發佈時間：17:30 2026-03-13
富三代鍾培生上周三（4日）在毫無預警之下，宣布向民建聯之花、區議員莊雅婷求婚成功。當晚他將淺水灣豪宅打造成動漫《進擊的巨人》的場景，吊威也空降出場，大陣仗到贏得99%香港人的關注。
據悉二人相識6年，女方早於19歲已經對鍾培生有好感，直至去年重遇一撻即着。中秋節時，鍾培生更陪女友在將軍澳派檸水，二人又不時在網上調情，相當甜蜜。
鍾家萬呎大宅樓高5層，相信會作為二人婚後的愛巢。鍾培生早前更向《東周刊》分享他的私人巨床及浴缸，足夠兩個人用有餘。而求婚當晚，25歲的莊雅婷被指穿鬆身裙，又用手遮肚孕味濃；女的年輕，男的勇猛，要生成隊足球隊，應該絕對冇問題！
打情罵俏
鍾培生「封盤」後，上周五（6日）首次拖着未婚妻莊雅婷出席《仁濟醫院周年慈善餐舞會》，被問到求婚鑽戒有幾多卡時，他笑着回應：「係家傳之寶。」
上周三他選擇在逾1萬呎的淺水灣獨立屋求婚，內有酒窖、健身室、衣帽間等，應有盡有。對於突然公開求婚，網民質疑他有錢、有時間卻睇唔開，卻被他直接KO：「相信愛情！」
35歲的鍾培生比莊雅婷大10年，知情人士說：「莊雅婷19歲已經鍾意鍾培生，曾私訊傾偈，不過當時男方覺得佢係小妹妹，冇騷佢。直到去年佢哋喺一個活動上撞番，就一拍即合。求婚日子係鍾媽媽擇嘅，鍾媽媽對呢位未來新抱非常滿意，曾經送過名貴首飾畀莊雅婷，但女方竟然唔肯收，所以佢覺得呢個女仔唔貪錢，好純品。」
「鍾莊戀」愛得低調，拍拖以來，兩人只間中在網上打情罵俏。今年1月，有網民貼出銀行戶口只餘下188港元的相片，問如何追女仔？鍾培生即留言：「咁嘅狀況正版鹹片都買唔到，AV女優都未必想俾你J，真係唔好出嚟害人啦！」引來莊雅婷不禁插嘴罵男友：「你真係好衰。」
另一次，有網民指寫錯鍾培生是真乖仔類KOL，莊雅婷即時力撐：「其實真係（乖仔），除咗把口衰啲。」男人越「衰」，女人越愛，明嘅。
親織頸巾
求婚當晚， 一向鍾情動漫的鍾培生向《進擊的巨人》致敬，除了出動巨型場景布置、管弦樂團伴奏，他更手持雙劍，從豪宅天台30米高吊威也落地，先為莊雅婷圍上紅色頸巾，再下跪發表愛的宣言：「我鍾培生承諾，我會愛你，保護你同埋照顧你一生一世，嫁畀我！」
原來圍頸巾有含義，是重現《巨人》中男女主角艾倫與米卡莎的一幕，代表給予女方「家」的歸屬感，以及告白願意一生守護女方。雖然米卡莎最後斬殺艾倫，但不少人認為二人是真心相愛，所以艾倫才願意犧牲。鍾培生說：「諫山創老師（《巨人》漫畫家）自己結婚，唔畀艾倫同米卡莎結婚，由我同 Angel（莊雅婷）去完成個故仔。」
鍾培生為了成功「飛天」，苦練近兩個月，練到手腳瘀都不肯收手，甚至親手為女方織頸巾，sweet到爆。「除非好似我咁搵到一個咁好嘅女人，如果唔係，正常男人真係唔會考慮結婚。」冧到莊雅婷大讚：「又真係幾型嘅。」
對於有網民質疑莊雅婷可有say yes？鍾培生亦霸氣回應：「我冇問過佢問題，我係叫佢嫁畀我。」極具霸道總裁feel。
延伸內容 : 鍾培生求婚成功｜「富四代」桃花旺盛 11位緋聞女友各有魅力 從未公開承認任何戀情
延伸內容：鍾培生突爆婚訊 30米高空着地震撼 向退選港姐議員莊雅婷求婚成功
