發佈時間：14:34 2026-05-02
「THREE IN LOVE草蜢演唱會2026」昨晚（1日）舉行第5場，鄭伊健、鄺美雲、谷德昭、鍾鎮濤、溫碧霞和肥媽等捧場，與全場觀眾玩人浪、起身跳舞大合唱，玩得好High。當中表演嘉賓軟硬天師，復刻「草蜢森巴大戰軟硬Fans演唱會2012 GHVSSH」，更以20年前一黃一紅戰士look登場，掀集體回憶，但卻變成XXL版，草蜢被殺個措手不及，笑到幾乎講不出話：「十幾年無見，肥咗喎！」
草蜢笑軟硬「落地生根」
當年12場對決軟硬險勝，昨晚雙方再戰紅館。軟硬將草蜢《三分鐘放縱》融入自家金曲《老人院》、《廣播道fans殺人事件》及《川保久齡大戰山本耀司》歌詞，心思十足。蔡一傑即投訴二人雙腳從未離地、揸流攤；蔡一智更取笑他們跳「落地生根舞」。
林海峰反擊：「你哋係『跳舞組合』，我哋係『無跳組合』！」草蜢則跳唱軟硬名作《叱咤勁歌金曲》迎戰，精彩絕倫。一如當年以現場歡呼聲評分，主場草蜢明顯大勝，惟軟硬出茅招亂噏賽果，笑爆全場。
林海峰自爆當年抄造型
草蜢送上泳褲預祝林海峰三項鐵人比賽成功，另贈葛民輝孖煙囪底褲。林海峰隨即大爆秘密，指1993年軟硬宣傳《廣播道fans殺人事件》時的潮爆板仔look，其實是抄襲草蜢《三分鐘放縱》MV造型：「睇電視見到，嘩！咁型，但唔襯你哋囉！我即刻叫阿葛跟住搵。」結果獲當年板仔界鉅子BFD日籍老闆Tabo贊助，軟硬因而成為潮流指標。林海峰多謝草蜢啟發，揚言任何時候要「大戰」，軟硬隨時奉陪，台下fans即時歡呼，期待兩組合再度聯手開騷。
重新組裝成軟硬式幽默
軟硬一唱一和，將草蜢三子近日在台上說的深情話語重新組裝成軟硬式幽默，全場笑聲不斷。林海峰說：「你哋三個話希望下一世都做兄弟，點解無預我哋兩個？如果唔預埋我哋，就冇辦法同你哋『大戰』！」又對蔡一傑說：「人生嚟到呢個地方，要將張畫紙畫到最靚。」葛民輝扮傑仔語氣回應：「如果軟硬有張畫紙，一定請埋草蜢一齊畫！」傑仔則說：「我哋張畫紙都一定有你哋軟硬份嘅。」
蔡一智多謝舊同學蘇志威
蔡一智在台上多謝舊同學蘇志威，林海峰接力：「我都多謝我嘅同學葛民輝，我哋都係屋村大，冇諗過我哋呢個組合都可以堅持到40年！」蘇志威質疑邊有40年，葛民輝笑言：「四捨五入！」又說：「雖然我哋兩兄弟成日吵吵鬧鬧，但係我哋永遠都係一體！」
五子手搭手結盟感人
林海峰拉住傑仔說：「將來無論你哋3個邊個走先（草蜢齊聲『啋』），我都會走先，因為我慣咗早瞓。如果草蜢下一世有場紙嘅話（紅館開騷入場紙），我哋軟硬下一世都會做兄弟，陪你哋繼續玩落去！」五子手搭手結盟，場面感人。惟蔡一智突然對軟硬說：「我想講……我點都唔會着你哋件衫！」全場爆笑。最後合唱草蜢《朋友》與軟硬《好兄弟》混合版，全場High爆。
延伸內容：草蜢40周年演唱會｜林珊珊相隔20年再踏台│ 蘇志威被讚「胸襟好大」│合唱《戀愛預告》掀回憶殺
延伸內容：草蜢40周年演唱會｜古天樂曾做草蜢MV男主角 淡定獻唱《原諒我是我》
延伸內容：草蜢頭場個唱｜草蜢3子感性熱血訂盟：「唔知道邊個會先走，希望來生再做兄弟！」
延伸內容：草蜢頭場個唱｜陳奕迅驚喜現身擔任嘉賓 自爆因為一件事唔妥蘇志威 連招呼都唔打！
延伸內容：草蜢頭場個唱｜蔡一傑剖白驚心抗癌歷程 數度眼濕濕 感觸良多
