發佈時間：16:18 2026-06-25
現年33歲的蘇韻姿（Andrea），在2016年為追尋演藝夢，不惜隻身從加拿大飛回來參選港姐。入行後，她憑着無綫處境劇《愛•回家之開心速遞》中的「熊心如」一角，成功「入屋」，直至前年約滿後離巢。
輾轉在港10年，Andrea縱使結交了不少好友，但夜闌人靜、孤單一人時，她難免倍感寂寞。直至在2020年，Andrea終於有緣跟法國鬥牛犬Otis相遇，自此人狗相依為命，她直言︰「佢係我香港唯一嘅家人、又係深愛嘅男士，更加係我嘅仔。」生活因此變得多姿多采。
唯一家人
在大學時修讀戲劇及音樂，蘇韻姿（Andrea）的夢想一直是當演員，於2016年她孤身來港參選港姐，並勇奪殿軍，成功入行圓夢。至今留港10年，無論工作上有多辛酸，她都挺得過，反而因為思念加拿大的家人，令她倍感悽戚，故嘗試申請領養寵物相陪，但卻多次遭拒絕。
至2020年疫情時，她終跟法國鬥牛犬Otis結緣：「我朋友隻狗生咗ＢＢ，當時有一隻，有人唔要，我就要咗，嗰隻就係Otis，當時得3個月大。我改佢呢個名，一來係我高中時睇電視劇嘅男主角名，二來係一間𨋢公司名，幾有趣。正啱佢嗰樣惡惡哋，實則係儍豬豬個性。」
自從有了Otis後，Andrea因為要花時間照顧及訓練牠，不單止生活過得相當充實，就連空虛的心靈也獲得修補。她分享說︰「當時疫情，我每日開工都驚受感染，同時又好擔心外地嘅家人，情緒比較波動。在世界紛亂嘅時候，我帶佢去狗公園玩，見佢咁開心，原來簡單都好快樂，我自己都療癒埋，好放鬆。而聖誕節時，我特別思鄉掛住家人，喺度喊，佢好似感應到我唔開心，好自然伏喺我身邊安慰我，令我平靜落嚟。所以，佢係我香港唯一嘅家人、又係深愛嘅男士，更加係我嘅仔。」
最強搗蛋
Andrea相當喜歡小動物，Otis是她的第二隻愛犬。15歲時，她在加拿大讀中學期間，有一日，媽媽帶了隻ＢＢ芝娃娃回家。由於當時潮流興玩搖搖，故Andrea為牠取名「Yoyo」，並肩負起照顧牠的責任。她大讚Yoyo是一隻聰明神犬：「加拿大冬天好冷，平日Yoyo好乖，但有日不停對住地庫狂吠，我哋發現原來水喉爆咗，於是即刻去關總掣。另外一次，Yoyo又對住個窗吠，原來通知我哋，出邊有蜜峰巢。可惜，我陪咗佢7年就嚟咗香港，早幾年，佢14歲年老走咗，我遺憾冇返加拿大陪佢。」
比起Yoyo，現年6歲的Otis則最強搗蛋，Andrea笑說︰「Otis好活躍，試過喺屋企跑來跑去撞到電視櫃，令電視機差啲跌落嚟，最終我要搵師傅將電視機掛上牆。佢好hyper，我鬧佢，佢唔驚，仲越鬧就越興奮，我就崩潰到喊。所以，我轉咗唔鬧，若果佢做啱，就勁鼓勵！」
玩謝「契媽」
由於演藝工作時間顛三倒四，Andrea有時要出差工作，便找來Otis的「契媽」朱智賢幫忙託管。結果，Otis在「契媽」家中繼續搞破壞，咬爛不少用品，激到朱智賢拍片上網兼問Andrea：「Can I kill him? Super naughty!（我可唔可以殺咗佢！真係超級曳！）」 不過，Otis轉頭便會冧掂「契媽」補鑊。
隨着Otis到來，增添Andrea不少樂趣，轉眼間牠長得肥肥白白，至今有成12公斤。當日在烈日當空下，牠由Andrea帶到寵物餐廳，因為有冷氣，而變得精神奕奕。可是，當到戶外走動時，牠則熱到不停伸脷，走了一會，便趕急返回室內「躺平」，十分搞笑！Andrea強調湊一隻已經夠晒數，因為稍後要為舞台劇擔任服裝設計，緊接又要飛回加拿大探親，相信到時Otis又要交給「契媽」打理。
延伸內容：黃浩然加盟長壽音樂劇《我們的青春日誌》 蘇韻姿重演收兵娘娘Nancy擦出新火花
延伸內容：蘇韻姿離巢密密做 拍首部處女電影 任HOY TV主持再添食
