事。」

「我點解咁講呢？你睇吓呢叠嘢（指手上造謠的資料），完全0.001事實都冇，夾硬作出嚟老屈，我再唔出聲，即係默認。我老婆陳凱韻叫我唔好嚟，佢話：『使乜理佢吖，佢自我陶醉之嘛！』等於咁，有一日有人要殺我屋企人，唔好講我係咪跛，我係跛係殘廢，我都要保護屋企人！啲人造謠造到咁，傳到我就嚟死添啦！」

大劉續說：「啲人話我娶咗陳凱韻，佢阿媽換咗個腎畀我，所以我要報恩娶佢做老婆，哈哈哈！呢啲真係好好笑，哈哈！我換腎都搵個後生啲吖，搵個老人家換，希望一年換一次咩？呢啲謠言全部都係呢個賤人作出嚟，有網絡打手。佢好精㗎，喺香港出好易俾人睇到佢出，所以喺大陸出，我check晒出嚟。」

唔分身家畀『賤人』：我長命一萬歲佢都冇機會！

對於分身家傳聞，有指轉移轉資產給兒子一事，大劉坦言：「完全冇咁嘅事，全部係假。又話全部財產轉畀個仔，甘比踢出局，點解要咁講呀，自己開心囉，希望有人信，有一樣要重申，陳凱韻我老婆從來無同我蝕過錢，佢藝術賺到錢，同我賺咗超過200億。點解佢叫我唔好理，唔想今次開記者招待會影響到某個仔同女，我都無辦法，即係如果要入屋殺我屋企人，我跛咗癱咗，我都垂死掙扎，垂死嘅反抗啦！」

他表示已立好遺囑，因為老婆陳凱韻及子女會聽從其安排，問到會否分給「賤人」：「賤人梗係唔會啦！你呢個問題都有少少問題！我長命一萬歲都冇機會啦！佢實破產㗎！貪到死，乜嘢都要借，你睇佢買嗰個晉環，畀10% deposit，畀15%政府！（『賤人』嘅仔女有冇得分？）可能我俾老婆決定、或者俾老婆嘅仔女決定。因為我驚分畀佢哋（『賤人』子女），驚賤人會食埋。好似之前《東張西望》，有個肥婆，最終連個仔間公屋都貪埋。」

「你知唔知點解我要分定家產呀？當我喺醫院，佢上嚟睇我死唔去，唔夠兩分鐘就走咗，佢知我唔死得，仲同記者講同我扮close。我即刻同陳凱韻結婚，點知要分身家先有保障。律師仲講我分咗就冇，我答：『我寧願分畀我而家睇錯嘅人，我都唔願分畀呢個人！』」

接班人人選：唔一定係長子

被被問到其事業王國的接班人是誰，大劉說：「有都唔話你聽，能者居之，唔一定係長子，我哋普通生意仔。」他引用范冰冰主演的電視劇《武則天》的劇情，最終由幼子當皇帝，免兄弟相殘。

為捍衞家人豁出去的大劉，更自爆日前被「問候」：「早兩日朋友約我出嚟食嘢，佢話：『Joe哥，你有冇事？出面斷傳你身體好差，就嚟死？』我俾人激死就有。」向來是《愛回家》粉絲的大劉，被問到有否繼續收睇，他說間中有睇，笑指某女演員「硬膠」：「笑起上嚟硬膠，塊面唔識郁，女嚟嘅，人都係為咗揾食！」