發佈時間：12:48 2026-06-24
為慶祝「華星唱片」成立55周年，特意製作「星塵55」特輯，今次邀請90年代最具代表性的組合「華星三寶」—梁漢文（Edmond）、陳奕迅（Eason）與楊千嬅。三人難得相聚，一坐低即雞啄唔斷，由昔日同車辛酸講到拍廣告時的街頭趣聞，更互爆多年來從未公開的瘀事，笑聲滿場。
楊千嬅最早起身最遲唞
三人首次相遇於1995年「新秀歌唱大賽」後，隨華星大隊出席慶功派對，同場還有許志安、鄭秀文等師兄師姐。其後三人經常共坐保姆車穿梭港九為工作宣傳，陳奕迅回憶車程編排，直指楊千嬅最刻苦：「佢要自己化妝，早兩個鐘起身，公司車第一個接佢，再去九龍接梁漢文，最後過海接我——因為華星喺灣仔。收工掉返轉，先放低我，千嬅最遲落車，返到屋企仲要落妝，即係最遲休息，好慘！」楊千嬅聞言笑指：「乜我咁慘咩？嗰陣有得做就好好喇！」
梁漢文車廂「奶茶特技」
陳奕迅大爆梁漢文在保姆車上的獨門絕技：「佢出名喺車食嘢，杯奶茶唔會倒瀉，落糖攪拌，轉彎剎車都零失手，高超到不得了。」梁漢文即場繪形繪聲附和，連主持人都忍俊不禁。楊千嬅則補充，試過全車坐滿歌手齊齊出騷，逼得「要夠瘦先得，個個縮埋一舊」，場面狼狽卻充滿回憶。
「華星三寶」源於街頭小食
「華星三寶」外號乃當年高層吳雨一時戲言，靈感來自街頭小食「煎釀三寶」。梁漢文說：「嗰陣我哋差唔多時間派歌，一齊上唔同節目宣傳，成日都三人同行，然後就醞釀咗《大激想》出嚟。」楊千嬅自豪地說：「我哋好勁㗎，乜嘢舞都識跳，鳳陽花鼓都跳過！」Eason與Edmond隨即手舞足蹈重現舞步，千嬅笑稱：「𠵱家關節唔係好掂，跳唔到喇！」
踎街揭雜誌驚見「不和」
1998年，梁漢文以師兄身份帶領師弟妹合唱可口可樂廣告歌《大激想》，延續華星傳承精神。拍攝通宵當晚，陳奕迅與梁漢文踎在西環電車站無聊揭雜誌，竟見到寫他們「不和」的報道，當場笑到收唔到聲，如今回望更覺荒謬。
華星如音樂學校幕前幕後像一家
梁漢文總結，華星有一種獨特氛圍，像一間音樂學校，有系統地透過歌唱比賽，多年來推出無數唱片，一代一代傳承，維繫歌手之間的感情。陳奕迅補充，連幕後團隊都像舊同學般親切：「返到華星就好似返學咁。」三寶難得聚首，既笑談舊事，亦見證這個廠牌如何以人情與傳承，砌出香港樂壇的黃金時代。
延伸內容：楊千嬅驕傲「我係潮州人」: 重返故鄉汕頭感動 烈女精神就係承傳「家己人」精神
延伸內容：BIG FOUR開騷│許志安 梁漢文 蘇永康 互嘲 張衛健曬「樂悠咭」笑爆全場
