昔日，經常被指演戲只得一個表情的馬國明 （馬明），近年由他擔正的劇集都收視理想，更被視為「福將」。人生年近半百，事業得意，識諗的馬明，就立即揀定陪伴自己，走人生下半場的結婚對象——湯洛雯（靚湯）。
早前，馬明接受獨家專訪；期間，他就大讚老婆仔既入得廚房，又出得廳堂，更洩漏兩人的閨房私秘，他甜絲絲的說：「阿湯，其實佢好嗲㗎，好黐身，但我鍾意呢啲囉。」兩人成日黐住咁溫馨sweet，難怪馬明甘心戒了最喜歡睇AV的習慣！

御用醫生

現年49歲、入行24年的馬國明 （馬明），畢業於第14期藝員訓練班，同學有吳卓羲、葉璇等。畢業後，他做了幾年「茄喱啡」。直至2003年，他才開始備受重用，既有份參演台慶劇《衝上雲霄》，又與吳卓羲、陳鍵鋒、黃宗澤獲捧為「S4」；2004年，他還獲選為奧運6星之一；2006年，他更奪得「飛躍進步男藝員」獎，並且首度獲提名「最佳男主角」（視帝），嶄露頭角。
之後幾年，馬明不停獲提名「最佳男主角」，屢敗屢戰，終在一九年靠《白色強人》飾演「唐明」醫生一角，登上「視帝」寶座。入行多年，他原來足足演過15次醫生，由古代演到現代，兼涉足不同部門，「TVB御用醫生」當之無愧，他笑說：「其實，我早年已經有好多新嘗試，例如：《鐵馬尋橋》我係飾演一個悲劇英雄，之前喺《法言人》嘅『金師爺』，都係我未演過嘅角色，就算我啱啱拍完嘅《新聞女王》，都係有好大發揮，所以我近排幾開心，因為監製俾啲我從來未演過嘅角色我做，令到觀眾可以見到我另外一面。」

再奪「視帝」

早前，馬明有份演出的《白色強人ll》、《隱形戰隊》及《法言人》，收視和口碑俱佳，故他被視為「福將」。他直說只怕觀眾會睇厭，又謙稱：「福將就唔講得，係好運啫，觀眾仲鍾意睇我演嘅劇，梗係開心啦！坦白講，香港人睇劇嘅模式已經改變咗，係得閒先上網撳番嚟睇，所以呢個成績我係覺得驚喜嘅！」提到有否信心再奪「視帝」？他瞬間佛系上身：「我冇乜所謂，今年我反而希望林子善可以攞到獎，由《鐵馬》開始同佢合作，覺得佢真係有好大進步。」
馬明由於為人夠直、夠麻甩，故被冠以「貼地男神」之名。事實上，他從來都不會掩飾自己的真性情，經常說「老實話」。年前，他好坦白的說﹕「電腦對我嚟講，只係用嚟上網睇新聞，睇波同埋上鹹網！我咁大個人同你講冇上過鹹網，你都唔信啦！如果我話自己都仲係處男、好純情，咁仲核突！我只係做番一個正常人會做嘅事。」此話一出，在網上即獲得群組力撐，有男網民讚他是「真性情的真男人」；另有女網民竟然視他為「最佳男朋友」。至於，港產日本AV女優繪麗奈的作品，未知馬明有否觀賞過呢？他面紅兼耍手說：「冇喇、冇喇！我𠵱家開劇，每日只係瞓得3、4個鐘，婚禮都冇時間搞，唔會睇啦！同埋𠵱家我有老婆㗎喇，唔使睇啦！」馬明總是吃了「誠實豆沙包」。

結婚地點

每每提到未婚妻湯洛雯（靚湯），馬明總是有讚冇彈，並且笑得甜絲絲的。婚禮如箭在弦，他流露感激的眼神：「好彩有阿湯，我真係冇時間去搞，我就跟住佢嘅方向啦！其實，我拍劇拍得太多結婚場面，都冇乜嘢太大感覺，我覺得婚禮最緊要係另外一半鍾意就得。𠵱家暫定我哋會喺外國搞一個細型嘅婚禮，地點暫定會係東南亞，近近哋。因為我爸爸年紀大，唔可以坐長途機，3至4個鐘已經最盡。」馬明的朋友一大籮，他表示最怕婚禮請漏了朋友，希望大家不要見怪。
拍完新劇《新聞女王》後，馬明本想專心跟靚湯埋首搞婚禮事宜，可是卻臨急被公司徵召開拍新劇《飛常日誌》；所以在法國預度蜜月及影婚紗相後，便馬上回港開工。在巴黎時，他與靚湯被網民在老佛爺「野生捕獲」，並指女方全程黑面。馬明立即「護妻」：「當時，我哋買緊嘢，話阿湯黑面，其實佢唔係嬲豬，當時佢好開心嘅。我哋估唔到喺法國，佢搵到一啲想買嘅嘢，喺香港可能排隊都唔會有；而喺法國即刻俾到佢，所以佢好開心。但係，我哋喺法國生活呢10日、8日，發現法國人嘅節奏好慢，好elegant、好悠閒同relax，好多時都要等；而香港人嘅節奏好快，我哋喺度諗『點解等咁耐嘅？』其實佢好開心，因為佢買到一啲想買嘅嘢。」

盡情「放閃」

除了「血拼」之外，兩人又去到法國各地旅行，歎美食、參觀名勝古蹟、浪漫行沙灘等。靚湯還透露，今次係兩人首次結伴歐遊，感謝馬明日日揸車，帶她周圍去玩兼盡歎美食，她甜蜜的說：「感覺被縱壞了！」今個旅程，兩人可謂盡情「放閃」！
自覺是悶到爆燈的馬明，坦言遇到一個能夠配合自己生活與節奏的女人，夫復何求？他開心的說：「我份人好悶，唔識製造話題，而阿湯係可以好靜咁樣陪喺我身邊，佢會識得製造話題，佢係一個有情趣嘅人，又好黐家，又鍾意煮嘢食，我哋好夾。我覺得好煩嗰啲嘢，佢唔怕麻煩，會完全幫我做晒，令我減少咗好多煩惱；同埋佢係一個好容易𠱁嘅人，份人又簡單；仲有，佢知道我鍾意做戲，對自己嘅演出好有要求，所以佢有好多嘢盡量都唔會去煩我，同我咁合拍嘅女人，去邊度搵呀？」
馬明又不禁大爆閨房私密：「佢私底下係幾嗲、幾黐身。我養咗三隻貓，佢就似一隻貓咁黐身，其實唔係所有男仔都鍾意嘅，但係我鍾意囉。不過，佢又未至於黐到唔俾我去踢波嘅。」至於生BB方面，他就想順其自然：「都唔排除有小朋友嘅，至於點樣湊，生咗落嚟先知啦！不過，我覺得自己係一個嚴父，特別對仔要嚴，可能係阿爸對我嘅影響。」馬明由衷的說，這幾年是他最開心的日子，遇到好劇本，又遇上一個好女人，並且成家立室，事業與愛情兩兼得！